ਮਿਲਟਨ, 15 ਮਾਰਚ (ਪੋਸਟ ਬਿਊਰੋ) : ਮਿਲਟਨ ਵਿੱਚ ਇੱਕ ਮਹਿਲਾ ਉਸ ਸਮੇਂ ਬੁਰੀ ਤਰ੍ਹਾਂ ਝੁਲਸ ਗਈ ਜਦੋਂ ਉਸ ਦੇ ਪਰਿਵਾਰ ਦੀ ਹੀ ਕਿਸੇ ਮੈਂਬਰ ਨੇ ਉਸ ਉੱਤੇ ਕੀਤੇ ਹਮਲੇ ਵਿੱਚ ਕੈਮੀਕਲ ਪਦਾਰਥ ਉਸ ਉੱਤੇ ਪਾ ਦਿੱਤਾ।
ਹਾਲਟਨ ਪੁਲਿਸ ਨੇ ਦੱਸਿਆ ਕਿ 9 ਮਾਰਚ ਨੂੰ ਦੁਪਹਿਰੇ 1:30 ਵਜੇ ਤੋਂ ਪਹਿਲਾਂ ਇੱਕ ਮਹਿਲਾ ਸਾਇਰ ਡਰਾਈਵ ਤੇ ਮੈਕਸਟਿਡ ਕ੍ਰੀਸੈਂਟ ਏਰੀਆ ਵਿੱਚ ਸੈਰ ਕਰ ਰਹੀ ਸੀ ਜਦੋਂ ਇੱਕ ਹੋਰ ਮਹਿਲਾ ਪੈਦਲ ਹੀ ਉਸ ਕੋਲ ਆਈ ਤੇ ਇਸ ਮਸ਼ਕੂਕ ਮਹਿਲਾ ਨੇ ਉਸ ਮਹਿਲਾ ਉੱਤੇ ਕੈਮੀਕਲ ਸੁੱਟ ਦਿੱਤਾ। ਜਿਸ ਕਾਰਨ ਉਸ ਮਹਿਲਾ ਦੇ ਮੂੰਹ ਤੇ ਸਰੀਰ ਬੁਰੀ ਤਰ੍ਹਾਂ ਝੁਲਸ ਗਏ। ਪੁਲਿਸ ਨੇ ਦੱਸਿਆ ਕਿ ਹਮਲਾਵਰ ਮਹਿਲਾ ਨੇ ਜ਼ਖ਼ਮੀ ਮਹਿਲਾ ਦਾ ਫੋਨ ਲਿਆ ਤੇ ਉੱਥੋਂ ਭੱਜ ਗਈ।
ਜ਼ਖ਼ਮੀ ਮਹਿਲਾ ਨੂੰ ਲੋਕਲ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਸ ਦੀ ਹਾਲਤ ਗੰਭੀਰ ਪਰ ਸਥਿਰ ਦੱਸੀ ਜਾਂਦੀ ਹੈ। ਜਾਂਚਕਾਰਾਂ ਨੇ ਮਸ਼ਕੂਕ ਦੀ ਪਛਾਣ ਕਰ ਲਈ ਹੈ ਤੇ ਉਸ ਨੂੰ ਜ਼ਖ਼ਮੀ ਮਹਿਲਾ ਦੀ ਪਰਿਵਾਰਕ ਮੈਂਬਰ ਹੀ ਦੱਸਿਆ ਗਿਆ।ਉਸ ਨੂੰ ਮਾਂਟਰੀਅਲ ਤੋਂ ਹਿਰਾਸਤ ਵਿੱਚ ਲੈ ਲਿਆ ਗਿਆ। ਕਿਊਬਿਕ ਦੀ ਇਸ 57 ਸਾਲਾ ਮਹਿਲਾ ਨੂੰ ਹਮਲਾ ਕਰਨ, ਕੈਮੀਕਲ ਪਦਾਰਥ ਨਾਲ ਹਮਲਾ ਕਰਨ ਤੇ ਡਾਕੇ ਲਈ ਚਾਰਜ ਕੀਤਾ ਗਿਆ ਹੈ। ਉਸ ਨੂੰ ਹਿਰਾਸਤ ਵਿੱਚ ਹੀ ਰੱਖਿਆ ਗਿਆ ਹੈ।