ਬਰੈਂਪਟਨ, 26 ਮਈ (ਪੋਸਟ ਬਿਊਰੋ) : ਬਰੈਂਪਟਨ ਵਿੱਚ ਇੱਕ ਜੀਪ ਤੇ ਮਿਨੀਵੈਨ ਦਰਮਿਆਨ ਹੋਈ ਟੱਕਰ ਵਿੱਚ ਇੱਕ ਮਹਿਲਾ ਦੀ ਮੌਤ ਹੋ ਗਈ।
ਸ਼ੁੱਕਰਵਾਰ ਰਾਤੀਂ 2:00 ਵਜੇ ਤੋਂ ਠੀਕ ਬਾਅਦ ਬ੍ਰਾਮੇਲੀਆ ਰੋਡ ਤੇ ਸੈਂਡਲਵੁੱਡ ਪਾਰਕਵੇਅ ਦੇ ਇੰਟਰਸੈਕਸ਼ਨ ਉੱਤੇ ਹੋਏ ਇਸ ਹਾਦਸੇ ਦਾ ਪਤਾ ਲੱਗਣ ਮਗਰੋਂ ਪੁਲਿਸ ਅਧਿਕਾਰੀ ਮੌਕੇ ਉੱਤੇ ਪਹੁੰਚੇ। ਪੁਲਿਸ ਨੇ ਦੱਸਿਆ ਕਿ ਹੌਂਡਾ ਓਡਿਸੀ ਨੇ ਜੀਪ ਰੈਂਗਲਰ ਦੇ ਪਿਛਲੇ ਹਿੱਸੇ ਨੂੰ ਮਾਮੂਲੀ ਜਿਹੀ ਟੱਕਰ ਮਾਰੀ। ਪਰ ਇਸ ਨਾਲ ਜੀਪ ਪਲਟ ਗਈ।
ਜੀਪ ਵਿੱਚ ਸਵਾਰ ਮਹਿਲਾ ਨੂੰ ਮੌਕੇ ਉੱਤੇ ਹੀ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਮਾਮੂਲੀ ਸੱਟਾਂ ਨਾਲ ਮਿਨੀਵੈਨ ਦੀ ਮਹਿਲਾ ਡਰਾਈਵਰ ਨੂੰ ਹਸਪਤਾਲ ਲਿਜਾਇਆ ਗਿਆ। ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ ਤੇ ਇਹ ਪਤਾ ਲਾਉਣ ਦੀ ਕੋਸਿ਼ਸ਼ ਕੀਤੀ ਜਾ ਰਹੀ ਹੈ ਕਿ ਰੈੱਡ ਲਾਈਟ ਕਿਹੜੀ ਗੱਡੀ ਨੇ ਟੱਪੀ।
ਜਾਂਚ ਤੇ ਸਾਫ-ਸਫਾਈ ਲਈ ਇਸ ਇੰਟਰਸੈਕਸ਼ਨ ਨੂੰ ਬੰਦ ਕਰ ਦਿੱਤਾ ਗਿਆ ਹੈ ਤੇ ਇਸ ਦੇ ਕਈ ਘੰਟਿਆਂ ਤੱਕ ਬੰਦ ਰਹਿਣ ਦੀ ਸੰਭਾਵਨਾ ਹੈ।