ਓਨਟਾਰੀਓ, 21 ਮਈ (ਪੋਸਟ ਬਿਊਰੋ) : ਬਰੈਂਪਟਨ, ਵਾਅਨ ਤੇ ਬੈਰੀ ਸਮੇਤ ਕਈ ਹੋਰਨਾਂ ਥਾਂਵਾਂ ਉੱਤੇ ਨਸਿ਼ਆਂ ਦੀ ਸਮਗਲਿੰਗ ਸਬੰਧੀ ਕੀਤੀ ਗਈ ਜਾਂਚ ਮਗਰੋਂ ਦੋ ਵਿਅਕਤੀਆਂ ਨੂੰ ਚਾਰਜ ਕੀਤਾ ਗਿਆ ਹੈ।
ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ (ਓਪੀਪੀ) ਦੀ ਕੇਲਡਨ ਡਿਟੈਚਮੈਂਟ ਵੱਲੋਂ ਇਸ ਸਾਲ ਦੇ ਸ਼ੁਰੂ ਵਿੱਚ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕੀਤੀ ਗਈ ਸੀ। ਬੁੱਧਵਾਰ ਨੂੰ ਕੇਲਡਨ ਓਪੀਪੀ ਦੀ ਕਮਿਊਨਿਟੀ ਸਟਰੀਟ ਕ੍ਰਾਈਮ ਯੂਨਿਟ ਨੇ ਪੀਲ ਤੇ ਬੈਰੀ ਪੁਲਿਸ ਨਾਲ ਰਲ ਕੇ ਸਰਚ ਵਾਰੰਟ ਕਢਵਾ ਕੇ ਛਾਪੇ ਮਾਰੇ। ਪੁਲਿਸ ਨੇ ਦੱਸਿਆ ਕਿ ਇਸ ਦੌਰਾਨ ਉਨ੍ਹਾਂ ਨੂੰ ਵੱਡੀ ਮਾਤਰਾ ਵਿੱਚ ਪਰਪਲ ਫੈਂਟਾਨਿਲ, ਕੋਕੇਨ,ਪਰਕੋਸੈਟ ਪਿੱਲਜ਼, ਸੈਮੀ ਆਟੋਮੈਟਿਕ ਪਿਸਟਲ, ਪਿਸਟਲ ਮੈਗਜ਼ੀਨ ਤੇ ਵੱਡੀ ਮਾਤਰਾ ਵਿੱਚ ਕੈਨੇਡੀਅਨ ਡਾਲਰ ਬਰਾਮਦ ਹੋਏ ਹਨ।
ਇਸ ਦੌਰਾਨ ਬਰੈਂਪਟਨ ਵਾਸੀ 28 ਸਾਲਾ ਜੋਇਲ ਕਲਾਰਕ ਤੇ ਵੁੱਡਬ੍ਰਿੱਜ ਦੀ 26 ਸਾਲਾ ਬਿਆਂਕਾ ਬ੍ਰਾਊਨ ਨੂੰ ਚਾਰਜ ਕੀਤਾ ਗਿਆ ਹੈ। ਇਨ੍ਹਾਂ ਉੱਤੇ ਸਮਗਲਿੰਗ ਦੇ ਇਰਾਦੇ ਨਾਲ ਫੈਂਟਾਨਿਲ ਰੱਖਣ, ਪਾਬੰਦੀਸ਼ੁਦਾ ਹਥਿਆਰ ਰੱਖਣ, ਸਮਗਲ ਕਰਨ ਲਈ ਪਰਕੋਸੈਂਟ ਪਿੱਲਜ਼ ਰੱਖਣ ਤੇ ਜੁਰਮ ਨਾਲ ਹਾਸਲ ਕੀਤੀ ਗਈ 5000 ਡਾਲਰ ਤੋਂ ਵੱਧ ਦੀ ਸੰਪਤੀ ਰੱਖਣ ਦੇ ਚਾਰਜਿਜ਼ ਲਾਏ ਗਏ ਹਨ।