ਟੋਰਾਂਟੋ, 17 ਅਕਤੂਬਰ (ਪੋਸਟ ਬਿਊਰੋ): ਇੱਕ ਓਂਟਾਰੀਓ ਮੋਟਰਸਾਈਕਲ ਚਾਲਕ `ਤੇ ਤਿੰਨ ਦਰਜਨ ਤੋਂ ਜਿ਼ਆਦਾ ਚਾਰਜਿਜ਼ ਲਗਾਏ ਗਏ ਹਨ। ਪੁਲਿਸ ਦੱਸਿਆ ਕਿ ਉਸਨੇ ਗਰੇਟਰ ਟੋਰਾਂਟੋ ਏਰੀਏ ਵਿੱਚ ਰਾਜਮਾਰਗਾਂ `ਤੇ 250 ਕਿ.ਮੀ. ਪ੍ਰਤੀ ਘੰਟਾ ਤੋਂ ਜਿ਼ਆਦਾ ਦੀ ਰਫ਼ਤਾਰ ਨਾਲ ਮੋਟਰਸਾਈਕਲ ਚਲਾਉਂਦੇ ਹੋਏ ਖੁਦ ਦਾ ਖਤਰਨਾਕ ਵੀਡੀਓ ਬਣਾਇਆ ਹੈ। ਪੀਲ ਪੁਲਿਸ ਨੇ ਯਾਰਕ ਪੁਲਿਸ ਨਾਲ ਪ੍ਰੋਜੈਕਟ ਸਪਲਿਟਿੰਗ ਈਗਲ ਨਾਮਕ ਸੰਯੁਕਤ ਜਾਂਚ ਤੋਂ ਬਾਅਦ ਚਾਰਜਿਜ਼ ਲਗਾਏ ਹਨ।

ਪੁਲਿਸ ਵੱਲੋਂ ਲਾਪਰਵਾਹੀ ਦੇ ਕਲਿੱਪ ਜਾਰੀ ਕੀਤੇ ਗਏ, ਜਿਸ ਵਿੱਚ ਚਾਲਕ ਨੂੰ ਲਾਲ ਬੱਤੀ ਪਾਰ ਕਰਦੇ, ਕਾਰਾਂ ਵਿੱਚਕਾਰੋਂ ਗੁਜਰਦੇ ਅਤੇ ਤੇਜ਼ ਰਫ਼ਤਾਰ ਨਾਲ ਭੱਜਦੇ ਹੋਏ ਵਿਖਾਇਆ ਗਿਆ।
ਪੁਲਿਸ ਅਧਿਕਾਰੀ ਖਟੜਾ ਨੇ ਕਿਹਾ ਕਿ ਇਹ ਫੁਟੇਜ ਆਨਲਾਈਨ ਪੋਸਟ ਕੀਤੇ ਜਾਣ ਕਾਰਨ ਹੀ ਚਾਲਕ ਦੀ ਪਹਿਚਾਣ ਬੋਲਟਨ, ਓਂਟਾਰੀਓ ਨਿਵਾਸੀ ਗਰੇਗਰੀ ਹੈਰਿੰਗਟਨ ਦੇ ਰੂਪ ਵਿੱਚ ਕੀਤੀ ਜਾ ਸਕੀ ਹੈ।
40 ਸਾਲਾ ਮੋਟਰਸਾਰੀਕਲ ਚਾਲਕ `ਤੇ ਵਾਹਨ ਦੇ ਖਤਰਨਾਕ ਸੰਚਾਲਨ ਅਤੇ ਸਟੰਟ ਡਰਾਈਵਿੰਗ ਦੇ ਪੰਜ-ਪੰਜ ਮਾਮਲਿਆਂ ਦੇ ਨਾਲ-ਨਾਲ ਤੇਜ਼ ਰਫ਼ਤਾਰ ਨਾਲ ਵਾਹਨ ਚਲਾਉਣ ਦੇ ਚਾਰ ਅਤੇ ਰੇਸਿੰਗ ਦੇ ਇੱਕ ਮਾਮਲੇ ਵਿੱਚ ਚਾਰਜਿਜ਼ ਲਗਾਏ ਗਏ। ਜਾਂਚ ਤੋਂ ਬਾਅਦ ਹੈਰਿੰਗਟਨ ਦਾ ਲਾਈਸੈਂਸ ਮੁਅੱਤਲ ਕਰ ਦਿੱਤਾ ਗਿਆ ਅਤੇ ਉਸਦੀ ਯਾਮਾਹਾ ਆਰ6 ਮੋਟਰਸਾਈਕਲ ਜ਼ਬਤ ਕਰ ਲਈ ਗਈ।