ਟੋਰਾਂਟੋ, 27 ਮਾਰਚ (ਪੋਸਟ ਬਿਊਰੋ) : ਕਾਊਂਸਲਰ ਵਜੋਂ ਸਿਟੀ ਹਾਲ ਤੇ ਮੈਂਬਰ ਪਾਰਲੀਆਮੈਂਟ ਵਜੋਂ ਓਟਵਾ ਵਿੱਚ ਆਪਣੀ ਦਮਦਾਰ ਮੌਜੂਦਗੀ ਦਰਜ ਕਰਵਾ ਚੁੱਕੀ ਤੇ ਟੋਰਾਂਟੋ ਦੀ ਸਿਆਸਤ ਵਿੱਚ ਕਦੇ ਖੱਬੇ ਪੱਖੀ ਤੇ ਪ੍ਰੋਗਰੈਸਿਵ ਸੋਚ ਦੀ ਧਨੀ ਮੰਨੀ ਜਾਣ ਵਾਲੀ ਓਲੀਵੀਆ ਚਾਓ ਹੁਣ ਟੋਰਾਂਟੋ ਦੇ ਮੇਅਰ ਦੀ ਦੌੜ ਲਈ ਖੜ੍ਹੇ ਹੋਣ ਦਾ ਮਨ ਬਣਾ ਰਹੀ ਹੈ।
ਇੱਕ ਵਾਰੀ ਪਹਿਲਾਂ ਵੀ ਉਹ 2014 ਵਿੱਚ ਮੇਅਰ ਦੀ ਦੌੜ ਵਿੱਚ ਹਿੱਸਾ ਲੈ ਚੁੱਕੀ ਹੈ ਤੇ ਜੌਹਨ ਟੋਰੀ ਹੱਥੋਂ ਹਾਰ ਚੁੱਕੀ ਹੈ। ਆਪਣੀ ਕੈਂਪੇਨ ਦੀ ਸ਼ੁਰੂਆਤ ਤੋਂ ਹੀ ਉਨ੍ਹਾਂ ਇੰਸਟੀਚਿਊਟ ਆਫ ਚੇਂਜ ਲੀਡਰਜ਼ ਆਰਗੇਨਾਈਜ਼ੇਸ਼ਨ ਕਾਇਮ ਕੀਤੀ ਜਿਹੜੀ ਅਜਿਹੇ ਕੋਰਸ ਤਿਆਰ ਕਰਦੀ ਤੇ ਪੜ੍ਹਾਉਂਦੀ ਹੈ ਜਿਹੜੇ ਪਾਰਟੀਸਿਪੈਂਟਸ ਨੂੰ ਜਮਹੂਰੀ ਪ੍ਰਕਿਰਿਆ ਵਿੱਚ ਸ਼ਾਮਲ ਹੋਣਾ ਸਿਖਾਉਂਦੇ ਹਨ। ਹਾਲ ਦੀ ਘੜੀ ਚਾਓ ਵੱਲੋਂ ਮੇਅਰ ਦੀ ਦੌੜ ਵਿੱਚ ਹਿੱਸਾ ਲੈਣ ਦੀ ਪੁਸ਼ਟੀ ਨਹੀਂ ਕੀਤੀ ਗਈ ਹੈ ਪਰ ਉਨ੍ਹਾਂ ਦੇ ਸਮਰਥਕਾਂ ਵੱਲੋਂ ਉਨਾਂ ਨੂੰ ਅਜਿਹਾ ਕਰਨ ਲਈ ਹੱਲਾਸ਼ੇਰੀ ਦਿੱਤੀ ਜਾ ਰਹੀ ਹੈ।
ਮੌਨਿਊਮੈਂਟਲ ਪ੍ਰੋਜੈਕਟਸ ਦੇ ਸਹਿ ਬਾਨੀ ਕੋਫੀ ਹੋਪ ਨੇ ਆਖਿਆ ਕਿ ਓਲੀਵੀਆ ਅਜਿਹੀ ਸ਼ਖ਼ਸ ਹੈ ਜਿਸ ਕੋਲ ਸਿਟੀ ਲਈ ਕੰਮ ਕਰਨ ਦਾ ਜਨੂੰਨ ਹੈ ਤੇ ਉਸ ਦੀਆਂ ਕਦਰਾਂ ਕੀਮਤਾਂ ਵੀ ਡੂੰਘੀਆਂ ਹਨ। ਉਹ ਲੋਕਾਂ ਦੀ ਵੀ ਪਰਵਾਹ ਕਰਦੀ ਹੈ ਤੇ ਕੰਮ ਨੂੰ ਵੀ ਮਜੇ਼ ਨਾਲ ਸਿਰੇ ਚੜ੍ਹਾਉਂਦੀ ਹੈ। ਜਦੋਂ ਤੁਸੀਂ ਓਲੀਵੀਆ ਦੇ ਘਰ ਜਾਂਦੇ ਹੋ ਤਾਂ ਉਹ ਯੰਗ ਲੋਕਾਂ ਤੇ ਕਾਰਕੁੰਨਾਂ ਨਾਲ ਭਰਿਆ ਹੁੰਦਾ ਹੈ, ਜਿਨ੍ਹਾਂ ਨੂੰ ਉਹ ਪੜ੍ਹਾ ਰਹੀ ਹੁੰਦੀ ਹੈ, ਕੋਚ ਕਰ ਰਹੀ ਹੁੰਦੀ ਹੈ ਤੇ ਜਿਨ੍ਹਾਂ ਨਾਲ ਉਹ ਕੰਮ ਕਰ ਰਹੀ ਹੁੰਦੀ ਹੈ।
ਚਾਓ ਦੇ ਮੇਅਰ ਦੀ ਦੌੜ ਲਈ ਖੜ੍ਹੇ ਹੋਣ ਦਾ ਜਿਹੜਾ ਸੰਕੇਤ ਮਿਲਿਆ ਉਹ ਸੋਮਵਾਰ ਨੂੰ ਕੀਤਾ ਗਿਆ ਟਵੀਟ ਸੀ ਜਿਸ ਵਿੱਚ ਉਨ੍ਹਾਂ ਆਖਿਆ ਸੀ ਕਿ ਉਹ ਸਿਟੀ ਨੂੰ ਪਿਆਰ ਕਰਦੀ ਹੈ ਤੇ ਉਹ ਹਰ ਕਿਸੇ ਲਈ ਹੋਰ ਬਿਹਤਰ ਹੋ ਸਕਦੀ ਹੈ।