ਓਨਟਾਰੀਓ, 18 ਮਈ (ਪੋਸਟ ਬਿਊਰੋ) : ਫੋਰਡ ਸਰਕਾਰ ਵੱਲੋ ਪੀਲ ਰੀਜਨ ਨੂੰ ਭੰਗ ਕਰਨ ਦਾ ਐਲਾਨ ਆਖਿਰਕਾਰ ਕਰ ਹੀ ਦਿੱਤਾ ਗਿਆ। ਇਸ ਦੀ ਤਿਆਰੀ ਕਈ ਦਿਨਾਂ ਤੋਂ ਚੱਲ ਰਹੀ ਸੀ। ਹੁਣ 2025 ਤੱਕ ਮਿਸੀਸਾਗਾ, ਬਰੈਂਪਟਨ ਤੇ ਕੇਲਡਨ ਆਜ਼ਾਦ ਸਿਟੀਜ਼ ਬਣ ਜਾਣਗੇ।
ਮਿਊਂਸਪਲ ਅਫੇਅਰਜ਼ ਤੇ ਹਾਊਸਿੰਗ ਮੰਤਰੀ ਸਟੀਵ ਕਲਾਰਕ ਵੱਲੋਂ ਵੀਰਵਾਰ ਦੁਪਹਿਰ ਨੂੰ ਕੁਈਨਜ਼ ਪਾਰਕ ਵਿਖੇ ਇਸ ਸਬੰਧ ਵਿੱਚ ਬਿੱਲ ਪੇਸ਼ ਕੀਤਾ ਗਿਆ, ਜਿਸ ਨੂੰ ਹੇਜ਼ਲ ਮੈਕੈਲੀਅਨ ਐਕਟ ਦਾ ਨਾਂ ਦਿੱਤਾ ਗਿਆ।ਇਹ ਬਿੱਲ ਮਿਸੀਸਾਗਾ ਦੀ ਮਰਹੂਮ ਮੇਅਰ ਦੇ ਨਾਂ ਉੱਤੇ ਇਸ ਲਈ ਰੱਖਿਆ ਗਿਆ ਕਿਉਂਕਿ ਉਨ੍ਹਾਂ ਨੇ ਹੀ ਸਿਟੀ ਨੂੰ ਵੱਖ ਕਰਨ ਦੀ ਲੜਾਈ ਸੁ਼ਰੂ ਕੀਤੀ ਸੀ।ਇਸ ਬਿੱਲ ਨਾਲ ਸਰਕਾਰ ਇਹ ਯਕੀਨੀ ਬਣਾ ਸਕੇਗੀ ਕਿ ਸਿਟੀਜ਼ ਨੂੰ ਵੱਖ ਕਰਨ ਦੀ ਪ੍ਰਕਿਰਿਆ ਜਾਇਜ਼ ਤੇ ਸੰਤੁਲਿਤ ਹੈ। ਇਸ ਕੰਮ ਲਈ ਟਰਾਂਜ਼ੀਸ਼ਨ ਬੋਰਡ ਵੀ ਕਾਇਮ ਕੀਤਾ ਜਾਵੇਗਾ।
ਬਰੈਂਪਟਨ ਵੱਲੋਂ ਰੀਜਨ ਲਈ 40 ਫੀ ਸਦੀ ਟੈਕਸ ਰੈਵਨਿਊ ਮੁਹੱਈਆ ਕਰਵਾਇਆ ਜਾਂਦਾ ਹੈ ਜਦਕਿ ਮਿਸੀਸਾਗਾ 45 ਫੀ ਸਦੀ ਟੈਕਸ ਰੈਵਨਿਊ ਮੁਹੱਈਆ ਕਰਵਾਉਂਦਾ ਹੈ। ਇਹ ਰਕਮ ਸਾਂਝੀਆਂ ਸਹੂਲਤਾਂ ਜਿਵੇਂ ਕਿ ਪੁਲਿਸ, ਵਾਟਰ ਟਰੀਟਮੈਂਟ, ਸੜਕਾਂ, ਗਾਰਬੇਜ ਕੁਲੈਕਸ਼ਨ ਤੇ ਹਾਊਸਿੰਗ ਸਪੋਰਟ ਲਈ ਵਰਤੀ ਜਾਂਦੀ ਹੈ।ਇੱਕ ਵਾਰੀ ਇਨ੍ਹਾਂ ਤਿੰਨਾਂ ਸਿਟੀਜ਼ ਦੇ ਆਜ਼ਾਦ ਹੋ ਜਾਣ ਤੋਂ ਬਾਅਦ ਇਹ ਸੇਵਾਵਾਂ ਵੀ ਸਬੰਧਤ ਮਿਊਂਸਪੈਲਿਟੀਜ਼ ਦੀ ਜਿ਼ੰਮੇਵਾਰੀ ਬਣ ਜਾਣਗੀਆਂ। ਵੀਰਵਾਰ ਨੂੰ ਅਧਿਕਾਰੀਆਂ ਨੇ ਇਹ ਗੱਲ ਜ਼ੋਰ ਦੇ ਕੇ ਆਖੀ ਕਿ ਉਨ੍ਹਾਂ ਨੂੰ ਉਮੀਦ ਹੈ ਕਿ ਇਹ ਲੋਕਲ ਸੇਵਾਵਾਂ ਇਸ ਵੱਡੀ ਤਬਦੀਲੀ ਦੌਰਾਨ ਬਿਨਾਂ ਕਿਸੇ ਅੜਿੱਕੇ ਦੇ ਚੱਲਦੀਆਂ ਰਹਿਣਗੀਆਂ।