ਓਨਟਾਰੀਓ, 16 ਮਾਰਚ (ਪੋਸਟ ਬਿਊਰੋ) : ਵੀਰਵਾਰ ਨੂੰ ਹੈਮਿਲਟਨ ਸੈਂਟਰ ਉੱਤੇ ਹੋਈ ਪ੍ਰੋਵਿੰਸ਼ੀਅਲ ਜਿ਼ਮਨੀ ਚੋਣ ਵਿੱਚ ਓਨਟਾਰੀਓ ਦੀ ਐਨਡੀਪੀ ਉਮੀਦਵਾਰ ਸਾਰਾਹ ਜਾਮਾ ਵੱਲੋਂ ਜਿੱਤ ਦਰਜ ਕਰਵਾਈ ਗਈ ਹੈ। ਕਈ ਸਾਲਾਂ ਤੋਂ ਐਂਡਰੀਆ ਹੌਰਵਥ ਦੀ ਅਗਵਾਈ ਵਿੱਚ ਐਨਡੀਪੀ ਦੀ ਗੜ੍ਹ ਰਹੀ ਇਸ ਸੀਟ ਨੂੰ ਮੁੜ ਜਾਮਾ ਵੱਲੋਂ ਸਕਿਓਰ ਕਰ ਲਿਆ ਗਿਆ ਹੈ।
ਲਿਬਰਲ ਉਮੀਦਵਾਰ ਡੇਅਰਡਰੇ ਪਾਈਕ, ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਉਮੀਦਵਾਰ ਪੀਟਰ ਵੀਜ਼ਨਰ, ਗ੍ਰੀਨ ਪਾਰਟੀ ਦੀ ਉਮੀਦਵਾਰ ਲੂਸੀਆ ਲੈਨਾਨਤੁਓਨੋ ਤੇ ਛੇ ਹੋਰਨਾਂ ਨੂੰ ਮਾਤ ਦਿੰਦਿਆਂ ਜਾਮਾ ਨੇ 55 ਫੀ ਸਦੀ ਵੋਟਾਂ ਹਾਸਲ ਕਰਕੇ ਜਿੱਤ ਦਰਜ ਕਰਵਾਈ।ਕੁੱਝ ਮਾਮਲਿਆਂ ਵਿੱਚ ਆਲੋਚਨਾਂ ਦਾ ਸਿ਼ਕਾਰ ਹੋ ਚੁੱਕੀ ਜਾਮਾ ਦੇ ਜਿੱਤਣ ਦੀ ਉਮੀਦ ਪਹਿਲਾਂ ਹੀ ਕੀਤੀ ਜਾ ਰਹੀ ਸੀ।
ਜਿ਼ਕਰਯੋਗ ਹੈ ਕਿ ਓਨਟਾਰੀਓ ਵਿਧਾਨਸਭਾ ਵਿੱਚ 2004 ਤੋਂ ਹੀ ਹੈਮਿਲਟਨ ਸੈਂਟਰ ਦੀ ਨੁਮਾਇੰਦਗੀ ਹੌਰਵਥ ਵੱਲੋਂ ਕੀਤੀ ਜਾਂਦੀ ਰਹੀ ਹੈ।ਉਹ ਹਮੇਸ਼ਾਂ ਇਸ ਸੀਟ ਤੋਂ ਵੱਡੇ ਫਰਕ ਨਾਲ ਲਗਾਤਾਰ ਜਿੱਤਦੀ ਵੀ ਰਹੀ। ਪਰ ਪਿਛਲੇ ਸਾਲ ਪ੍ਰੋਵਿੰਸ਼ੀਅਲ ਚੋਣਾਂ ਵਿੱਚ ਉਨ੍ਹਾਂ ਦੀ ਪਾਰਟੀ ਵੱਲੋਂ ਵਧੀਆ ਕਾਰਗੁਜ਼ਾਰੀ ਨਾ ਵਿਖਾਏ ਜਾਣ ਤੋਂ ਬਾਅਦ ਉਨ੍ਹਾਂ ਨੇ ਇਸ ਸੀਟ ਤੋਂ ਤੇ ਆਪਣੇ ਲੀਡਰ ਦੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ ਸੀ।