ਟੋਰਾਂਟੋ, 21 ਮਾਰਚ (ਪੋਸਟ ਬਿਊਰੋ) : ਇੱਕ ਡਰਾਈਵਰ ਦਾ ਪਿੱਛਾ ਕਰਕੇ ਟੋਰਾਂਟੋ ਦੇ ਪੱਛਮੀ ਹਿੱਸੇ ਵਿੱਚ ਉਸ ਨੂੰ ਚਾਕੂ ਮਾਰਨ ਤੋਂ ਬਾਅਦ ਗੱਡੀ ਖੋਹਣ ਦੇ ਮਾਮਲੇ ਵਿੱਚ ਪੁਲਿਸ ਨੇ 18 ਤੇ 19 ਸਾਲ ਦੇ ਦੋ ਲੜਕਿਆਂ ਨੂੰ ਚਾਰਜ ਕੀਤਾ ਹੈ।
ਸੋਮਵਾਰ ਨੂੰ ਰਾਤੀਂ 8:00 ਵਜੇ ਤੋਂ ਬਾਅਦ ਰੌਜਰਜ਼ ਰੋਡ ਤੇ ਓਲਡ ਵੈਸਟਨ ਰੋਡ ਇਲਾਕੇ ਵਿੱਚ ਪੁਲਿਸ ਨੂੰ ਕਾਰਜੈਕਿੰਗ ਦੇ ਮਾਮਲੇ ਦੀ ਜਾਣਕਾਰੀ ਦਿੱਤੀ ਗਈ।ਪੁਲਿਸ ਨੇ ਦੱਸਿਆ ਕਿ ਕਾਰ ਵਿੱਚ ਜਾ ਰਹੇ ਇੱਕ ਵਿਅਕਤੀ, ਜੋ ਕਿ ਆਪਣੇ 50ਵਿਆਂ ਵਿੱਚ ਸੀ, ਨੂੰ ਸੜਕ ਕਿਨਾਰੇ ਗੱਡੀ ਰੋਕਣ ਲਈ ਮਜਬੂਰ ਕੀਤਾ ਗਿਆ। ਫਿਰ ਦੋ ਲੜਕੇ ਉਸ ਵਿਅਕਤੀ ਕੋਲ ਪਹੁੰਚ ਕੇ ਉਸ ਤੋਂ ਕਾਰ ਦੀਆਂ ਚਾਬੀਆਂ ਮੰਗਣ ਲੱਗੇ।
ਕਥਿਤ ਤੌਰ ਉੱਤੇ ਦੋਵਾਂ ਲੜਕਿਆਂ ਵੱਲੋਂ ਡਰਾਈਵਰ ਉੱਤੇ ਹਮਲਾ ਬੋਲ ਦਿੱਤਾ ਗਿਆ ਤੇ ਜਦੋਂ ਉਸ ਨੇ ਉੱਥੋਂ ਭੱਜਣ ਦੀ ਕੋਸਿ਼ਸ਼ ਕੀਤੀ ਤਾਂ ਦੋਵਾਂ ਲੜਕਿਆਂ ਨੇ ਉਸ ਦਾ ਪਿੱਛਾ ਕਰਕੇ ਉਸ ਉੱਤੇ ਚਾਕੂ ਨਾਲ ਕਈ ਵਾਰ ਕਰ ਦਿੱਤੇ। ਫਿਰ ਦੋਵੇਂ ਲੜਕੇ ਉਸ ਵਿਅਕਤੀ ਦੀ ਗੱਡੀ ਲੈ ਕੇ ਮੌਕੇ ਤੋਂ ਫਰਾਰ ਹੋ ਗਏ।ਜ਼ਖ਼ਮੀ ਵਿਅਕਤੀ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਉਸ ਦੀ ਹਾਲਤ ਖਤਰੇ ਤੋਂ ਬਾਹਰ ਦੱਸੀ ਜਾਂਦੀ ਹੈ।
ਜਾਂਚਕਾਰ ਜਲਦ ਹੀ ਚੋਰੀ ਦੀ ਗੱਡੀ ਤੇ ਹਮਲੇ ਵਿੱਚ ਵਰਤੇ ਗਏ ਚਾਕੂ ਦਾ ਪਤਾ ਲਾਉਣ ਵਿੱਚ ਕਾਮਯਾਬ ਹੋ ਗਏ। ਜਾਂਚਕਾਰਾਂ ਨੇ ਦੱਸਿਆ ਕਿ ਇਹ ਦੋਵੇਂ ਲੜਕੇ ਐਤਵਾਰ ਨੂੰ ਹੋਈ ਕਾਰਜੈਕਿੰਗ ਵਿੱਚ ਵੀ ਸ਼ਾਮਲ ਸਨ।ਉਹ ਕਾਰਜੈਕਿੰਗ ਅਨੈਕਸ ਵਿੱਚ ਬਰਨਾਰਡ ਐਵਨਿਊ ਤੇ ਸਪੈਡਿਨਾ ਰੋਡ ਏਰੀਆ ਵਿੱਚ ਹੋਈ ਸੀ।ਇਨ੍ਹਾਂ ਦੋਵਾਂ ਦੀ ਪਛਾਣ ਟੋਰਾਂਟੋ ਦੇ 18 ਸਾਲਾਂ ਦੇ ਓਰਡੇਨ ਸਿਨੌਇਜ਼ ਤੇ 19 ਸਾਲਾਂ ਦੇ ਲੈਡਿਸਲੈਵ ਗੈਕੀ ਵਜੋਂ ਹੋਈ ਹੈ। ਉਨ੍ਹਾਂ ਉੱਤੇ ਕਤਲ ਦੀ ਕੋਸਿ਼ਸ਼ ਕਰਨ, ਗੁੱਸੇ ਵਿੱਚ ਹਮਲਾ ਕਰਨ, ਹਥਿਆਰ ਨਾਲ ਹਮਲਾ ਕਰਨ ਤੇ ਹਥਿਆਰ ਨਾਲ ਡਾਕੇ ਨੂੰ ਅੰਜਾਮ ਦੇਣ ਵਰਗੇ ਦੋਸ਼ ਲਾਏ ਗਏ ਹਨ।