ਕੀਵ, 31 ਮਾਰਚ (ਪੋਸਟ ਬਿਊਰੋ): ਰੂਸ ਅਤੇ ਯੂਕਰੇਨ ਵਿੱਚ ਜੰਗ ਨੂੰ 13 ਮਹੀਨਿਆਂ ਤੋਂ ਵੱਧ ਸਮਾਂ ਹੋ ਗਿਆ ਹੈ। ਇਸ ਯੁੱਧ ਦੇ ਦੌਰਾਨ ਰੂਸੀ ਸੈਨਿਕਾਂ ਬਾਰੇ ਇਹ ਦਾਅਵਾ ਕੀਤਾ ਗਿਆ ਹੈ ਕਿ ਉਹ ਸ਼ਰਾਬ ਦੇ ਨਸ਼ੇ ਵਿੱਚ ਰਹਿੰਦੇ ਹਨ। ਇਕ ਬ੍ਰਿਿਟਸ਼ ਅਖਬਾਰ ਨੇ ਆਪਣੀ ਰਿਪੋਰਟ 'ਚ ਦਾਅਵਾ ਕੀਤਾ ਹੈ ਕਿ ਰੂਸ ਦੀ ਥਰਡ ਆਰਮੀ ਕੋਰ ਦੇ ਜਵਾਨ ਅਕਸਰ ਸ਼ਰਾਬ ਪੀਂਦੇ ਹਨ।
ਇਸ ਰਿਪੋਰਟ ਵਿੱਚ ਇਹ ਵੀ ਦਾਅਵਾ ਕੀਤਾ ਗਿਆ ਹੈ ਕਿ ਇਹ ਸੈਨਿਕ ਬੇਲਾਰੂਸ ਤੋਂ ਮਾੜੀ ਸਿਖਲਾਈ ਲੈ ਕੇ ਆਏ ਹਨ ਅਤੇ ਲਗਭਗ ਬੇਕਾਰ ਹਥਿਆਰਾਂ ਦੀ ਵਰਤੋਂ ਕਰ ਰਹੇ ਹਨ। ਟੈਲੀਗ੍ਰਾਫ਼ ਨੇ ਯੂਕਰੇਨ ਦੇ ਸੂਤਰਾਂ ਦੇ ਹਵਾਲੇ ਨਾਲ ਇਹ ਦਾਅਵਾ ਕੀਤਾ ਹੈ।
ਪਿਛਲੇ ਸਾਲ 24 ਫਰਵਰੀ ਨੂੰ ਜਦੋਂ ਰੂਸੀ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਨੇ ਯੂਕਰੇਨ ਖਿਲਾਫ ਜੰਗ ਦਾ ਐਲਾਨ ਕੀਤਾ ਸੀ ਤਾਂ ਰੂਸੀ ਫੌਜ ਨੇ ਥਰਡ ਆਰਮੀ ਕੋਰ ਦਾ ਗਠਨ ਕੀਤਾ ਸੀ। ਯੂਕਰੇਨ ਨਾਲ ਜੰਗ ਤੋਂ ਬਾਅਦ ਇਹ ਰੂਸੀ ਫੌਜ ਦੀ ਸਭ ਤੋਂ ਵੱਡੀ ਕੋਰ ਹੈ।
ਇਸ ਦੇ ਨਾਲ ਹੀ ਬ੍ਰਿਿਟਸ਼ ਇੰਟੈਲੀਜੈਂਸ ਦਾ ਕਹਿਣਾ ਹੈ ਕਿ ਅਨੁਸ਼ਾਸਨ ਅਤੇ ਮਨੋਬਲ ਦੀ ਕਮੀ ਕਾਰਨ ਥਰਡ ਆਰਮੀ ਕੋਰ ਨੂੰ ਭਾਰੀ ਨੁਕਸਾਨ ਹੋ ਰਿਹਾ ਹੈ। ਇਸ ਕਾਰਨ ਰੂਸੀ ਫੌਜ ਦੀ 10ਵੀਂ ਟੈਂਕ ਰੈਜੀਮੈਂਟ ਨੇ ਵੀ ਆਪਣੇ ਕਈ ਟੈਂਕ ਗੁਆ ਦਿੱਤੇ ਹਨ।