ਗੁਐਲਫ, 21 ਮਾਰਚ (ਪੋਸਟ ਬਿਊਰੋ) : ਗੁਐਲਫ, ਓਨਟਾਰੀਓ ਪੁਲਿਸ ਵੱਲੋਂ ਇੱਕ ਅਜਿਹੇ ਵਿਅਕਤੀ ਨੂੰ ਚਾਰਜ ਕੀਤਾ ਗਿਆ ਹੈ ਜਿਸਦਾ ਡਰਾਈਵਿੰਗ ਟੈਸਟ ਅਸਫਲ ਰਿਹਾ। ਇਸ ਤੋਂ ਬਾਅਦ ਤੈਸ਼ ਵਿੱਚ ਆ ਕੇ ਉਸ ਨੇ ਆਪਣੀ ਗੱਡੀ ਰਾਹੀਂ ਲੱਗਭਗ ਚਾਰ ਵਿਅਕਤੀਆਂ ਨੂੰ ਟੱਕਰ ਮਾਰ ਹੀ ਦਿੱਤੀ ਸੀ ਪਰ ਬਚਾਅ ਹੋ ਗਿਆ।ਫਿਰ ਉਸ ਨੇ ਪਾਰਕਿੰਗ ਲੌਟ ਵਿੱਚ ਵੀ ਕਾਫੀ ਦੇਰ ਹੰਗਾਮਾ ਕੀਤਾ।
ਇੱਕ ਨਿਊਜ਼ ਰਲੀਜ਼ ਅਨੁਸਾਰ ਡਰਾਈਵਿੰਗ ਟੈਸਟ ਵਿੱਚ ਫੇਲ੍ਹ ਹੋਏ ਵਿਅਕਤੀ ਵੱਲੋਂ ਗੁੱਸੇ ਵਿੱਚ ਪੁੱਠੀਆਂ ਸਿੱਧੀਆਂ ਹਰਕਤਾਂ ਕਰਨ ਕਾਰਨ ਪੁਲਿਸ ਅਧਿਕਾਰੀਆਂ ਨੂੰ ਵੁੱਡਲਾਅਨ ਰੋਡ ਵੈਸਟ ਪਲਾਜ਼ਾ ਉੱਤੇ ਸੋਮਵਾਰ ਦੁਪਹਿਰੇ 4:00 ਵਜੇ ਸੱਦਿਆ ਗਿਆ।ਇਹ ਡਰਾਈਵਰ ਕਥਿਤ ਤੌਰ ਉੱਤੇ ਡਰਾਈਵ ਟੈਸਟ ਸਟਾਫ ਨੂੰ ਟੁੱਟ ਟੁੱਟ ਪੈ ਰਿਹਾ ਸੀ। ਫਿਰ ਉਹ ਗੱਡੀ ਵਿੱਚ ਜਾ ਚੜ੍ਹਿਆ ਤੇ ਉਸ ਨੇ ਪਾਰਕਿੰਗ ਲੌਟ ਵਿੱਚ ਗੱਡੀ ਤੇਜ਼ੀ ਨਾਲ ਦੌੜਾਈ ਤੇ ਪਲਾਜ਼ਾ ਦੇ ਪਾਰਕਿੰਗ ਲੌਟ ਵਿੱਚ ਕਾਫੀ ਤਮਾਸ਼ਾ ਕੀਤਾ।
ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਉਹ ਪਾਰਕ ਕੀਤੀ ਗੱਡੀ ਦੀ ਡਰਾਈਵਰ ਵਾਲੀ ਸੀਟ ਉੱਤੇ ਬੈਠਾ ਮਿਲਿਆ। ਬਰੈਂਪਟਨ ਦੇ 36 ਸਾਲਾ ਇਸ ਵਿਅਕਤੀ ਨੂੰ ਖਤਰਨਾਕ ਡਰਾਈਵਿੰਗ ਤੇ ਸਟੰਟ ਡਰਾਈਵਿੰਗ ਲਈ ਚਾਰਜ ਕੀਤਾ ਗਿਆ ਹੈ। ਇੱਕ ਮਹੀਨੇ ਲਈ ਉਸ ਦੇ ਡਰਾਈਵਿੰਗ ਕਰਨ ਉੱਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ ਤੇ ਉਸ ਦੀ ਗੱਡੀ ਨੂੰ ਦੋ ਹਫਤਿਆਂ ਲਈ ਜ਼ਬਤ ਕਰ ਲਿਆ ਗਿਆ ਹੈ।