ਬਰੈਂਪਟਨ, 23 ਮਾਰਚ (ਪੋਸਟ ਬਿਊਰੋ) : ਟਰੈਫਿਕ ਸਟੌਪ ਦੌਰਾਨ ਪੁਲਿਸ ਅਧਿਕਾਰੀਆਂ ਤੋਂ ਬਚ ਕੇ ਨਿਕਲਣ ਦੇ ਚੱਕਰ ਵਿੱਚ ਆਪਣੇ ਟਰੈਕਟਰ ਟਰੇਲਰ ਨਾਲ ਦੂਜੀ ਗੱਡੀ ਨੂੰ ਟੱਕਰ ਮਾਰਨ ਵਾਲੇ ਬਰੈਂਪਟਨ ਦੇ ਪੰਜਾਬੀ ਮੂਲ ਦੇ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਤੇ ਹੁਣ ਉਸ ਉੱਤੇ ਕਈ ਚਾਰਜਿਜ਼ ਲਾਏ ਜਾਣਗੇ।
ਪੀਲ ਰੀਜਨਲ ਪੁਲਿਸ ਦਾ ਕਹਿਣਾ ਹੈ ਕਿ 10 ਮਾਰਚ ਨੂੰ ਸਵੇਰੇ 9:30 ਵਜੇ ਤੋਂ ਬਾਅਦ ਬਰੈਂਪਟਨ ਵਿੱਚ ਵਿਲੀਅਮਜ਼ ਪਾਰਕਵੇਅ ਤੇ ਡਿਕਸੀ ਰੋਡ ਏਰੀਆ ਵਿੱਚ ਨੋ ਹੈਵੀ ਟਰੱਕ ਜ਼ੋਨ ਵਿੱਚ ਕਥਿਤ ਤੌਰ ਉੱਤੇ ਹੈਵੀ ਟਰੈਕਟਰ ਟਰੇਲਰ ਨਾਲ ਡਰਾਈਵ ਕਰ ਰਹੇ ਇੱਕ ਡਰਾਈਵਰ ਨੂੰ ਰੋਕਣ ਲਈ ਪੁਲਿਸ ਨੇ ਟਰੈਫਿਕ ਨੂੰ ਰੋਕਿਆ। ਫਿਰ ਜਦੋਂ ਪੁਲਿਸ ਡਰਾਈਵਰ ਤੱਕ ਪਹੁੰਚਣ ਲਈ ਵਧੀ ਤਾਂ ਉਸ ਨੇ ਪੂਰੀ ਸਪੀਡ ਨਾਲ ਆਪਣੇ ਟਰੈਕਟਰ ਟਰੇਲਰ ਨੂੰ ਉੱਥੋਂ ਲਿਜਾਣ ਦੀ ਕੋਸਿ਼ਸ਼ ਕੀਤੀ ਤੇ ਸਫਲ ਵੀ ਹੋ ਗਿਆ। ਪਬਲਿਕ ਸੇਫਟੀ ਨੂੰ ਧਿਆਨ ਵਿੱਚ ਰੱਖਦਿਆਂ ਹੋਇਆਂ ਪੁਲਿਸ ਡਰਾਈਵਰ ਨੂੰ ਕਾਬੂ ਨਹੀਂ ਕਰ ਸਕੀ।
ਕੁੱਝ ਮਿੰਟਾਂ ਬਾਅਦ ਹੀ ਪੁਲਿਸ ਅਧਿਕਾਰੀਆਂ ਨੂੰ ਉਹ ਟਰੈਕਟਰ ਟਰੇਲਰ ਏਅਰਪੋਰਟ ਰੋਡ ਤੇ ਕੁਈਨ ਸਟਰੀਟ ਏਰੀਆ ਵਿੱਚ ਨਜ਼ਰ ਆਇਆ। ਪੁਲਿਸ ਨੂੰ ਵੇਖਣ ਮਗਰੋਂ ਡਰਾਈਵਰ ਨੇ ਬੇਤਰਤੀਬੇ ਢੰਗ ਨਾਲ ਟਰੱਕ ਚਲਾਉਣਾ ਸੁ਼ਰੂ ਕਰ ਦਿੱਤਾ। ਕੁੱਝ ਦੂਰੀ ਉੱਤੇ ਗੋਰਵੇਅ ਡਰਾਈਵ ਤੇ ਸਟੀਲਜ਼ ਐਵਨਿਊ ਉੱਤੇ ਡਰਾਈਵਰ ਨੇ ਇੱਕ ਗੱਡੀ ਨੂੰ ਟੱਕਰ ਮਾਰ ਦਿੱਤੀ ਤੇ ਮੌਕੇ ਉੱਤੇ ਉਹ ਫਿਰ ਵੀ ਨਹੀਂ ਰੁਕਿਆ। 20 ਮਾਰਚ ਨੂੰ ਜਾਂਚਕਾਰਾਂ ਨੇ ਡਰਾਈਵਰ ਦੀ ਪਛਾਣ ਬਰੈਂਪਟਨ ਦੇ 28 ਸਾਲਾਂ ਦੇ ਲਵਪ੍ਰੀਤ ਸਿੰਘ ਵਜੋਂ ਕੀਤੀ ਤੇ ਉਸ ਦੀ ਗ੍ਰਿਫਤਾਰੀ ਲਈ ਵਾਰੰਟ ਜਾਰੀ ਕਰ ਦਿੱਤੇ। ਦੋ ਦਿਨ ਬਾਅਦ ਉਸ ਨੂੰ ਹਿਰਾਸਤ ਵਿੱਚ ਲੈ ਲਿਆ ਗਿਆ।
ਉਸ ਨੂੰ ਕਈ ਚਾਰਜਿਜ਼ ਜਿਵੇਂ ਪੁਲਿਸ ਕੋਲੋਂ ਭੱਜਣ, ਖਤਰਨਾਕ ਢੰਗ ਨਾਲ ਕੰਮ ਕਰਨ ਤੇ ਹਾਦਸੇ ਨੂੰ ਅੰਜਾਮ ਦੇਣ ਮਗਰੋਂ ਨਾ ਰੁਕਣ, ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪੁਲਿਸ ਨੇ ਦੱਸਿਆ ਕਿ ਜਾਅਲੀ ਪਛਾਣ ਦੱਸ ਕੇ ਗੱਡੀਆਂ ਕਿਰਾਏ ਉੱਤੇ ਲੈਣ ਦਾ ਲਵਪ੍ਰੀਤ ਦਾ ਇਤਿਹਾਸ ਰਿਹਾ ਹੈ।