ਮਿਸੀਸਾਗਾ, 29 ਜਨਵਰੀ (ਪੋਸਟ ਬਿਊਰੋ) : ਮਿਸੀਸਾਗਾ ਦੀ ਸਾਬਕਾ ਮੇਅਰ ਹੇਜ਼ਲ ਮੈਕੈਲੀਅਨ, ਜਿਨ੍ਹਾਂ ਨੂੰ ਹਰੀਕੇਨ ਹੇਜ਼ਲ ਵਜੋਂ ਵੀ ਜਾਣਿਆ ਜਾਂਦਾ ਸੀ, ਦੀ ਮੌਤ ਹੋ ਗਈ। ਉਹ 101 ਸਾਲਾਂ ਦੀ ਸੀ। ਉਨ੍ਹਾਂ ਦੀ ਮੌਤ ਦੀ ਪੁਸ਼ਟੀ ਉਨ੍ਹਾਂ ਦੇ ਪਰਿਵਾਰ ਵੱਲੋਂ ਕੀਤੀ ਗਈ।
ਇੱਕ ਬਿਆਨ ਵਿੱਚ ਪ੍ਰੀਮੀਅਰ ਡੱਗ ਫੋਰਡ ਨੇ ਆਖਿਆ ਕਿ ਪਰਿਵਾਰ ਦੀ ਬੇਨਤੀ ਉੱਤੇ ਉਹ ਬਹੁਤ ਹੀ ਭਾਰੀ ਮਨ ਨਾਲ ਆਪਣੀ ਬਹੁਤ ਹੀ ਪਿਆਰੀ ਦੋਸਤ ਤੇ ਗੁਰੂ ਹੇਜ਼ਲ ਮੈਕੇਲੀਅਨ ਦੇ ਇਸ ਜਹਾਨ ਤੋਂ ਤੁਰ ਜਾਣ ਦੀ ਖਬਰ ਦਾ ਐਲਾਨ ਕਰਦੇ ਹਨ। ਮੈਕੈਲੀਅਨ ਦੀ ਮੌਤ ਮਿਸੀਸਾਗਾ ਸਥਿਤ ਉਨ੍ਹਾਂ ਦੇ ਘਰ ਵਿੱਚ ਹੀ ਹੋਈ। 14 ਫਰਵਰੀ ਨੂੰ ਉਹ 102 ਸਾਲਾਂ ਦੇ ਹੋਣ ਵਾਲੇ ਸਨ। ਫੋਰਡ ਨੇ ਆਖਿਆ ਕਿ ਹੇਜ਼ਲ ਪਬਲਿਕ ਸਰਵੈਂਟ ਦੀ ਸੱਚੀ ਮਿਸਾਲ ਸੀ। ਉਨ੍ਹਾਂ ਦੀ ਜ਼ਬਰਦਸਤ ਸ਼ਖ਼ਸੀਅਤ ਦਾ ਕਾਇਲ ਹੋਏ ਬਿਨਾਂ ਕੋਈ ਨਹੀਂ ਸੀ ਰਹਿ ਸਕਦਾ। ਉਨ੍ਹਾਂ ਆਖਿਆ ਕਿ ਉਹ ਬਹੁਤ ਖੁਸ਼ਕਿਸਮਤ ਹਨ ਕਿ ਪਿਛਲੇ ਕਈ ਸਾਲਾਂ ਤੋਂ ਹੇਜ਼ਲ ਉਨ੍ਹਾਂ ਦੀ ਦੋਸਤ ਰਹੀ।
ਪਰਿਵਾਰ ਵੱਲੋਂ ਅਜੇ ਮੈਕੇਲੀਅਨ ਦੀਆਂ ਅੰਤਿਮ ਰਸਮਾਂ ਨਿਭਾਉਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ ਪਰ ਪ੍ਰੋਵਿੰਸ ਵੱਲੋਂ ਮੈਕੇਲੀਅਨ ਲਈ ਰਾਜ ਪੱਧਰੀ ਅੰਤਿਮ ਰਸਮਾਂ ਕਰਵਾਉਣ ਦੀ ਪੇਸ਼ਕਸ਼ ਕੀਤੀ ਗਈ ਹੈ।ਇਸ ਦੌਰਾਨ ਮਿਸੀਸਾਗਾ ਦੀ ਮੇਅਰ ਬੌਨੀ ਕ੍ਰੌਂਬੀ ਨੇ ਮੈਕੇਲੀਅਨ ਨੂੰ ਸ਼ਰਧਾਂਜਲੀ ਦਿੰਦਿਆਂ ਆਖਿਆ ਕਿ ਜੇ ਉਨ੍ਹਾਂ ਦੀ ਸਲਾਹ ਤੇ ਸੇਧ ਨਾ ਮਿਲਦੀ ਤਾਂ ਉਨ੍ਹਾਂ ਮੇਅਰ ਨਹੀਂ ਸੀ ਬਣ ਪਾਉਣਾ। ਇਸ ਮੌਕੇ ਟੋਰਾਂਟੋ ਦੇ ਮੇਅਰ ਜੌਹਨ ਟੋਰੀ ਨੇ ਆਖਿਆ ਕਿ ਮੈਕੈਲੀਅਨ ਬਹੁਤ ਹੀ ਜਬ੍ਹੇ ਵਾਲੀ ਮਹਿਲਾ ਸੀ। ਆਪਣੀ ਸਿਟੀ ਲਈ ਕੰਮ ਕਰਵਾਉਣ ਵਾਸਤੇ ਉਹ ਫੈਡਰਲ ਤੇ ਪ੍ਰੋਵਿੰਸ਼ੀਅਲ ਸਰਕਾਰਾਂ ਨਾਲ ਕੰਮ ਕਰਨ ਤੋਂ ਵੀ ਨਹੀਂ ਸੀ ਝਿਜਕਦੀ। ਉਨ੍ਹਾਂ ਨੂੰ ਸੱਤਾ ਦੀ ਤਾਕਤ ਦਾ ਪਤਾ ਸੀ ਤੇ ਜਿੱਥੇ ਲੋੜ ਪੈਂਦੀ ਸੀ ਤਾਂ ਉਹ ਸਰਕਾਰਾਂ ਨੂੰ ਜਵਾਬਦੇਹੀ ਲਈ ਵੀ ਮਜਬੂਰ ਕਰਦੀ ਸੀ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਆਖਿਆ ਕਿ ਮੈਕੇਲੀਅਨ ਹਮੇਸ਼ਾਂ ਚੜ੍ਹਦੀ ਕਲਾ ਵਿੱਚ ਰਹਿਣ ਵਾਲੀ ਮਹਿਲਾ ਸੀ, ਜਿਨ੍ਹਾਂ ਨੇ ਆਪਣੀ ਅਣਥੱਕ ਤੇ ਨਿਸਵਾਰਥ ਸੇਵਾ ਨਾਲ ਅਣਗਿਣਤ ਲੋਕਾਂ ਨੂੰ ਪ੍ਰਭਾਵਿਤ ਕੀਤਾ। ਮੈਕੇਲੀਅਨ ਦਾ ਜਨਮ 14 ਫਰਵਰੀ, 1921 ਨੂੰ ਵੈਲੈਂਟਾਈਨਜ਼ ਡੇਅ ਵਾਲੇ ਦਿਨ ਪੋਰਟ ਡੈਨੀਅਲ, ਕਿਊਬਿਕ ਵਿੱਚ ਹੋਇਆ। ਉਹ 1978 ਤੋਂ 2014 ਤੱਕ ਲਗਾਤਾਰ 36 ਸਾਲ ਮਿਸੀਸਾਗਾ ਦੀ ਮੇਅਰ ਰਹੀ। 93 ਸਾਲਾਂ ਦੀ ਉਮਰ ਵਿੱਚ ਉਨ੍ਹਾਂ ਸਿਆਸਤ ਤੋਂ ਸੰਨਿਆਸ ਲਿਆ। ਸਿਆਸਤ ਛੱਡਣ ਤੋਂ ਬਾਅਦ ਮੈਕੈਲੀਅਨ ਨੂੰ ਸੈ਼ਰੀਡਨ ਕਾਲਜ ਦੀ ਚਾਂਸਲਰ ਨਿਯੁਕਤ ਕੀਤਾ ਗਿਆ ਤੇ ਉਹ ਯੂਨੀਵਰਸਿਟੀ ਆਫ ਟੋਰਾਂਟੋ-ਮਿਸੀਸਾਗਾ ਦੇ ਪ੍ਰਿੰਸੀਪਲ ਦੀ ਸਪੈਸ਼ਲ ਐਡਵਾਈਜ਼ਰ ਵੀ ਬਣੀ।1951 ਵਿੱਚ ਉਨ੍ਹਾਂ ਦਾ ਵਿਆਹ ਸੈਮ ਮੈਕੇਲੀਅਨ ਨਾਲ ਹੋਇਆ ਤੇ ਉਨ੍ਹਾਂ ਦੇ ਤਿੰਨ ਬੱਚੇ ਹੋਏ।1997 ਵਿੱਚ ਉਨ੍ਹਾਂ ਦੇ ਪਤੀ ਦਾ ਦੇਹਾਂਤ ਹੋ ਗਿਆ।