ਫਰੈਂਕਫਰਟ, ਜਰਮਨੀ, 4 ਜੂਨ (ਪੋਸਟ ਬਿਊਰੋ) : ਦੁਨੀਆ ਭਰ ਵਿੱਚ ਸਪਲਾਈ ਕੀਤੇ ਜਾਣ ਵਾਲੇ ਤੇਲ ਵਿੱਚ ਸਾਊਦੀ ਅਰਬ ਕਟੌਤੀ ਕਰੇਗਾ।ਇਸ ਨਾਲ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋਵੇਗਾ।
ਸਾਊਦੀ ਅਰਬ ਜੁਲਾਈ ਤੋਂ ਸ਼ੁਰੂ ਕਰਕੇ ਰੋਜ਼ਾਨਾ ਤੇਲ ਦੀ ਸਪਲਾਈ ਵਿੱਚ ਇੱਕ ਮਿਲੀਅਨ ਬੈਰਲ ਦੀ ਕਟੌਤੀ ਕਰੇਗਾ। ਇਸ ਤੋਂ ਪਹਿਲਾਂ ਵਿਏਨਾ ਵਿੱਚ ਹੋਈ ਮੀਟਿੰਗ ਵਿੱਚ ਓਪੇਕ ਤੇ ਭਾਈਵਾਲ ਮੁਲਕ ਤੇਲ ਦੇ ਉਤਪਾਦਨ ਵਿੱਚ ਕਟੌਤੀ ਲਈ ਰਾਜ਼ੀ ਹੋਏ ਸਨ।ਇੱਕ ਨਿਊਜ਼ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਸਾਊਦੀ ਅਰਬ ਦੇ ਐਨਰਜੀ ਮੰਤਰੀ ਅਬਦੁਲਅਜ਼ੀਜ਼ ਬਿਨ ਸਲਮਾਨ ਨੇ ਆਖਿਆ ਕਿ ਇਸ ਕਟੌਤੀ ਵਿੱਚ ਵਾਧਾ ਵੀ ਕੀਤਾ ਜਾ ਸਕਦਾ ਹੈ ਤੇ ਮਾਰਕਿਟ ਵਿੱਚ ਸਥਿਰਤਾ ਲਿਆਉਣ ਲਈ ਇਸ ਗਰੁੱਪ ਵੱਲੋਂ ਜੋ ਬਣ ਸਕੇਗਾ ਉਹ ਕਰੇਗਾ।
ਰਾਇਸਟੈਡ ਐਨਰਜੀ ਵਿਖੇ ਆਇਲ ਮਾਰਕਿਟਸ ਰਿਸਰਚ ਦੇ ਸੀਨੀਅਰ ਵਾਈਸ ਪ੍ਰੈਜ਼ੀਡੈਂਟ ਜੌਰਜ ਲਿਓਨ ਨੇ ਆਖਿਆ ਕਿ ਇਨ੍ਹਾਂ ਨਵੀਆਂ ਕਟੌਤੀਆਂ ਨਾਲ ਤੇਲ ਦੀਆਂ ਕੀਮਤਾਂ ਵਿੱਚ ਕੁੱਝ ਸਮੇਂ ਲਈ ਵਾਧਾ ਹੋਵੇਗਾ ਪਰ ਉਸ ਤੋਂ ਬਾਅਦ ਇਸਦਾ ਕੀ ਅਸਰ ਹੋਵੇਗਾ ਇਹ ਤਾਂ ਸਾਊਦੀ ਅਰਬ ਉੱਤੇ ਹੀ ਨਿਰਭਰ ਕਰੇਗਾ। ਉਨ੍ਹਾਂ ਆਖਿਆ ਕਿ ਕੁੱਝ ਸਮਾਂ ਪਹਿਲਾਂ ਸਾਊਦੀ ਅਰਬ ਦੇ ਇਸ ਤਰ੍ਹਾਂ ਦੇ ਕਦਮ ਨਾਲ ਅਮਰੀਕੀ ਡਰਾਈਵਰਾਂ ਨੂੰ ਸਸਤੇ ਭਾਅ ਆਪਣੀਆਂ ਗੱਡੀਆਂ ਭਰਨ ਦਾ ਮੌਕਾ ਮਿਲਿਆ ਤੇ ਦੁਨੀਆ ਭਰ ਦੇ ਖਪਤਕਾਰਾਂ ਨੂੰ ਵੀ ਮਹਿੰਗਾਈ ਤੋਂ ਥੋੜ੍ਹੀ ਰਾਹਤ ਮਿਲੀ ਸੀ। ਉਨ੍ਹਾਂ ਆਖਿਆ ਕਿ ਪਰ ਹੁਣ ਇਸ ਕਦਮ ਨਾਲ ਗੈਸ ਸਸਤੀ ਨਹੀਂ ਹੋਣ ਵਾਲੀ ਸਗੋਂ ਤੇਲ ਮਾਮੂਲੀ ਮਹਿੰਗਾ ਹੋਵੇਗਾ।