ਲਾਹੌਰ, 4 ਅਗਸਤ (ਪੋਸਟ ਬਿਊਰੋ)- ਪਾਕਿਸਤਾਨ ਦੇ ਲਾਹੌਰ ਸ਼ਹਿਰ ਵਿੱਚ ਇੱਕ ਲੰਬੀ ਅਦਾਲਤੀ ਲੜਾਈ ਦੇ ਬਾਅਦ ਨਾਜ਼ਾਇਜ ਕਾਬਜ਼ ਲੋਕਾਂ ਨੂੰ ਬੇਦਖਲ ਕੀਤੇ ਪਿੱਛੋਂ 1,200 ਸਾਲ ਪੁਰਾਣੇ ਹਿੰਦੂ ਮੰਦਿਰ ਦੀ ਰੈਨੋਵੇਸ਼ਨ ਕੀਤੀ ਜਾਵੇਗੀ। ਇਵੈਕਕਿਊਈ ਟ੍ਰਸਟ ਪ੍ਰਾਪਰਟੀ ਬੋਰਡ (ਈ ਟੀ ਪੀ ਬੀ) ਨੇ ਪਿਛਲੇ ਮਹੀਨੇ ਈਸਾਈ ਪਰਵਾਰ ਤੋਂ ਪ੍ਰਸਿੱਧ ਅਨਾਰਕਲੀ ਬਾਜ਼ਾਰ ਦੇ ਕੋਲ 10 ਮਰਲਾ ਜਮੀਨ ਉੱਤੇ ਬਣੇ ਵਾਲਮੀਕੀ ਮੰਦਰ ਦਾ ਕਬਜ਼ਾ ਵਾਪਸ ਲੈ ਲਿਆ। ਕ੍ਰਿਸ਼ਨ ਮੰਦਰ ਦੇ ਇਲਾਵਾ ਵਾਲਮੀਕੀ ਮੰਦਰ ਲਾਹੌਰ ਵਿੱਚ ਇੱਕੋ ਅਜਿਹਾ ਮੰਦਰ ਹੈ ਜਿਥੇ ਲਗਾਤਾਰ ਪੂਜਾ ਹੁੰਦੀ ਹੈ।
ਈਸਾਈ ਪਰਵਾਰ, ਜੋ ਹਿੰਦੂ ਬਣ ਚੁੱਕਾ ਹੈ, ਪਿਛਲੇ ਦੋ ਦਹਾਕਿਆਂ ਤੋਂ ਕੇਵਲ ਵਾਲਮੀਕੀ ਭਾਈਚਾਰੇੇ ਦੇ ਹਿੰਦੂਆਂ ਨੂੰ ਮੰਦਰ ਵਿੱਚ ਪੂਜਾ ਲਈ ਸਹੂਲਤਾਂ ਦੇ ਰਿਹਾ ਸੀ। ਇਥੇ ਈਸਾਈ ਪਰਵਾਰ 20 ਸਾਲ ਤੋਂ ਵੀ ਜ਼ਿਆਦਾ ਸਮੇਂ ਤਕ ਮੰਦਰ ਵਿੱਚ ਰਹਿ ਰਿਹਾ ਹੈ। ਮੰਦਰ ਦੀ ਜ਼ਮੀਨ ਰੈਵਿਨਿਊ ਰਿਕਾਰਡ ਵਿੱਚ ਈ ਟੀ ਪੀ ਬੀ ਨੂੰ ਟਰਾਂਸਫਰ ਕਰ ਦਿੱਤੀ ਗਈ ਸੀ ਪਰ ਈਸਾਈ ਪਰਵਾਰ ਨੇ 2010-11 ਵਿੱਚ ਜਾਇਦਾਦ ਦੇ ਮਾਲਕ ਹੋਣ ਦਾ ਦਾਅਵਾ ਕਰ ਕੇ ਦੀਵਾਨੀ ਅਦਾਲਤ ਵਿੱਚ ਕੇਸ ਕੀਤਾ ਸੀ। ਅਦਾਲਤ ਨੇ ਅਰਜ਼ੀ ਕਰਤਾ ਨੂੰ ਝੂਠੇ ਦਾਅਵਿਆਂ ਲਈ ਫਟਕਾਰ ਲਾਈ ਸੀ।
ਈ ਟੀ ਪੀ ਬੀ ਦੇ ਬੁਲਾਰੇ ਆਮਿਰ ਹਾਸ਼ਮੀ ਨੇ ਦੱਸਿਆ ਕਿ ਆਉਣ ਵਾਲੇ ਦਿਨਾਂ ਵਿੱਚ ਮਾਸਟਰ ਪਲਾਨ ਦੇ ਤਹਿਤ ਵਾਲਮੀਕੀ ਮੰਦਰ ਦੀ ਰੈਨੋਵੇਸ਼ਨ ਕੀਤੀ ਜਾਵੇਗੀ। ਉਨ੍ਹਾਂ ਨੇ ਕਿਹਾ ਕਿ 100 ਤੋਂ ਜ਼ਿਆਦਾ ਹਿੰਦੂ, ਕੁਝ ਸਿੱਖ ਅਤੇ ਈਸਾਈ ਨੇਤਾ ਕੱਲ੍ਹ ਵਾਲਮੀਕੀ ਮੰਦਰ ਵਿੱਚ ਇਕੱਠੇ ਹੋਏ। ਧਾਰਮਿਕ ਰਸਮਾਂ ਦੇ ਬਾਅਦ ਲੰਗਰ ਲਾਇਆ ਗਿਆ। 1992 ਵਿੱਚ ਭਾਰਤ ਵਿੱਚ ਬਾਬਰੀ ਮਸਜਿਦ ਢਾਹੁਣ ਪਿੱਛੋਂ ਹਥਿਆਰਾਂ ਨਾਲ ਲੈਸ ਗੁਸੇ ਭਰੀ ਭੀੜ ਨੇ ਵਾਲਮੀਕੀ ਮੰਦਰ ਵਿੱਚ ਹਮਲਾ ਬੋਲ ਦਿੱਤਾ ਅਤੇ ਮੰਦਰ ਢਾਹ ਕੇ ਇਮਾਰਤ ਵਿੱਚ ਅੱਗ ਲਾ ਦਿੱਤੀ ਸੀ। ਗੁਆਂਢੀਆਂ ਦੀਆਂ ਦੁਕਾਨਾਂ ਨੂੰ ਵੀ ਅੱਗ ਲਾ ਦਿੱਤੀ ਗਈ ਸੀ ਅਤੇ ਅਧਿਕਾਰੀਆਂ ਨੂੰ ਅੱਗ ਬੁਝਾਉਣ ਵਿੱਚ ਕਈ ਦਿਨ ਲੱਗ ਗਏ ਸੀ।