ਟੋਰਾਂਟੋ, 8 ਜੂਨ (ਪੋਸਟ ਬਿਊਰੋ) : ਕਈ ਹਫਤਿਆਂ ਦੀ ਕੈਂਪੇਨਿੰਗ ਤੋਂ ਬਾਅਦ ਟੋਰਾਂਟੋ ਵਿੱਚ ਮੇਅਰ ਦੇ ਅਹੁਦੇ ਲਈ ਹੋਣ ਵਾਲੀਆਂ ਚੋਣਾਂ ਵੀਰਵਾਰ ਨੂੰ ਨਵੇਂ ਪੜਾਅ ਵਿੱਚ ਦਾਖਲ ਹੋ ਗਈਆਂ। ਇਨ੍ਹਾਂ ਜਿ਼ਮਨੀ ਚੋਣਾਂ ਲਈ ਐਡਵਾਂਸ ਵੋਟਿੰਗ ਹੁਣ ਖੁੱਲ੍ਹ ਗਈ ਹੈ।
ਜਿਹੜੇ ਲੋਕ ਜਲਦੀ ਆਪਣੀ ਵੋਟ ਭੁਗਤਾਉਣੀ ਚਾਹੁੰਦੇ ਹਨ ਉਹ ਅਗਲੇ ਛੇ ਦਿਨਾਂ ਵਿੱਚ ਸਿਟੀ ਦੀਆਂ ਕਈ ਲੋਕੇਸ਼ਨਾਂ ਉੱਤੇ ਅਜਿਹਾ ਕਰ ਸਕਣਗੇ। ਐਡਵਾਂਸ ਵੋਟਿੰਗ 8 ਜੂਨ ਨੂੰ ਸ਼ੁਰੂ ਹੋ ਕੇ 13 ਜੂਨ ਤੱਕ ਚੱਲੇਗੀ ਤੇ ਇਸ ਦੌਰਾਨ ਸਵੇਰੇ 10:00 ਵਜੇ ਤੋਂ ਵੋਟਿੰਗ ਸ਼ੁਰੂ ਹੋ ਕੇ ਸ਼ਾਮ ਦੇ 7:00 ਵਜੇ ਤੱਕ ਪਿਆ ਕਰੇਗੀ।
ਐਡਵਾਂਸ ਵੋਟਿੰਗ ਲਈ ਹੇਠ ਲਿਖੇ ਲੋਕ ਯੋਗ ਹੋਣਗੇ :
· ਜਿਹੜੇ ਕੈਨੇਡੀਅਨ ਨਾਗਰਿਕ ਹੋਣ
· ਜਿਹੜੇ ਘੱਟੋ ਘੱਟ 18 ਸਾਲਾਂ ਦੇ ਹੋਣ
· ਜਿਹੜੇ ਟੋਰਾਂਟੋ ਵਾਸੀ ਹੋਣ ਜਾਂ ਫਿਰ ਜਿਨ੍ਹਾਂ ਦੀ ਪ੍ਰਾਪਰਟੀ ਸਿਟੀ ਵਿੱਚ ਹੋਵੇ ਜਾਂ ਉਨ੍ਹਾਂ ਆਪਣੀ ਪ੍ਰਾਪਰਟੀ ਕਿਰਾਏ ਉੱਤੇ ਦਿੱਤੀ ਹੋਵੇ
ਜਿਨ੍ਹਾਂ ਵਿਦਿਆਰਥੀਆਂ ਦਾ ਪਰਮਾਨੈਂਟ ਐਡਰੈਸ ਕਿਸੇ ਹੋਰ ਮਿਊਂਸਪੈਲਿਟੀ ਵਿੱਚ ਹੋਵੇ ਪਰ ਜਿਹੜੇ ਇਸ ਸਮੇਂ ਟੋਰਾਂਟੋ ਵਿੱਚ ਰਹਿ ਰਹੇ ਹੋਣ, ਉਹ ਵੀ ਦੋਵਾਂ ਮਿਊਂਸਪੈਲਿਟੀਜ਼ ਵਿੱਚ ਵੋਟ ਕਰ ਸਕਦੇ ਹਨ।
ਜਿਹੜੇ ਵਿਦਿਆਰਥੀ ਟੋਰਾਂਟੋ ਵਾਸੀ ਹੋਣ ਪਰ ਕਿਸੇ ਹੋਰ ਮਿਊਂਸਪੈਲਿਟੀ ਵਿੱਚ ਸਕੂਲ ਵਿੱਚ ਦਾਖਲ ਹੋਣ, ਉਹ ਵੀ ਦੋਵਾਂ ਮਿਊਂਸਪੈਲਿਟੀਜ਼ ਵਿੱਚ ਵੋਟ ਕਰਨ ਦੇ ਯੋਗ ਹਨ।
ਵੋਟਰਜ਼ ਨੂੰ ਆਪਣੀ ਸ਼ਨਾਖ਼ਤ ਵਿਖਾਉਣੀ ਹੋਵੇਗੀ, ਜਿਸ ਵਿੱਚ ਉਨ੍ਹਾਂ ਦਾ ਨਾਂ ਤੇ ਟੋਰਾਂਟੋ ਵਾਲਾ ਐਡਰੈੱਸ ਹੋਵੇਗਾ, ਜਿਵੇਂ ਕਿ ਡਰਾਈਵਰਜ਼ ਲਾਇਸੰਸ, ਪਰਸਨਲਾਈਜ਼ਡ ਚੈੱਕ ਜਾਂ ਬੈਂਕ ਸਟੇਟਮੈਂਟ ਜਾਂ ਯੁਟਿਲਿਟੀ ਬਿੱਲ ਆਦਿ। ਫੋਟੋ ਆਈਡੀ ਦੀ ਲੋੜ ਨਹੀਂ ਹੋਵੇਗੀ। ਵੋਟਰ ਇਨਫਰਮੇਸ਼ਨ ਕਾਰਡ (ਆਈਵੀਸੀ) ਦੀ ਵੋਟ ਪਾਉਣ ਲਈ ਲੋੜ ਨਹੀਂ ਹੋਵੇਗੀ।