ਟੋਰਾਂਟੋ, 15 ਮਈ (ਪੋਸਟ ਬਿਊਰੋ) : ਨਵੇਂ ਸਰਵੇਖਣਾਂ ਅਨੁਸਾਰ ਟੋਰਾਂਟੋ ਦੇ ਮੇਅਰ ਦੇ ਅਹੁਦੇ ਦੀ ਦੌੜ ਵਿੱਚ ਓਲੀਵੀਆ ਚਾਓ ਨੇ ਕਾਫੀ ਲੀਡ ਹਾਸਲ ਕਰ ਲਈ ਲੱਗਦੀ ਹੈ। ਦੂਜੇ ਉਮੀਦਵਾਰਾਂ ਨਾਲੋਂ ਉਨ੍ਹਾਂ ਦਾ ਇਹ ਪਾੜਾ ਕਾਫੀ ਵੱਧ ਚੁੱਕਿਆ ਹੈ।ਇਸ ਸਮੇਂ ਚਾਓ ਤੇ ਇਸ ਦੌੜ ਦੇ ਬਾਕੀ ਉਮੀਦਵਾਰ ਇਸ ਅਹੁਦੇ ਲਈ ਅੱਜ ਰਾਤ ਹੋਣ ਵਾਲੀ ਪਹਿਲੀ ਬਹਿਸ ਵਿੱਚ ਹਿੱਸਾ ਲੈਣ ਦੀ ਤਿਆਰੀ ਕਰ ਰਹੇ ਹਨ।
ਸ਼ਨਿੱਚਰਵਾਰ ਨੂੰ ਫੋਰਮ ਰਿਸਰਚ ਵੱਲੋਂ ਕਰਵਾਈ ਗਈ ਪੋਲ ਵਿੱਚ ਸਾਹਮਣੇ ਆਇਆ ਕਿ 36 ਫੀ ਸਦੀ ਤੈਅਸ਼ੁਦਾ ਵੋਟਰਾਂ ਵੱਲੋਂ ਚਾਓ ਦੇ ਸਮਰਥਨ ਵਿੱਚ ਫਤਵਾ ਦੇਣ ਦੀ ਹਮਾਇਤ ਕੀਤੀ ਜਾ ਰਹੀ ਹੈ। ਇਹ ਪਿਛਲੇ ਹਫਤੇ ਦੇ ਅੰਕਾਂ ਨਾਲੋਂ ਤਿੰਨ ਫੀ ਸਦੀ ਵੱਧ ਹੈ। ਇੱਕ ਪ੍ਰੈੱਸ ਰਲੀਜ਼ ਵਿੱਚ ਫੋਰਮ ਰਿਸਰਚ ਨੇ ਆਖਿਆ ਕਿ ਇਹ ਸਰਵੇਖਣ 1029 ਟੋਰਾਂਟੋ ਵਾਸੀਆਂ ਉੱਤੇ ਕੀਤਾ ਗਿਆ। ਪਿਛਲੇ ਵੀਕੈਂਡ ਫੋਰਮ ਵੱਲੋਂ ਕਰਵਾਏ ਗਏ ਸਰਵੇਖਣ ਵਿੱਚ ਚਾਓ ਨੂੰ 14 ਫੀ ਸਦੀ ਤੈਅਸ਼ੁਦਾ ਵੋਟਰਾਂ ਦਾ ਸਾਥ ਹਾਸਲ ਹੋ ਰਿਹਾ ਸੀ ਤੇ ਦੂਜੇ ਸਥਾਨ ਲਈ ਮਾਰਕ ਸਾਂਡਰਸ ਤੇ ਜੋਸ਼ ਮੈਟਲੋਅ ਇੱਕ ਦੂਜੇ ਨੂੰ ਬਰਾਬਰ ਦੀ ਟੱਕਰ ਦੇ ਰਹੇ ਸਨ।
ਇਸ ਤਾਜ਼ਾ ਸਰਵੇਖਣ ਵਿੱਚ ਇਹ ਵੀ ਸਾਹਮਣੇ ਆਇਆ ਹੈ ਕਿ ਸਾਂਡਰਸ ਦੀ ਹੋਰਨਾਂ ਉਮੀਦਵਾਰਾਂ ਨਾਲੋਂ ਕਾਫੀ ਅੱਗੇ ਲੰਘ ਚੁੱਕੇ ਹਨ ਤੇ ਹੁਣ ਸਥਿਤੀ ਕਾਫੀ ਹੱਦ ਤੱਕ ਸਾਫ ਹੁੰਦੀ ਨਜ਼ਰ ਆ ਰਹੀ ਹੈ। ਉਹ ਦੂਜੇ ਸਥਾਨ ਲਈ ਮੁੱਖ ਦਾਅਵੇਦਾਰ ਬਣ ਚੁੱਕੇ ਹਨ।ਮਾਰਕ ਸਾਂਡਰਸ ਦੇ ਸਮਰਥਨ ਵਿੱਚ 18 ਫੀ ਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ ਜਦਕਿ ਜੋਸ਼ ਮੈਟਲੋਅ ਤੇ ਮਿਤਜ਼ੀ ਹੰਟਰ 10 ਫੀ ਸਦੀ ਨਾਲ ਤੀਜੇ ਸਥਾਨ ਉੱਤੇ ਬਣੇ ਹੋਏ ਹਨ।
ਫੋਰਮ ਅਨੁਸਾਰ ਇਹ ਪਾਇਆ ਗਿਆ ਹੈ ਕਿ ਟੋਰਾਂਟੋ ਵਾਸੀਆਂ ਲਈ ਮੁੱਖ ਤੇ ਅਹਿਮ ਮੁੱਦਾ ਕਿਫਾਇਤੀ ਘਰ, ਕੌਸਟ ਆਫ ਲਿਵਿੰਗ ਤੇ ਮਹਿੰਗਾਈ ਬਣੇ ਹੋਏ ਹਨ। ਅੱਜ ਹੋਣ ਵਾਲੀ ਬਹਿਸ ਡੇਲੀ ਬ੍ਰੈੱਡ ਫੂਡ ਬੈਂਕ ਵੱਲੋਂ ਹੋਸਟ ਕੀਤੀ ਜਾਵੇਗੀ। ਇਸ ਬਹਿਸ ਵਿੱਚ ਚਾਓ, ਸਾਂਡਰਸ, ਮੈਟਲੋਅ, ਹੰਟਰ, ਬਾਇਲਾਓ ਤੇ ਬ੍ਰੈਡਫੋਰਡ ਨੂੰ ਹਿੱਸਾ ਲੈਣ ਦਾ ਸੱਦਾ ਦਿੱਤਾ ਗਿਆ ਹੈ ਪਰ ਸਾਂਡਰਸ ਵੱਲੋਂ ਇਸ ਸੱਦੇ ਨੂੰ ਠੁਕਰਾ ਦਿੱਤਾ ਗਿਆ ਹੈ। ਇਹ ਬਹਿਸ ਇਟੋਬੀਕੋ ਵਿੱਚ ਰਾਤੀਂ 7:00 ਵਜੇ ਤੋਂ 9:00 ਵਜੇ ਤੱਕ ਡੇਲੀ ਬ੍ਰੈੱਡ ਫੂਡ ਬੈਕ ਵਿਖੇ ਹੋਵੇਗੀ।