ਨਿਊ ਯੌਰਕ, 30 ਮਾਰਚ (ਪੋਸਟ ਬਿਊਰੋ) : ਮੈਨਹਟਨ ਗ੍ਰੈਂਡ ਜਿਊਰੀ ਵੱਲੋਂ ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੌਨਲਡ ਟਰੰਪ ਨੂੰ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ। ਇਹ ਜਾਣਕਾਰੀ ਵੀਰਵਾਰ ਨੂੰ ਪ੍ਰੌਸੀਕਿਊਟਰਜ਼ ਤੇ ਡਿਫੈਂਸ ਵਕੀਲਾਂ ਵੱਲੋਂ ਦਿੱਤੀ ਗਈ। ਇਸ ਦੇ ਨਾਲ ਹੀ ਟਰੰਪ ਅਮਰੀਕਾ ਦੇ ਪਹਿਲੇ ਅਜਿਹੇ ਸਾਬਕਾ ਰਾਸ਼ਟਰਪਤੀ ਬਣ ਗਏ ਹਨ ਜਿਨ੍ਹਾਂ ਨੂੰ ਮੁਜਰਮਾਨਾਂ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਹੋਵੇਗਾ ਤੇ ਇਸ ਨਾਲ ਅਗਲੇ ਸਾਲ ਵ੍ਹਾਈਟ ਹਾਊਸ ਪਰਤਣ ਦੀਆਂ ਉਨ੍ਹਾਂ ਦੀਆਂ ਆਸਾਂ ਨੂੰ ਵੱਡਾ ਝਟਕਾ ਲੱਗਿਆ ਹੈ।
ਟਰੰਪ ਉੱਤੇ ਲਾਏ ਗਏ ਚਾਰਜਿਜ਼ ਦਾ ਭਾਵੇਂ ਵੀਰਵਾਰ ਨੂੰ ਖੁਲਾਸਾ ਨਹੀਂ ਕੀਤਾ ਗਿਆ ਪਰ ਇਹ ਮਾਮਲਾ 2016 ਵਿੱਚ ਰਾਸ਼ਟਰਪਤੀ ਦੇ ਅਹੁਦੇ ਲਈ ਕੈਂਪੇਨ ਦੌਰਾਨ ਐਕਸਟ੍ਰਾਮੈਰੀਟਲ ਸਬੰਧਾਂ ਦੇ ਦਾਅਵੇ ਨੂੰ ਚੁੱਪ ਕਰਵਾਉਣ ਲਈ ਕੀਤੀਆਂ ਗਈਆਂ ਅਦਾਇਗੀਆਂ ਉੱਤੇ ਹੀ ਕੇਂਦਰਿਤ ਸੀ। ਪ੍ਰੌਸੀਕਿਊਟਰਜ਼ ਦਾ ਕਹਿਣਾ ਹੈ ਕਿ ਉਹ ਟਰੰਪ ਵੱਲੋਂ ਆਤਮ ਸਮਰਪਣ ਕਰਨ ਦੇ ਮਾਮਲੇ ਉੱਤੇ ਕੰਮ ਕਰ ਰਹੇ ਹਨ ਤੇ ਇਹ ਅਗਲੇ ਹਫਤੇ ਹੋ ਸਕਦਾ ਹੈ।ਟਰੰਪ ਦੇ ਕਾਰੋਬਾਰ, ਸਿਆਸੀ ਤੇ ਪਰਸਨਲ ਡੀਲਿੰਗਜ਼ ਦੀ ਕਈ ਸਾਲਾਂ ਤੱਕ ਕੀਤੀ ਗਈ ਜਾਂਚ ਤੋਂ ਬਾਅਦ ਹੀ ਟਰ਼ੰਪ ਨੂੰ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ। ਇਸ ਉੱਤੇ ਟਰੰਪ ਤੇ ਉਸ ਨੂੰ ਚਾਹੁਣ ਵਾਲਿਆਂ ਦਾ ਕਹਿਣਾ ਹੈ ਕਿ ਇਹ ਸੱਭ ਡੈਮੋਕ੍ਰੈਟਿਕ ਪ੍ਰੌਸੀਕਿਊਟਰ ਵੱਲੋਂ ਸਿਆਸੀ ਮੰਤਵ ਨੂੰ ਧਿਆਨ ਵਿੱਚ ਰੱਖਦਿਆਂ ਹੋਇਆਂ ਰਿਪਬਲਿਕਨਾਂ ਨੂੰ ਨਿਸ਼ਾਨਾ ਬਣਾਉਣ ਦੇ ਇਰਾਦੇ ਨਾਲ ਕੀਤਾ ਜਾ ਰਿਹਾ ਹੈ।
ਟਰੰਪ ਵੱਲੋਂ ਅਜੇ ਵੀ ਕਿਸੇ ਤਰ੍ਹਾਂ ਦੀ ਗੜਬੜ ਤੋਂ ਇਨਕਾਰ ਕੀਤਾ ਜਾ ਰਿਹਾ ਹੈ ਤੇ ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਸ ਨਾਲ 2024 ਵਿੱਚ ਡੈਮੋਕ੍ਰੈਟਸ ਨੂੰ ਵੱਡਾ ਨੁਕਸਾਨ ਹੋਵੇਗਾ। ਇਨ੍ਹਾਂ ਚਾਰਜਿਜ਼ ਦੀ ਪੁਸ਼ਟੀ ਕਰਦਿਆਂ ਡਿਫੈਂਸ ਦੇ ਵਕੀਲਾਂ ਸੂਜ਼ਨ ਨੈਕੇਲੇਸ ਤੇ ਜੋਸਫ ਟੈਕੋਪੀਨਾ ਦਾ ਕਹਿਣਾ ਹੈ ਕਿ ਟਰੰਪ ਨੇ ਕੋਈ ਜੁਰਮ ਨਹੀਂ ਕੀਤਾ ਤੇ ਅਦਾਲਤ ਵਿੱਚ ਇਸ ਫੈਸਲੇ ਨੂੰ ਚੁਣੌਤੀ ਦਿੱਤੀ ਜਾਵੇਗੀ।ਇਹ ਮਾਮਲਾ 2016 ਦਾ ਹੈ ਜਦੋਂ ਪ੍ਰੌਸੀਕਿਊਟਰਜ਼ ਨੂੰ ਇਸ ਮਾਮਲੇ ਦੀ ਜਾਂਚ ਕਰਨੀ ਪਈ ਸੀ ਕਿ ਪੌਰਨ ਐਕਟਰ ਸਟੌਰਮੀ ਡੈਨੀਅਲਜ਼ ਤੇ ਸਾਬਕਾ ਪਲੇਅਬੌਏ ਮਾਡਲ ਕੈਰਨ ਮੈਕਡਗਲ ਨਾਲ ਕਥਿਤ ਤੌਰ ਉੱਤੇ ਐਕਸਟ੍ਰਾਮੈਰੀਟਲ ਸਬੰਧ ਰੱਖਣ ਦੇ ਮਾਮਲੇ ਨੂੰ ਜਨਤਾ ਵਿੱਚ ਲਿਜਾਣ ਤੋਂ ਰੋਕਣ ਲਈ ਉਨ੍ਹਾਂ ਨੂੰ ਪੈਸੇ ਦਿੱਤੇ ਗਏ।