ਹਨੋਈ, 11 ਅਪ੍ਰੈਲ (ਪੋਸਟ ਬਿਊਰੋ): ਵੀਅਤਨਾਮ ਦੀ ਪ੍ਰਾਪਰਟੀ ਟਾਈਕੂਨ ਟਰੂਆਂਗ ਮਾਇ ਲੈਨ ਨੂੰ ਮੌਤ ਦੀ ਸਜ਼ਾ ਸੁਣਾਈ ਗਈ ਹੈ। ਉਸ 'ਤੇ 11 ਸਾਲਾਂ 'ਚ ਸਾਈਗਨ ਕਮਰਸ਼ੀਅਲ ਬੈਂਕ (ਐੱਸ.ਸੀ.ਬੀ.) ਨੂੰ 1 ਲੱਖ ਕਰੋੜ ਰੁਪਏ ਦੀ ਧੋਖਾਧੜੀ ਕਰਨ ਦਾ ਦੋਸ਼ ਹੈ। ਲੈਨ ਪ੍ਰਾਪਰਟੀ ਡਿਵੈਲਪਰ ਕੰਪਨੀ 'ਵਾਨ ਥਿੰਹ ਫੈਟ' ਦੀ ਚੇਅਰਵੂਮੈਨ ਹੈ। ਉਸ ਨੂੰ 2022 ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਧੋਖਾਧੜੀ ਦੇ ਨਾਲ-ਨਾਲ ਉਸ 'ਤੇ ਬੈਂਕਿੰਗ ਨਿਯਮਾਂ ਦੀ ਉਲੰਘਣਾ ਅਤੇ ਰਿਸ਼ਵਤਖੋਰੀ ਦਾ ਵੀ ਦੋਸ਼ ਹੈ।
ਬ੍ਰਿਟਿਸ਼ ਮੀਡੀਆ ਦਿ ਗਾਰਡੀਅਨ ਮੁਤਾਬਕ ਲੈਨ ਤੋਂ ਇਲਾਵਾ 85 ਹੋਰ ਲੋਕਾਂ ਨੂੰ ਜੇਲ ਦੀ ਸਜ਼ਾ ਸੁਣਾਈ ਗਈ ਹੈ। ਇਨ੍ਹਾਂ ਵਿਚ ਸਾਬਕਾ ਕੇਂਦਰੀ ਬੈਂਕਰ, ਸਾਬਕਾ ਸਰਕਾਰੀ ਅਧਿਕਾਰੀ ਅਤੇ ਕੁਝ ਸਾਬਕਾ ਐੱਸਸੀਬੀ ਅਧਿਕਾਰੀ ਸ਼ਾਮਿਲ ਹਨ। ਇਸ ਮਾਮਲੇ ਦੀ ਸੁਣਵਾਈ 5 ਹਫ਼ਤਿਆਂ ਤੋਂ ਚੱਲ ਰਹੀ ਸੀ। ਲੈਨ ਖਿਲਾਫ ਕੇਸ ਲੜ ਰਹੇ ਵਕੀਲਾਂ ਨੇ ਅਦਾਲਤ ਤੋਂ ਸਖਤ ਕਾਰਵਾਈ ਦੇ ਨਾਲ-ਨਾਲ ਲੈਨ ਨੂੰ ਮੌਤ ਦੀ ਸਜ਼ਾ ਦੇਣ ਦੀ ਮੰਗ ਕੀਤੀ ਸੀ।
2012 ਤੋਂ 2022 ਤੱਕ, ਪ੍ਰਾਪਰਟੀ ਟਾਈਕੂਨ ਟਰੂਆਂਗ ਮਾਇ ਲੈਨ ਨੇ ਆਪਣੀ ਕੰਪਨੀ ਨੂੰ ਲਾਭ ਪਹੁੰਚਾਉਣ ਲਈ ਸਾਈਗਨ ਕਮਰਸ਼ੀਅਲ ਬੈਂਕ ਤੋਂ ਗੈਰ-ਕਾਨੂੰਨੀ ਤੌਰ 'ਤੇ ਲੋਨ ਪ੍ਰਾਪਤ ਕਰਨ ਲਈ ਆਪਣੀ ਸ਼ਕਤੀ ਦੀ ਵਰਤੋਂ ਕੀਤੀ। ਕੁਝ ਪੈਸੇ ਆਪਣੇ ਕੋਲ ਰੱਖੇ ਅਤੇ ਧੋਖਾਧੜੀ 'ਤੇ ਪਰਦਾ ਪਾਉਣ ਲਈ ਆਡਿਟ ਅਧਿਕਾਰੀਆਂ ਨੂੰ ਰਿਸ਼ਵਤ ਦਿੱਤੀ। ਇਸ ਕਾਰਣ ਬੈਂਕ ਨੂੰ ਭਾਰੀ ਨੁਕਸਾਨ ਹੋਇਆ ਹੈ।
ਵੀਅਤਨਾਮੀ ਮੀਡੀਆ 'ਵੀਐਨ ਐਕਸਪ੍ਰੈੱਸ ਇੰਟਰਨੈਸ਼ਨਲ' ਅਨੁਸਾਰ, 2012 ਤੋਂ 2022 ਤੱਕ, ਲੈਨ ਅਤੇ ਉਸਦੇ ਸਾਥੀਆਂ ਨੇ ਇਸ ਸਮੇਂ ਦੌਰਾਨ 3.66 ਲੱਖ ਕਰੋੜ ਰੁਪਏ ਤੋਂ ਵੱਧ ਦੇ 2,500 ਕਰਜ਼ੇ ਲਏ, ਜੋਕਿ ਸਾਈਗਨ ਕਮਰਸ਼ੀਅਲ ਬੈਂਕ (ਐੱਸਸੀਬੀ) ਦੇ ਕੁੱਲ ਕਰਜਿ਼ਆਂ ਦਾ 93% ਸੀ। ਲੈਨ 'ਤੇ ਬੈਂਕ ਨੂੰ 2.25 ਲੱਖ ਕਰੋੜ ਰੁਪਏ ਦਾ ਨੁਕਸਾਨ ਪਹੁੰਚਾਉਣ ਦਾ ਵੀ ਦੋਸ਼ ਹੈ।