ਓਨਟਾਰੀਓ, 22 ਮਾਰਚ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਲਿਬਰਲ ਐਮਪੀਪੀ ਵੱਲੋਂ ਟੋਰਾਂਟੋ ਦੇ ਸਾਬਕਾ ਮੇਅਰ ਜੌਹਨ ਟੋਰੀ ਦੀ ਥਾਂ ਲੈਣ ਲਈ ਚੋਣ ਪਿੜ ਵਿੱਚ ਨਿੱਤਰਣ ਦਾ ਫੈਸਲਾ ਕੀਤਾ ਗਿਆ ਹੈ।
ਮੰਗਲਵਾਰ ਰਾਤ ਨੂੰ ਬਲੈਕ ਪ੍ਰੋਫੈਸ਼ਨਲ ਇਨ ਟੈਕ (ਬੀਪੀਟੀਐਨ) ਵੱਲੋਂ ਕਰਵਾਏ ਗਏ ਇੱਕ ਈਵੈਂਟ ਉੱਤੇ ਮਿਤਜ਼ੀ ਹੰਟਰ ਨੇ ਇੱਕਠ ਨੂੰ ਸੰਬੋਧਨ ਕਰਦਿਆਂ ਇਹ ਖੁਲਾਸਾ ਕੀਤਾ ਕਿ ਉਹ ਜੂਨ ਵਿੱਚ ਹੋਣ ਜਾ ਰਹੀਆਂ ਜਿ਼ਮਨੀ ਚੋਣਾਂ ਵਿੱਚ ਹਿੱਸਾ ਲੈਣ ਦੀ ਤਿਆਰੀ ਕਰ ਰਹੀ ਹੈ। ਸਕਾਰਬਰੋ-ਗਿਲਡਵੁੱਡ ਐਮਪੀਪੀ ਨੇ ਆਖਿਆ ਕਿ ਟੋਰਾਂਟੋ ਲਈ ਇਹ ਕਾਫੀ ਅਸਥਿਰਤਾ ਵਾਲਾ ਸਮਾਂ ਹੈ ਤੇ ਇਹ ਸਿਟੀ ਲਈ ਬਹੁਤ ਹੀ ਅਹਿਮ ਸਮਾਂ ਵੀ ਹੈ। ਹੁਣ ਸਮਾਂ ਟੋਰਾਂਟੋ ਨੂੰ ਲੀਹ ਉੱਤੇ ਲੈ ਕੇ ਆਉਣ ਦਾ ਆ ਗਿਆ ਹੈ।
51 ਸਾਲਾਂ ਦੀ ਐਮਪੀਪੀ ਨੇ ਆਖਿਆ ਕਿ ਜੇ ਉਹ ਚੁਣੀ ਜਾਂਦੀ ਹੈ ਤਾਂ ਟੋਰਾਂਟੋ ਵਿੱਚ ਪਬਲਿਕ ਸਰਵਿਸਿਜ਼ ਵਿੱਚ ਸੁਧਾਰ ਦੇ ਨਾਲ ਨਾਲ ਪਬਲਿਕ ਟਰਾਂਜਿ਼ਟ ਉੱਤੇ ਸੇਫਟੀ ਵਿੱਚ ਵਾਧਾ ਕਰਨਾ ਤੇ ਸਿਟੀ ਨੂੰ ਵਧੇਰੇ ਕਿਫਾਇਤੀ ਬਣਾਉਣਾ ਉਨ੍ਹਾਂ ਦੀਆਂ ਮੁੱਖ ਤਰਜੀਹਾਂ ਵਿੱਚ ਸ਼ਾਮਲ ਹੈ।ਇਸ ਦੇ ਨਾਲ ਹੀ ਪਬਲਿਕ ਵਾਸ਼ਰੂਮਜ਼ ਖੋਲ੍ਹਣ, ਉਮਰਦਰਾਜ਼ ਹੋ ਚੁੱਕੇ ਇਨਫਰਾਸਟ੍ਰਕਚਰ ਨੂੰ ਬਦਲਣ, ਸਨੋਅ ਹਟਾਉਣ, ਸੜਕਾਂ ਨੂੰ ਸਾਫ ਸੁਥਰਾ ਰੱਖਣ ਵੱਲ ਵੀ ਉਹ ਧਿਆਨ ਦੇਵੇਗੀ।