ਟੋਰਾਂਟੋ, 26 ਮਾਰਚ (ਪੋਸਟ ਬਿਊਰੋ) : ਲੈਂਪੌਰਟ ਸਟੇਡੀਅਮ ਵਿਖੇ ਹੋਏ ਹਮਲੇ ਦੇ ਸਬੰਧ ਵਿੱਚ ਟੋਰਾਂਟੋ ਪੁਲਿਸ ਵੱਲੋਂ ਇੱਕ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਜਦਕਿ ਇੱਕ ਹੋਰ ਮਸ਼ਕੂਕ ਫਰਾਰ ਹੈ।
ਪੁਲਿਸ ਨੇ ਦੱਸਿਆ ਕਿ 19 ਮਾਰਚ ਨੂੰ ਤੜ੍ਹਕੇ 1:49 ਵਜੇ ਲੈਂਪੌਰਟ ਸਟੇਡੀਅਮ ਵਿੱਚ ਅਮੈਚਿਓਰ ਸੌਕਰ ਮੈਚ ਹੋਇਆ ਤੇ ਇਸ ਦੌਰਾਨ ਖਿਡਾਰੀਆਂ ਵਿੱਚ ਲੜਾਈ ਹੋ ਗਈ। ਇੱਕ ਵਿਅਕਤੀ ਉੱਤੇ ਕੀਤੇ ਗਏ ਹਮਲੇ ਕਾਰਨ ਉਸ ਨੂੰ ਜ਼ਖ਼ਮੀ ਹਾਲਤ ਵਿੱਚ ਹਸਪਤਾਲ ਲਿਜਾਇਆ ਗਿਆ। ਹਮਲਾ ਕਰਨ ਤੇ ਸ਼ਰੀਰਕ ਨੁਕਸਾਨ ਪਹੁੰਚਾਉਣ ਦੇ ਮਾਮਲੇ ਵਿੱਚ ਟੋਰਾਂਟੋ ਦੇ 22 ਸਾਲਾ ਸਾਮੀ ਰੈਮਨ ਮੇਡੀਨਾ ਸਾਂਚੇਜ਼ ਨੂੰ ਗ੍ਰਿਫਤਾਰ ਤੇ ਚਾਰਜ ਕਰ ਲਿਆ ਗਿਆ।
ਇੱਕ ਹੋਰ ਹਮਲਾਵਰ ਦੀ ਪੁਲਿਸ ਵੱਲੋਂ ਭਾਲ ਕੀਤੀ ਜਾ ਰਹੀ ਹੈ ਤੇ ਉਸ ਸਬੰਧ ਵਿੱਚ ਜਾਰੀ ਕੀਤੇ ਗਏ ਵੇਰਵੇ ਅਨੁਸਾਰ ਉਹ 5 ਫੁੱਟ 7 ਇੰਚ ਜਾਂ 5 ਫੁੱਟ 10 ਇੰਚ ਦਾ ਵਿਅਕਤੀ ਹੋ ਸਕਦਾ ਹੈ ਜਿਸ ਦੀ ਉਮਰ 20 ਤੋਂ 25 ਸਾਲਾਂ ਦਰਮਿਆਨ ਹੈ, ਉਸ ਦੀ ਕੱਦ-ਕਾਠੀ ਦਰਮਿਆਨੀ ਹੈ, ਵਾਲ ਨਿੱਕੇ ਤੇ ਕਾਲੇ ਹਨ ਤੇ ਉਸ ਦੇ ਹਲਕੀ ਦਾੜ੍ਹੀ ਮੁੱਛਾਂ ਹਨ। ਮਸ਼ਕੂਕ ਨੇ ਹਰੇ ਤੇ ਚਿੱਟੇ ਰੰਗ ਦੀ ਜਰਸੀ, ਕਾਲੀਆਂ ਲੈਗਿੰਗਜ਼, ਕਾਲੀਆਂ ਸ਼ੌਰਟਸ ਤੇ ਗ੍ਰੇਅ ਸੂ਼ਜ਼, ਜਿਨ੍ਹਾਂ ਦੇ ਤਸਮੇ ਆਰੇਂਜ ਹਨ, ਪਾਏ ਹੋਏ ਹਨ।