ਓਨਟਾਰੀਓ, 23 ਮਾਰਚ (ਪੋਸਟ ਬਿਊਰੋ) : ਡੱਗ ਫੋਰਡ ਸਰਕਾਰ ਨੇ ਓਨਟਾਰੀਓ ਦੇ ਇਤਿਹਾਸ ਦਾ ਸੱਭ ਤੋਂ ਵੱਧ ਖਰਚਿਆਂ ਵਾਲਾ ਬਜਟ ਪੇਸ਼ ਕੀਤਾ ਹੈ। 204 ਬਿਲੀਅਨ ਡਾਲਰ ਦੇ ਇਸ ਬਜਟ ਵਿੱਚ ਮਹਿੰਗਾਈ ਨਾਲ ਜੂਝ ਰਹੇ ਓਨਟਾਰੀਓ ਵਾਸੀਆਂ ਲਈ ਕੋਈ ਨਵੀਂ ਫੰਡਿੰਗ ਨਹੀਂ ਹੈ ਤੇ ਨਾ ਹੀ ਕੋਵਿਡ-19 ਲਈ ਕੋਈ ਰਕਮ ਪਾਸੇ ਰੱਖੀ ਗਈ ਹੈ।
ਇਸ ਦੀ ਥਾਂ ਉੱਤੇ ਹਾਈਵੇਅਜ਼ ਦੇ ਨਿਰਮਾਣ ਵਰਗੇ ਪ੍ਰੋਜੈਕਟਾਂ ਲਈ ਵੱਡੀ ਰਕਮ ਰੱਖੀ ਗਈ ਹੈ ਪਰ ਇਹ ਵੇਰਵੇ ਸਾਂਝੇ ਨਹੀਂ ਕੀਤੇ ਗਏ ਕਿ ਇਹ ਰਕਮ ਕਿਸ ਤਰ੍ਹਾਂ ਖਰਚ ਕੀਤੀ ਜਾਵੇਗੀ। ਆਮਦਨ ਉੱਤੇ ਟੇਕ ਰੱਖਦਿਆਂ ਸਰਕਾਰ ਦੀ ਯੋਜਨਾ ਅਗਲੇ ਸਾਲ ਤੱਕ, ਸ਼ਡਿਊਲ ਤੋਂ ਤਿੰਨ ਸਾਲ ਪਹਿਲਾਂ ਹੀ, ਬਜਟ ਨੂੰ ਸੰਤੁਲਿਤ ਕਰਨ ਦੀ ਹੈ।
186 ਪੰਨਿਆਂ ਦੇ ਇਸ ਬਜਟ ਵਿੱਚ ਬਿਲਡਿੰਗ ਓਨਟਾਰੀਓ ਦੇ ਨਾਂ ਉੱਤੇ ਅਗਲੇ 10 ਸਾਲਾਂ ਵਿੱਚ ਖਰਚ ਕਰਨ ਵਾਸਤੇ 25 ਬਿਲੀਅਨ ਡਾਲਰ ਰਾਖਵੇਂ ਰੱਖੇ ਗਏ ਹਨ। ਇਹ ਸੱਭ ਅਗਲੇ ਦਹਾਕੇ ਵਿੱਚ 184 ਬਿਲੀਅਨ ਡਾਲਰ ਦੀ ਮਦਦ ਨਾਲ ਯੋਜਨਾਬੱਧ ਇਨਫਰਾਸਟ੍ਰਕਚਰ ਉੱਤੇ ਖਰਚ ਕੀਤੀ ਜਾਣ ਵਾਲੀ ਰਕਮ ਦਾ ਹੀ ਹਿੱਸਾ ਹੈ। ਇਸ ਵਿੱਚ ਨਵੇਂ ਹਾਈਵੇਅਜ਼, ਜਿਵੇਂ ਕਿ ਹਾਈਵੇਅ 413, ਦੇ ਨਿਰਮਾਣ ਲਈ ਵੀ ਰਕਮ ਰੱਖੀ ਗਈ ਹੈ ਪਰ ਸਰਕਾਰ ਵੱਲੋਂ ਹਾਈਵੇਅ ਦੇ ਨਿਰਮਾਣ ਉੱਤੇ ਹੋਣ ਵਾਲੇ ਖਰਚੇ ਦਾ ਐਸਟੀਮੇਟ ਮੁਹੱਈਆ ਨਹੀਂ ਕਰਵਾਇਆ ਗਿਆ।
ਬਜਟ ਨੂੰ ਸੰਤੁਲਿਤ ਕਰਨ ਲਈ ਵੀ ਸਰਕਾਰ ਦ੍ਰਿੜ ਹੈ। ਇਸ ਵਿੱਤੀ ਵਰ੍ਹੇ ਵਿੱਚ ਸਰਕਾਰ ਨੂੰ 1·3 ਬਿਲੀਅਨ ਡਾਲਰ ਦਾ ਘਾਟਾ ਪੈਣ ਦਾ ਡਰ ਹੈ ਪਰ ਅਗਲੇ ਸਾਲ ਤੋਂ ਓਨਟਾਰੀਓ ਦਾ ਬਜਟ ਸੰਤੁਲਿਤ ਹੋਣ ਦੇ ਨਾਲ ਨਾਲ ਸਰਕਾਰ ਨੂੰ 200 ਮਿਲੀਅਨ ਡਾਲਰ ਵਾਧੂ ਬਚਣ ਦੀ ਵੀ ਉਮੀਦ ਹੈ। ਵਿੱਤ ਮੰਤਰੀ ਪੀਟਰ ਬੈਥਲੈਨਫੈਲਵੀ ਵੱਲੋਂ ਇਸ ਨੂੰ ਦਮਦਾਰ ਵਿੱਤੀ ਰਿਕਾਰਡ ਦਾ ਦਰਜਾ ਦਿੱਤਾ ਗਿਆ।ਉਨ੍ਹਾਂ ਆਖਿਆ ਕਿ ਭਾਵੇਂ ਅਸਥਿਰਤਾ ਵਾਲਾ ਮਾਹੌਲ ਅਜੇ ਵੀ ਬਣਿਆ ਹੋਇਆ ਹੈ ਪਰ ਅਸੀਂ ਵਿੱਤੀ ਮਜ਼ਬੂਤੀ ਵੱਲ ਵੱਧ ਰਹੇ ਹਾਂ।
ਮਹਿੰਗਾਈ ਨਾਲ ਜੂਝ ਰਹੇ ਓਨਟਾਰੀਓ ਵਾਸੀਆਂ ਲਈ ਕੋਈ ਰਾਹਤ ਮੁਹੱਈਆ ਨਹੀਂ ਕਰਵਾਈ ਗਈ।ਸਗੋਂ ਸਰਕਾਰ ਵੱਲੋਂ ਪ੍ਰੋਵਿੰਸ਼ੀਅਲ ਗੈਸ ਟੈਕਸ, ਜਿਸ ਨੂੰ ਪਹਿਲਾਂ ਆਰਜ਼ੀ ਤੌਰ ਉੱਤੇ ਘਟਾ ਦਿੱਤਾ ਗਿਆ ਸੀ, ਉੱਤੇ ਦਿੱਤੀ ਜਾ ਰਹੀ ਛੋਟ ਵੀ ਖ਼ਤਮ ਕਰ ਦਿੱਤੀ ਗਈ ਹੈ। ਕੋਵਿਡ-19 ਲਈ ਵੀ ਕੋਈ ਫੰਡਿੰਗ ਸਰਕਾਰ ਵੱਲੋਂ ਨਹੀਂ ਰੱਖੀ ਗਈ ਹੈ। ਇਸ ਦੇ ਨਾਲ ਹੀ ਸਰਕਾਰ ਨੂੰ ਭੰਗ ਤੋਂ ਵੀ ਘੱਟ ਆਮਦਨ ਹੋਣ ਦੀ ਉਮੀਦ ਹੈ। ਕਿਸੇ ਆਮ ਕੈਨਾਬਿਸ ਸਟੋਰ ਤੋਂ ਹੋਣ ਵਾਲੀ ਆਮਦਨ ਵਿੱਚ 31 ਮਿਲੀਅਨ ਡਾਲਰ ਨਾਲ ਗਿਰਾਵਟ ਆ ਸਕਦੀ ਹੈ। ਅਜਿਹਾ ਓਸੀਐਸ ਵੱਲੋਂ ਵੀਡ ਦੀਆਂ ਕੀਮਤਾਂ ਵਿੱਚ ਕਟੌਤੀ ਕੀਤੇ ਜਾਣ ਕਾਰਨ ਹੋ ਸਕਦਾ ਹੈ।
ਹੈਲਥ ਕੇਅਰ ਉੱਤੇ ਸਰਕਾਰ ਵੱਲੋਂ ਖਰਚ ਕਰਨ ਲਈ 3·2 ਬਿਲੀਅਨ ਡਾਲਰ ਰਾਖਵੇਂ ਰੱਖੇ ਗਏ ਹਨ। ਕਮਿਊਨਿਟੀ (ਪ੍ਰਾਈਵੇਟ) ਸਰਜੀਕਲ ਸੈਂਟਰਜ਼ ਲਈ ਸਰਕਾਰ 72 ਮਿਲੀਅਨ ਡਾਲਰ ਪਾਸੇ ਰੱਖ ਕੇ ਚੱਲ ਰਹੀ ਹੈ। ਅਗਲੇ 10 ਸਾਲਾਂ ਵਿੱਚ ਹਸਪਤਾਲਾਂ ਦੇ ਇਨਫਰਾਸਟ੍ਰਕਚਰ ਲਈ ਸਰਕਾਰ ਵੱਲੋਂ 48 ਬਿਲੀਅਨ ਡਾਲਰ ਖਰਚ ਕਰਨ ਦੀ ਯੋਜਨਾ ਬਣਾਈ ਗਈ ਹੈ ਤੇ ਹੋਮ ਕੇਅਰ ਉੱਤੇ ਸਰਕਾਰ 569 ਮਿਲੀਅਨ ਡਾਲਰ ਹੋਰ ਖਰਚਣਾ ਚਾਹੁੰਦੀ ਹੈ। ਇਸ ਦੇ ਨਾਲ ਹੀ ਮੈਂਟਲ ਹੈਲਥ ਤੇ ਅਡਿਕਸ਼ਨ ਲਈ ਅਗਲੇ ਤਿੰਨ ਸਾਲਾਂ ਵਾਸਤੇ ਸਰਕਾਰ ਵੱਲੋਂ 425 ਮਿਲੀਅਨ ਡਾਲਰ ਦੀ ਰਕਮ ਖਰਚ ਕਰਨ ਦਾ ਫੈਸਲਾ ਕੀਤਾ ਗਿਆ ਹੈ।
ਸਰਕਾਰ ਵੱਲੋਂ ਸਿੱਖਿਆ ਦੇ ਖੇਤਰ ਉੱਤੇ 1·4 ਬਿਲੀਅਨ ਡਾਲਰ ਖਰਚ ਕਰਨ ਲਈ ਰਾਖਵੇਂ ਰੱਖੇ ਗਏ ਹਨ। ਅਗਲੇ 10 ਸਾਲਾਂ ਵਾਸਤੇ ਸਰਕਾਰ ਸਕੂਲਾਂ ਦੇ ਪਸਾਰ ਤੇ ਸਕੂਲਾਂ ਨੂੰ ਨੰਵਿਆਉਣ ਲਈ 15 ਬਿਲੀਅਨ ਡਾਲਰ ਪਾਸੇ ਰੱਖ ਕੇ ਚੱਲ ਰਹੀ ਹੈ ਤੇ ਇਸ ਪੈਸੇ ਦੀ ਮਦਦ ਨਾਲ ਹੀ ਦਸੰਬਰ 2026 ਤੱਕ ਸਰਕਾਰ ਵੱਲੋਂ 86000 ਨਵੀਆਂ ਚਾਈਲਡਕੇਅਰ ਸਪੇਸਿਜ਼ ਵੀ ਕਾਇਮ ਕੀਤੀਆਂ ਜਾਣਗੀਆਂ। ਗਾਰੰਟੀਡ ਐਨੂਅਲ ਇਨਕਮ ਸਿਸਟਮ (ਗੇਨਜ਼) ਲਈ ਹੋਰ ਸੀਨੀਅਰਜ਼ ਨੂੰ ਯੋਗ ਬਣਾਉਣ ਵਾਸਤੇ ਵੀ ਬਜਟ ਵਿੱਚ ਪ੍ਰਬੰਧ ਕੀਤਾ ਗਿਆ ਹੈ।
ਟੋਰਾਂਟੋ ਲਈ ਇਸ ਵਾਰੀ ਕੋਈ ਪੈਸੇ ਨਹੀਂ ਰੱਖੇ ਗਏ ਹਨ। ਪਰ ਸਪੋਰਟਿਵ ਹਾਊਸਿੰਗ ਲਈ ਸਾਲ ਦੇ 202 ਮਿਲੀਅਨ ਡਾਲਰ ਰਾਖਵੇਂ ਰੱਖੇ ਗਏ ਹਨ। ਸਰਕਾਰ ਦਾ ਕਹਿਣਾ ਹੈ ਕਿ ਇਨ੍ਹਾਂ ਵਿੱਚੋਂ ਬਹੁਤੇ ਸਿਟੀ ਆਫ ਟੋਰਾਂਟੋ ਨੂੰ ਹੀ ਮਿਲਣਗੇ ਪਰ ਇਸ ਬਾਰੇ ਕੋਈ ਵੇਰਵੇ ਮੁਹੱਈਆ ਨਹੀਂ ਕਰਵਾਏ ਗਏ।