ਟੋਰਾਂਟੋ, 13 ਮਾਰਚ (ਪੋਸਟ ਬਿਊਰੋ) : ਵੋਕਸਵੈਗਨ ਵੱਲੋਂ ਦੱਖਣਪੱਛਮੀ ਓਨਟਾਰੀਓ ਵਿੱਚ ਇਲੈਕਟ੍ਰਿਕ ਵ੍ਹੀਕਲ ਬੈਟਰੀ ਪਲਾਂਟ ਦਾ ਨਿਰਮਾਣ ਕੀਤਾ ਜਾ ਰਿਹਾ ਹੈ। ਇਹ ਐਲਾਨ ਸੋਮਵਾਰ ਨੂੰ ਇਸ ਕਾਰ ਨਿਰਮਾਤਾ ਕੰਪਨੀ ਵੱਲੋਂ ਕੀਤਾ ਗਿਆ।
ਯੂਰਪੀਅਨ ਕਾਰ ਨਿਰਮਾਤਾ ਕੰਪਨੀ ਨੇ ਐਲਾਨ ਕੀਤਾ ਕਿ ਵੋਕਸਵੈਗਨ ਗਰੁੱਪ ਤੇ ਇਸ ਦੀ ਬੈਟਰੀ ਕੰਪਨੀ ਪਾਵਰਕੋ ਆਪਣੀ ਪਹਿਲੀ ਓਵਰਸੀਜ਼ ਗੀਗਾਫੈਕਟਰੀ ਸੇਂਟ ਥਾਮਸ, ਓਨਟਾਰੀਓ ਵਿੱਚ ਲਾਵੇਗੀ। ਇੱਥੇ ਕੰਪਨੀ ਵੱਲੋਂ ਬੈਟਰੀ ਸੈੱਲ ਦਾ ਨਿਰਮਾਣ ਕੀਤਾ ਜਾਵੇਗਾ। ਕੰਪਨੀ ਵੱਲੋਂ 2027 ਲਈ ਇੱਥੇ ਉਤਪਾਦਨ ਦਾ ਟੀਚਾ ਮਿਥਿਆ ਗਿਆ ਹੈ। ਕੰਪਨੀ ਨੇ ਆਖਿਆ ਕਿ ਕੈਨੇਡਾ ਉਨ੍ਹਾਂ ਨੂੰ ਸਾਜ਼ਗਾਰ ਹਾਲਾਤ ਮੁਹੱਈਆ ਕਰਵਾ ਰਿਹਾ ਹੈ, ਜਿਸ ਵਿੱਚ ਕੱਚੇ ਮਾਲ ਦੀ ਲੋਕਲ ਸਪਲਾਈ ਦੇ ਨਾਲ ਨਾਲ ਕਲੀਨ ਇਲੈਕਟ੍ਰਿਸਿਟੀ ਤੱਕ ਪਹੁੰਚ ਵੀ ਸ਼ਾਮਲ ਹੈ।
ਇੱਕ ਬਿਆਨ ਵਿੱਚ ਪਾਵਰਕੋ ਐਸਈ ਦੇ ਸੁਪਰਵਾਈਜ਼ਰੀ ਬੋਰਡ ਦੇ ਚੇਅਰਮੈਨ ਥਾਮਸ ਸਮਾਲ ਨੇ ਆਖਿਆ ਕਿ ਸਾਡੇ ਬੈਟਰੀ ਬਿਜ਼ਨਸ ਤੇ ਗ੍ਰੀਨ ਇਕੌਨਮੀ ਜੌਬਜ਼ ਲਈ ਕੈਨੇਡਾ ਤੇ ਓਨਟਾਰੀਓ ਇੱਕਦਮ ਸਹੀ ਭਾਈਵਾਲ ਹਨ। ਸਥਿਰਤਾ, ਜਿ਼ੰਮੇਵਾਰੀ ਤੇ ਸਹਿਯੋਗ ਸਬੰਧੀ ਸਾਡੀਆਂ ਕਦਰਾਂ ਕੀਮਤਾਂ ਸਾਂਝੀਆਂ ਹਨ। ਉਨ੍ਹਾਂ ਆਖਿਆ ਕਿ ਅਸੀਂ ਸੇਂਟ ਥਾਮਸ ਤੇ ਓਨਟਾਰੀਓ ਦੇ ਲੋਕਾਂ ਲਈ ਭਰੋਸੇਯੋਗ ਭਾਈਵਾਲ ਤੇ ਚੰਗੇ ਗੁਆਂਢੀ ਸਾਬਤ ਹੋਵਾਂਗੇ।
ਇਸ ਦੌਰਾਨ ਓਨਟਾਰੀਓ ਦੇ ਇਕਨੌਮਿਕ ਡਿਵੈਲਪਮੈਂਟ ਮੰਤਰੀ ਵਿੱਕ ਫੈਡੇਲੀ ਨੇ ਆਖਿਆ ਕਿ ਕੈਨੇਡਾ ਨੇ ਇਲੈਕਟ੍ਰਿਕ ਵ੍ਹੀਕਲ ਦੇ ਉਤਪਾਦਨ ਦੇ ਖੇਤਰ ਤੋਂ ਬੈਟਰੀ ਸਪਲਾਈ ਚੇਨ ਵਿੱਚ ਆਲ੍ਹਾ ਦਰਜੇ ਦਾ ਖਿਡਾਰੀ ਬਣਨ ਤੱਕ ਦਾ ਸਫਰ ਬੜੀ ਹੀ ਤੇਜ਼ੀ ਤੇ ਸਫਲਤਾਪੂਰਬਕ ਪੂਰਾ ਕੀਤਾ ਹੈ। ਜਿ਼ਕਰਯੋਗ ਹੈ ਕਿ ਇਹ ਓਨਟਾਰੀਓ ਵਿੱਚ ਲੱਗਣ ਜਾ ਰਹੀ ਦੂਜੀ ਇਲੈਕਟ੍ਰਿਕ ਵ੍ਹੀਕਲ ਬੈਟਰੀ ਫੈਕਟਰੀ ਹੋਵੇਗੀ। ਪਿਛਲੇ ਸਾਲ ਆਟੋ ਨਿਰਮਾਤਾ ਸਟੈਲੈਂਟਿਸ ਤੇ ਦੱਖਣੀ ਕੋਰੀਆ ਦੀ ਬੈਟਰੀ ਨਿਰਮਾਤਾ ਐਲਜੀ ਐਨਰਜੀ ਸੌਲਿਊਸ਼ਨਜ਼ ਵੱਲੋਂ 5 ਬਿਲੀਅਨ ਡਾਲਰ ਦੀ ਲਾਗਤ ਨਾਲ ਵਿੰਡਸਰ, ਓਨਟਾਰੀਓ ਵਿੱਚ ਇੱਕ ਫੈਸਿਲਿਟੀ ਤਿਆਰ ਕੀਤੀ ਜਾ ਰਹੀ ਹੈ। ਫੈਡੇਲੀ ਨੇ ਆਖਿਆ ਕਿ ਇਸ ਨਾਲ ਰੋਜ਼ਗਾਰ ਦੇ ਨਵੇਂ ਰਾਹ ਵੀ ਖੁੱਲ੍ਹਣਗੇ।