ਹੈਮਿਲਟਨ, 16 ਮਾਰਚ (ਪੋਸਟ ਬਿਊਰੋ) : ਐਂਡਰੀਆ ਹੌਰਵਥ ਦੀ ਥਾਂ ਉੱਤੇ ਆਪਣਾ ਨਵਾਂ ਪ੍ਰੋਵਿੰਸ਼ੀਅਲ ਨੁਮਾਇੰਦਾ ਚੁਣਨ ਲਈ ਹੈਮਿਲਟਨ ਸੈਂਟਰ ਦੇ ਵਾਸੀ ਅੱਜ ਜਿ਼ਮਨੀ ਚੋਣਾਂ ਵਿੱਚ ਹਿੱਸਾ ਲੈਣਗੇ।
ਹੈਮਿਲਟਨ ਸੈਂਟਰ ਤੋਂ ਓਨਟਾਰੀਓ ਦੀ ਸਾਬਕਾ ਐਨਡੀਪੀ ਆਗੂ ਐਂਡਰੀਆ ਹੌਰਵਥ 2004 ਤੋਂ ਹੀ ਇਸ ਸੀਟ ਉੱਤੇ ਕਾਬਜ ਸੀ ਤੇ ਹਮੇਸ਼ਾਂ ਵੱਡੇ ਫਰਕ ਨਾਲ ਜਿੱਤਦੀ ਵੀ ਰਹੀ।ਪਰ ਪਿਛਲੇ ਸਾਲ ਪਾਰਟੀ ਨੂੰ ਚੋਣਾਂ ਵਿੱਚ ਮਿਲੀ ਹਾਰ ਤੋਂ ਬਾਅਦ ਹੌਰਵਥ ਨੇ ਲੀਡਰ ਵਜੋਂ ਆਪਣੇ ਅਹੁਦੇ ਤੋਂ ਕਿਨਾਰਾ ਕਰ ਲਿਆ ਤੇ ਆਪਣੀ ਸੀਟ ਤੋਂ ਅਸਤੀਫਾ ਦੇ ਦਿੱਤਾ। ਅੱਜ ਹੋਣ ਜਾ ਰਹੀਆਂ ਜਿ਼ਮਨੀ ਚੋਣਾਂ ਵਿੱਚ ਐਨਡੀਪੀ ਉਮੀਦਵਾਰ ਦੇ ਜਿੱਤਣ ਦੀ ਸੰਭਾਵਨਾ ਹੈ।
ਸਾਰਾਹ ਜਾਮਾ ਓਨਟਾਰੀਓ ਦੇ ਡਿਸਐਬਿਲਿਟੀ ਜਸਟਿਸ ਨੈੱਟਵਰਕ ਦੀ ਐਗਜ਼ੈਕਟਿਵ ਡਾਇਰੈਕਟਰ ਤੇ ਸਹਿ-ਬਾਨੀ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਹੈਮਿਲਟਨ ਐਨਕੈਂਪਮੈਂਟ ਸਪੋਰਟ ਨੈੱਟਵਰਕ ਦੀ ਸਥਾਪਨਾ ਵਿੱਚ ਵੀ ਅਹਿਮ ਭੂਮਿਕਾ ਨਿਭਾਈ ਹੈ ਤੇ ਇਸ ਦੀ ਵੀ ਉਹ ਸਹਿ-ਬਾਨੀ ਹੈ। ਇਸ ਦੇ ਨਾਲ ਹੀ ਉਹ ਕਮਿਊਨਿਟੀ ਦੇ ਕੰਮਾਂ ਵਿੱਚ ਵੀ ਵੱਧ ਚੜ੍ਹ ਕੇ ਹਿੱਸਾ ਲੈਂਦੀ ਰਹਿੰਦੀ ਹੈ।
ਇਸ ਸੀਟ ਤੋਂ ਲਿਬਰਲ ਉਮੀਦਵਾਰ ਡੇਅਰਡਰੇ ਪਾਈਕ ਵੀ ਆਪਣੀ ਜਿੱਤ ਦੀ ਆਸ ਲਾਈ ਬੈਠੇ ਹਨ। ਉਹ 2018 ਵਿੱਚ ਇਸ ਹਲਕੇ ਤੋਂ ਖੜ੍ਹੇ ਹੋਏ ਸਨ ਤੇ ਉਨ੍ਹਾਂ ਨੂੰ ਆਸ ਹੈ ਕਿ ਹੌਰਵਥ ਦੇ ਇਸ ਸੀਟ ਤੋਂ ਨਾ ਲੜਨ ਨਾਲ ਮੁਕਾਬਲਾ ਕਾਫੀ ਟੱਕਰ ਦਾ ਹੋ ਗਿਆ ਹੈ। ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਉਮੀਦਵਾਰ ਪੀਟਰ ਵੇਜ਼ਨਰ, ਗ੍ਰੀਨ ਪਾਰਟੀ ਦੀ ਉਮੀਦਵਾਰ ਲੁਸੀਆ ਲੈਨਾਨਤੁਓਨੋ ਤੇ ਛੇ ਹੋਰ ਉਮੀਦਵਾਰ ਵੀ ਇਸ ਸੀਟ ਲਈ ਮੈਦਾਨ ਵਿੱਚ ਹਨ।