-ਦੌੜ ਆਰੰਭ ਹੋਣ ਤੋਂ ਪਹਿਲਾਂ ਬਰੈਂਪਟਨ ਸਾਊਥ ਦੀ ਮੈਂਬਰ ਪਾਰਲੀਮੈਂਟ ਸੋਨੀਆ ਨੇ ਦੌੜਾਕਾਂ ਤੇ ਪ੍ਰਬੰਧਕਾਂ ਨੂੰ ਕੀਤਾ ਸੰਬੋਧਨ
-ਕਲੱਬ ਦੇ ਵਾਲੰਟੀਅਰਾਂ ਨੇ ਦੋ ‘ਵਾਟਰ-ਸਟੇਸ਼ਨ’ ਕਾਇਮ ਕਰਕੇ ਦੌੜਾਕਾਂ ਦੀ ਕੀਤੀ ਪਾਣੀ ਦੀ ਖ਼ੂਬ ਸੇਵਾ

 
ਬਰੈਂਪਟਨ, (ਡਾ. ਝੰਡ) ਕੈਨੇਡੀਅਨ ਕੈਂਸਰ ਸੋਸਾਇਟੀ ਦੇ ਸਹਿਯੋਗ ਨਾਲ ਕੈਨੇਡੀਅਨ ਇੰਪੀਰੀਅਲ ਬੈਂਕ ਆਫ਼ ਕਾਮਰਸ (ਸੀਆਈਬੀਸੀ) ਵੱਲੋਂ ਪਿਛਲੇ 25 ਸਾਲ ਤੋਂ ਹਰ ਸਾਲ ਅਕਤੂਬਰ ਮਹੀਨੇ ਦੇ ਪਹਿਲੇ ਐਤਵਾਰ ਨੂੰ ‘ਸੀਆਈਬੀਸੀ ਰੱਨ ਫ਼ਾਰ ਦ ਕਿਓਰ’ ਦਾ ਆਯੋਜਨ ਕੀਤਾ ਜਾਂਦਾ ਹੈ। ਇਹ ਦੌੜ 5 ਕਿਲੋਮੀਟਰ ਅਤੇ 1 ਕਿਲੋਮੀਟਰ ਦੂਰੀ ਦੀ ਕਰਵਾਈ ਜਾਂਦੀ ਹੈ ਅਤੇ ਇਸ ਵਿਚ ਡੋਨੇਸ਼ਨ ਰਾਹੀਂ ਇਕੱਤਰ ਹੋਈ ਰਾਸ਼ੀ ਕੈਨੇਡਾ ਵਿਚ ਕੈਂਸਰ ਸਬੰਧੀ ਖੋਜ ਕਰਵਾਉਣ ਵਾਲੀ ਸੰਸਥਾ ‘ਕੈਨੇਡੀਅਨ ਕੈਂਸਰ ਸੋਸਾਇਟੀ’ ਨੂੰ ਦਿੱਤੀ ਜਾਂਦੀ ਹੈ। ਇਸ ਸਾਲ ਪਹਿਲੀ ਅਕਤੂਬਰ ਨੂੰ ਹੋਈ ਦੌੜ ਸਮੇਂ ਇਸ ਪਵਿੱਤਰ ਕੰਮ ਲਈ 14.5 ਮਿਲੀਅਨ ਡਾਲਰ ਦੀ ਰਕਮ ਡੋਨੇਸ਼ਨ ਰਾਹੀਂ ਇਕੱਠੀ ਹੋਈ। ਸੀਆਈਬੀਸੀ ਦੇ ਹੋਰ ਉਪਰਾਲਿਆਂ ਅਤੇ ਵੱਖ-ਵੱਖ ਸਾਧਨਾਂ ਸਦਕਾ ਇਸ ਮਹਾਨ ਕਾਰਜ ਲਈ ਕੁਲ ਰਾਸ਼ੀ 73 ਮਿਲੀਅਨ ਇਕੱਤਰ ਹੋਈ।

 
‘ਸੀਆਈਬੀਸੀ ਰੱਨ ਫ਼ਾਰ ਦ ਕਿਓਰ 2023’ ਲੰਘੇ ਐਤਵਾਰ ਪਹਿਲੀ ਅਕਤੂਬਰ ਨੂੰ ਕੈਨੇਡਾ ਦੇ 53 ਸ਼ਹਿਰਾਂ ਵਿਚ ਆਯੋਜਿਤ ਕੀਤੀ ਗਈ। ਬਰੈਂਪਟਨ ਵਿਚ ਇਸ ਦੌੜ ਦਾ ਆਯੋਜਨ ਕੈਨੇਡੀ ਰੋਡ ਸਥਿਤ ‘ਸਪੋਰਟਸ ਐਂਡ ਐਂਟਰਟੇਨਮੈਂਟ ਕੰਪਲੈਕਸ (ਸੀਏਏ) ਦੇ ਸਾਹਮਣੇ ਖੁੱਲ੍ਹੀ ਜਗ੍ਹਾ ‘ਤੇ ਕੀਤਾ ਗਿਆ। ਇਹ ਦੌੜ ਇਸ ਥਾਂ ਤੋਂ ਸਵੇਰੇ ਠੀਕ 10.00 ਵਜੇ ਆਰੰਭ ਹੋਈ ਅਤੇ ਦੌੜਾਕਾਂ ਵੱਲੋਂ ਵੱਖ-ਵੱਖ ਸੜਕਾਂ ‘ਤੇ ਨਿਰਧਾਰਿਤ ਰੂਟ ਉੱਪਰ ਦੌੜਨ ਤੋਂ ਬਾਅਦ ਇਸ ਦੀ ਸਮਾਪਤੀ ਵੀ ਏਸੇ ਥਾਂ ‘ਤੇ ਹੋਈ। ਇਸ ਦੌੜ ਲਈ ਪ੍ਰਬੰਧਕਾਂ ਵੱਲੋਂ ਬੜਾ ਸੁਚੱਜਾ ਪ੍ਰਬੰਧ ਕੀਤਾ ਗਿਆ। ਦੌੜ ਆਰੰਭ ਹੋਣ ਤੋਂ ਪਹਿਲਾਂ ਬਰੈਂਪਟਨ ਸਾਊਥ ਦੀ ਮੈਂਬਰ ਪਾਰਲੀਮੈਂਟ ਸੋਨੀਆਂ ਸਿੱਧੂ ਵੱਲੋ ਦੌੜ ਦੇ ਪ੍ਰਬੰਧਕਾਂ ਅਤੇ ਦੌੜਾਕਾਂ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਨੂੰ ਹੱਲਾਸ਼ੇਰੀ ਦਿੱਤੀ ਗਈ ਅਤੇ ਇਸ ਦੇ ਆਯੋਜਨ ਲਈ ਉਨ੍ਹਾਂ ਦਾ ਧੰਨਵਾਦ ਵੀ ਕੀਤਾ ਗਿਆ।
ਇਸ ਦੌੜ ਵਿਚ ਤਿੰਨ ਤਰ੍ਹਾਂ ਦੇ ਦੌੜਾਕ ਸ਼ਾਮਲ ਸਨ। ਗੁਲਾਬੀ ਰੰਗ ਦੀਆਂ ਟੀ-ਸ਼ਰਟਾਂ ਵਿਚ ਕੈਂਸਰ ਦੀ ਨਾ-ਮੁਰਾਦ ਬੀਮਾਰੀ ਨਾਲ ਜੂਝ ਰਹੇ ਜਾਂ ਇਸ ਬੀਮਾਰੀ ਤੋਂ ਮੁਕਤੀ ਪਾ ਚੁੱਕੇ ਵਿਅੱਕਤੀ (ਕੈਂਸਰ ਸਰਵਾਈਵਰਜ) ਸਨ, ਸਫ਼ੈਦ ਟੀ-ਸ਼ਰਟਾਂ ਵਿਚ ਇਸ ਬੀਮਾਰੀ ਨੂੰ ਦੂਰ ਕਰਨ ਵਾਲੇ ਮਹਾਨ ਕਾਰਜ ਨਾਲ ਜੁੜੇ ਹੋਏ ਲੋਕ ਸਨ ਅਤੇ ਲਾਲ ਰੰਗ ਦੀਆਂ ਟੀ-ਸ਼ਰਟਾਂ ਵਿਚ ਸੀਆਈਬੀਸੀ ਦੇ ਕਰਮਚਾਰੀ ਸਨ। ਬਰੈਂਪਟਨ ਵਿਚ ਪਿਛਲੇ 12 ਸਾਲ ਤੋਂ ਸਰਗ਼ਰਮ ‘ਟੋਰਾਂਟੋ ਪੀਅਰਸਨ ਏਅਰਪੋਰਟ ਰੱਨਰਜ਼ ਕਲੱਬ’ (ਟੀਪੀਏਆਰ ਕਲੱਬ) ਦੇ ਮੈਂਬਰਾਂ ਮਨਜੀਤ ਸਿੰਘ, ਸਿਮਰਤਪਾਲ ਭੁੱਲਰ, ਮਨਜੀਤ ਨੌਟਾ, ਕੁਲਦੀਪ ਗਰੇਵਾਲ, ਬਲਕਾਰ ਸਿੰਘ ਖਾਲਸਾ, ਧਰਮ ਸਿੰਘ ਰੰਧਾਵਾ, ਸੁਰਿੰਦਰ ਸਿੰਘ ਨਾਗਰਾ, ਕਮਲਜੀਤ ਬਾਜਵਾ, ਅਵਤਾਰ ਬੁੱਟਰ, ਭਰਮਿੰਦਰ ਜੱਸੀ ਅਤੇ ਨਰਿੰਦਰ ਕੌਰ ਨੇ ਕਲੱਬ ਦੀਆਂ ਸੰਤਰੇ ਰੰਗ ਦੀਆਂ ਟੀ-ਸ਼ਰਟਾਂ ਨਾਲ 5 ਕਿਲੋਮੀਟਰ ਦੌੜ ਵਿਚ ਭਾਗ ਲਿਆ।

 
ਇਸ ਦੇ ਨਾਲ ਹੀ ਇਸ ਕਲੱਬ ਵੱਲੋਂ ਬੜੀ ਸੁਚੱਜਤਾ ਨਾਲ ਦੋ ‘ਵਾਟਰ-ਸਟੇਸ਼ਨਾਂ’ ਦਾ ਪ੍ਰਬੰਧ ਕੀਤਾ ਗਿਆ। ਇਨ੍ਹਾਂ ਵਿੱਚੋਂ ਇੱਕ ਤਾਂ ਦੌੜ ਦੇ ਆਰੰਭ ਅਤੇ ਸਮਾਪਤ ਹੋਣ ਵਾਲੀ ਥਾਂ ਦੇ ਬਿਲਕੁਲ ਨਜ਼ਦੀਕ ਸੀ ਅਤੇ ਦੂਸਰਾ ਦੌੜ ਦੇ ਰੂਟ ਦੇ ਅੱਧ-ਵਿਚਕਾਰ ਇਕ ਸੜਕ ਦੇ ਖੱਬੇ ਕਿਨਾਰੇ ‘ਤੇ ਸਥਾਪਿਤ ਕੀਤਾ ਗਿਆ। ਇਨ੍ਹਾਂ ਦੋਹਾਂ ਥਾਵਾਂ ‘ਤੇ ਦੌੜਾਕਾਂ ਦੀ ਪਾਣੀ ਨਾਲ ਸੇਵਾ ਕਰਨ ਵਾਲਿਆਂ ਵਿਚ ਕਲੱਬ ਦੇ ਮੈਂਬਰ ਹਰਭਜਨ ਸਿੰਘ ਗਿੱਲ, ਸੁਖਦੇਵ ਸਿਧਵਾਂ, ਹਰਜੀਤ ਸਿੰਘ, ਹਜ਼ੂਰਾ ਸਿੰਘ ਬਰਾੜ, ਅਵਤਾਰ ਸਿੱਧੂ, ਜੱਸੀ ਭੁੱਲਰ, ਸਰਬਜੀਤ ਸਿੰਘ, ਯੋਗੀ ਗੁਲਿਆਨੀ, ਜੰਗੀਰ ਸਿੰਘ ਸੈਂਹਬੀ, ਸੁਖਦੇਵ ਸਿੰਘ ਝੰਡ, ਹਰਚੰਦ ਸਿੰਘ ਬਾਸੀ, ਅਵਤਾਰ ਸਿੰਘ ਬਾਸੀ, ਅਮਰਜੀਤ ਸਿੰਘ, ਰਣਜੀਤ ਸਿੰਘ ਤੱਗੜ ਅਤੇ ਕਈ ਹੋਰ ਵਾਲੰਟੀਅਰ ਸ਼ਾਮਲ ਸਨ।
ਪਹਿਲੇ ਵਾਟਰ-ਸਟੇਸ਼ਨ ਦੀ ਅਗਵਾਈ ਕਲੱਬ ਦੇ ਚੇਅਰਪਰਸਨ ਸੰਧੂਰਾ ਸਿੰਘ ਬਰਾੜ ਅਤੇ ‘ਐੱਨਲਾਈਟ ਕਿੱਡਜ਼’ ਸੰਸਥਾ ਦੇ ਸੰਸਥਾਪਕ ਨਰਿੰਦਰਪਾਲ ਬੈਂਸ ਕਰ ਰਹੇ ਸਨ ਅਤੇ ਦੂਸਰੇ ਵਾਟਰ-ਸਟੇਸ਼ਨ ਦੀ ਅਗਵਾਈ ਦਾ ਭਾਰ ਤਜਿੰਦਰ ਗਰੇਵਾਲ ਅਤੇ ਜੰਗੀਰ ਸਿੰਘ ਸੈਂਹਬੀ ਦੇ ਮੋਢਿਆਂ ‘ਤੇ ਸੀ। ਇਸ ਦਿਨ ਮੌਸਮ ਦਾ ਮਿਜਾਜ਼ ਕੁਝ ਗਰਮ ਸੀ ਅਤੇ ਦੌੜਾਕਾਂ ਤੇ ਵਾੱਕਰਾਂ ਨੂੰ ਰਸਤੇ ਵਿਚ ਪਿਆਸ ਵੀ ਕਾਫ਼ੀ ਮਹਿਸੂਸ ਹੋ ਰਹੀ ਸੀ। ਉਨ੍ਹਾਂ ਨੂੰ ਪਾਣੀ ਪਿਆਉਣ ਦੀ ਸੇਵਾ ਕਲੱਬ ਦੇ ਸਮੂਹ ਵਾਲੰਟੀਅਰਾਂ ਵੱਲੋਂ ਬਾਖ਼ੂਬੀ ਨਿਭਾਈ ਗਈ। ਇਸ ਤਰ੍ਹਾਂ ਇਸ ਸਾਲ ਬਰੈਂਪਟਨ ਵਿਚ ਹੋਈ ਇਸ ‘ਸੀਆਈਬੀਸੀ ਰੱਨ ਫ਼ਾਰ ਦ ਕਿਓਰ’ ਵਿਚ ਟੀਪੀਏਆਰ ਕਲੱਬ ਦੇ ਦੌੜਾਕਾਂ ਵੱਲੋਂ ਇਸ ਵਿਚ ਦੌੜਨ ਦੀ ਅਤੇ ਇਸ ਦੇ ਵਾਲੰਟੀਅਰਾਂ ਵੱਲੋਂ ਦੌੜਾਕਾਂ ਨੂੰ ਪਾਣੀ ਦੀ ਸੇਵਾ ਦੀ ਦੂਹਰੀ ਭੂਮਿਕਾ ਬਾਖ਼ੂਬੀ ਨਿਭਾਈ ਗਈ। ਦੌੜ ਦੇ ਪ੍ਰਬੰਧਕਾਂ ਵੱਲੋਂ ਟੀਪੀਏਆਰ ਕਲੱਬ ਦੇ ਮੈਂਬਰਾਂ ਦਾ ਧੰਨਵਾਦ ਕੀਤਾ ਗਿਆ।
ਇਸ ਸਬੰਧੀ ਹੋਰ ਜਾਣਕਾਰੀ ਲਈ ਸੰਧੂਰਾ ਸਿੰਘ ਬਰਾੜ (415-275-9337), ਨਰਿੰਦਰਪਾਲ ਬੈਂਸ (647-893-3656) ਜਾਂ ਮਨਜੀਤ ਨੌਟਾ (416-301-1968) ਨੂੰ ਸੰਪਰਕ ਕੀਤਾ ਜਾ ਸਕਦਾ ਹੈ। ਟੀਪੀਏਆਰ ਕਲੱਬ ਦੀਆਂ ਸਰਗ਼ਰਮੀਆਂ ਬਾਰੇ ਜਾਣਕਾਰੀ ਲਈ ਇਸ ਦੀ ਵੈੱਬਸਾਈਟ www.tparclub.com‘ਤੇ ਜਾਇਆ ਜਾ ਸਕਦਾ ਹੈ।