ਟੋਰਾਂਟੋ, 21 ਸਤੰਬਰ (ਪੋਸਟ ਬਿਊਰੋ) : ਇੱਕ ਨਵੇਂ ਅਧਿਐਨ ਵਿੱਚ ਸਾਹਮਣੇ ਆਇਆ ਹੈ ਕਿ ਪੂਰੇ ਨੌਰਥ ਅਮਰੀਕਾ ਵਿੱਚ ਬੱਚਿਆਂ ਦੀਆਂ ਸਕੂਲ ਯੂਨੀਫੌਰਮਜ਼ ਤੇ ਹੋਰ ਕੱਪੜਿਆਂ ਵਿੱਚ ਜ਼ਹਿਰੀਲਾ ਕੈਮੀਕਲ ਪਾਇਆ ਗਿਆ ਹੈ।ਇਹ ਕੈਮੀਕਲ ਬੱਚਿਆਂ ਦੀਆਂ ਸਕੂਲ ਯੂਨੀਫੌਰਮਜ਼ ਨੂੰ ਦਾਗ ਧੱਬਿਆਂ ਤੋਂ ਬਚਾਉਣ ਲਈ ਕੱਪੜਿਆਂ ਵਿੱਚ ਪਾਇਆ ਜਾਂਦਾ ਹੈ। ਇੱਕ ਅਧਿਐਨਕਰਤਾ ਨੇ ਆਖਿਆ ਕਿ ਬੱਚਿਆ ਦੀ ਸਿਹਤ ਨੂੰ ਛਿੱਕੇ ਟੰਗ ਕੇ ਕਾਰੋਬਾਰ ਚਮਕਾਇਆ ਜਾ ਰਿਹਾ ਹੈ।
ਯੂਨੀਵਰਸਿਟੀ ਆਫ ਟੋਰਾਂਟੋ ਦੀ ਐਨਵਾਇਰਮੈਂਟਲ ਸਾਇੰਸਿਜ਼ ਪੋ੍ਰਫੈਸਰ ਮਿਰੀਅਮ ਡਾਇਮੰਡ ਨੇ ਆਖਿਆ ਕਿ ਬੱਚਿਆਂ ਦੀ ਸਿਹਤ ਦਾ ਧਿਆਨ ਰੱਖਿਆ ਜਾਣਾ ਇਸ ਨਾਲੋਂ ਕਿਤੇ ਜ਼ਰੂਰੀ ਹੈ ਕਿ ਉਨ੍ਹਾਂ ਦੇ ਕੱਪੜੇ ਦਾਗ ਮੁਕਤ ਰਹਿਣ। ਐਨਵਾਇਰਮੈਂਟਲ ਐਂਡ ਸਾਇੰਸ ਟੈਕਨੋਲਾਜੀ ਜਰਨਲ ਵਿੱਚ ਛਪੇ ਇਸ ਅਧਿਐਨ ਵਿੱਚ ਡਾਇਮੰਡ ਤੇ ਨੌਰਥ ਅਮਰੀਕਾ ਦੇ ਹੋਰਨਾਂ ਖੋਜਾਰਥੀਆਂ ਨੇ ਬੱਚਿਆਂ ਦੀਆਂ ਸਕੂਲ ਯੂਨੀਫੌਰਮਜ਼ ਤੇ ਹੋਰਨਾਂ ਕੱਪੜਿਆਂ ਵਿੱਚ ਪੌਲੀਫਲੂਓਰੋਆਕਿਲ ਸਬਸਟਾਂਸਿਜ਼ (ਪੀਐਫਏਐਸ) ਦੀ ਵੱਡੀ ਮਾਤਰਾ ਪਾਈ। ਇਨ੍ਹਾਂ ਨੂੰ ਫੌਰੈਵਰ ਕੈਮੀਕਲਜ਼ ਵੀ ਆਖਿਆ ਜਾਂਦਾ ਹੈ। ਇਸ ਕੈਮੀਕਲ ਦੀ ਵਰਤੋਂ ਬੱਚਿਆਂ ਦੀਆਂ ਸਕੂਲ ਯੂਨੀਫੌਰਮਜ਼ ਤੋਂ ਇਲਾਵਾ ਸਨੋਅ ਸੂਟਸ, ਮਿਟਨਜ਼, ਬਿੱਬਾਂ ਤੇ ਹੈਟਜ਼ ਵਿੱਚ ਹੁੰਦੀ ਹੈ ਤੇ ਇਹ ਕੱਪੜੇ ਕੈਨੇਡਾ ਤੇ ਅਮਰੀਕਾ ਵਿੱਚ ਵੱਡੀ ਪੱਧਰ ਉੱਤੇ ਵਿਕਦੇ ਹਨ।
ਇਹ ਵੀ ਆਖਿਆ ਗਿਆ ਕਿ ਇਨ੍ਹਾਂ ਕੈਮੀਕਲਜ਼ ਨੂੰ ਟੁੱਟਣ ਤੇ ਖ਼ਤਮ ਹੋਣ ਵਿੱਚ ਕਈ ਸਾਲ ਲੱਗ ਜਾਂਦੇ ਹਨ ਤੇ ਇਹ ਮਿੱਟੀ ਤੇ ਪਾਣੀ ਨੂੰ ਗੰਧਲਾ ਕਰਕੇ ਐਨਵਾਇਰਮੈਂਟ ਨੂੰ ਪ੍ਰਦੂਸਿ਼ਤ ਕਰਦੇ ਹਨ। ਜੇ ਇਨਸਾਨ ਵੱਲੋਂ ਇਸ ਨੂੰ ਖਾ ਲਿਆ ਜਾਂਦਾ ਹੈ ਤਾਂ ਉਹ ਉਸ ਲਈ ਜ਼ਹਿਰੀਲਾ ਸਾਬਤ ਹੋ ਸਕਦਾ ਹੈ।
ਅਧਿਐਨ ਵਿੱਚ ਪਾਇਆ ਗਿਆ ਕਿ ਵੱਖ ਵੱਖ ਤਰ੍ਹਾਂ ਦੇ 72 ਉਤਪਾਦਾਂ ਦੀ ਕੀਤੀ ਗਈ ਜਾਂਚ ਵਿੱਚ ਇਹ ਕੈਮੀਕਲ 65 ਫੀ ਸਦੀ ਪਾਇਆ ਗਿਆ ਜਦਕਿ ਸਕੂਲ ਯੂਨੀਫੌਰਮਜ਼, ਜੋ ਕਿ 100 ਫੀ ਸਦੀ ਕੌਟਨ ਤੋਂ ਬਣੀਆਂ ਹੁੰਦੀਆਂ ਹਨ ਤੇ ਉਨ੍ਹਾਂ ਵਿੱਚ ਮਾਮੂਲੀ ਸਿੰਥੈਟਿਕ ਵੀ ਪਾਇਆ ਜਾਂਦਾ ਹੈ, ਵਿੱਚ ਇਸ ਕੈਮੀਕਲ ਦੀ ਮਾਤਰਾ ਸੱਭ ਤੋਂ ਵੱਧ ਪਾਈ ਗਈ।