ਨਵੀਂ ਦਿੱਲੀ, 19 ਸਤੰਬਰ (ਪੋਸਟ ਬਿਊਰੋ)- ਭਾਰਤ ਵੱਲੋਂ ਸਪੇਸ ਵਿੱਚ ਭੇਜੇ ਗਏ ਚੰਦਰਯਾਨ-2 ਦੇ ਲੈਂਡਰ ਵਿਕਰਮ ਦੀ ਚੰਨ ਉੱਤੇ ਸਾਫਟ ਲੈਂਡਿੰਗ ਨਾ ਹੋਣ ਪਿੱਛੋਂ ਕੁਝ ਦਿਨ ਲੰਘਣ ਦੇ ਬਾਅਦ ਲੈਂਡਰ ਨਾਲ ਸੰਪਰਕ ਦੀਆਂ ਆਸਾਂ ਖਤਮ ਹੋ ਰਹੀਆਂ ਹਨ, ਪਰ ਨਾਸਾ ਦੀ ਕੋਸ਼ਿਸ਼ ਨੇ ਫਿਰ ਆਸ ਜਗਾਈ ਹੈ। ਅਮਰੀਕੀ ਏਜੰਸੀ ਨਾਸਾ ਨੇ ਚੰਦਰਮਾ ਆਰਬਿਟਰ ਵੱਲੋਂ ਚੰਨ ਦੇ ਉਸ ਹਿੱਸੇ ਦੀਆਂ ਫੋਟੋ ਖਿੱਚੀਆਂ ਹਨ, ਜਿੱਥੇ ਲੈਂਡਰ ਨੇ ਸਾਫਟ ਲੈਂਡਿੰਗ ਦੀ ਕੋਸ਼ਿਸ਼ ਕੀਤੀ ਸੀ।
ਅਮਰੀਕੀ ਪੁਲਾੜ ਏਜੰਸੀ ਨਾਲ ਸੰਬੰਧਤ ਇੱਕ ਪ੍ਰਾਜੈਕਟ ਸਾਇੰਟਿਸਟ ਦੇ ਹਵਾਲੇ ਨਾਲ ਮੀਡੀਆ ਨੇ ਤਾਜ਼ਾ ਖਬਰ ਦਿੱਤੀ ਹੈ ਕਿ ਨਾਸਾ ਦੇ ਲੂਨਰ ਰਿਕਾਨਾਇਸੈਂਸ ਆਰਬਿਟਰ (ਐੱਲ ਆਰ ਓ) ਦੇ ਪੁਲਾੜ ਜਹਾਜ਼ ਨੇ ਚੰਦ ਦੇ ਅਛੂਤੇ ਦੱਖਣ ਸਿਰੇ ਕੋਲੋਂ ਲੰਘਣ ਵੇਲੇ ਓਥੋਂ ਕਈ ਫੋਟੋ ਲਈਆਂ, ਜਿੱਥੇ ਭਾਰਤ ਦੇ ਲੈਂਡਰ ਵਿਕਰਮ ਨੇ ਉੱਤਰਨ ਦੀ ਕੋਸ਼ਿਸ਼ ਕੀਤੀ ਸੀ। ਐਲ ਆਰ ਓ ਦੇ ਡਿਪਟੀ ਪ੍ਰਾਜੈਕਟ ਸਾਇੰਟਿਸਟ ਜਾਨ ਕੈਲੀ ਨੇ ਨਾਸਾ ਦਾ ਬਿਆਨ ਸਾਂਝਾ ਕੀਤਾ, ਜਿਸ ਵਿੱਚ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਆਰਬਿਟਰ ਦੇ ਕੈਮਰੇ ਨੇ ਫੋਟੋ ਲਈਆਂ ਹਨ। ਇਸ ਪਿੱਛੋਂ ਸੀਨੇਟ ਡਾਟ ਕਾਮ ਨੇ ਕੈਲੀ ਦੇ ਹਵਾਲੇ ਨਾਲ ਕਿਹਾ ਕਿ ਨਾਸਾ ਦੀ ਟੀਮ ਇਨ੍ਹਾਂ ਨਵੀਂ ਤਸਵੀਰਾਂ ਦਾ ਵਿਸ਼ਲੇਸ਼ਣ ਕਰੇਗੀ ਅਤੇ ਪਹਿਲੀਆਂ ਤਸਵੀਰਾਂ ਨਾਲ ਉਨ੍ਹਾਂ ਨੂੰ ਮਿਲਾ ਕੇ ਦੇਖੇਗੀ ਕਿ ਕੀ ਲੈਂਡਰ ਨਜ਼ਰ ਆ ਰਿਹਾ ਹੈ। ਰਿਪੋਰਟ ਮੁਤਾਬਕ ਨਾਸਾ ਇਸ ਦ੍ਰਿਸ਼ ਦਾ ਵਿਸ਼ਲੇਸ਼ਣ ਅਤੇ ਸਰਟੀਫਿਕੇਸ਼ਨ ਕਰ ਰਿਹਾ ਹੈ। ਉਸ ਸਮੇਂ ਚੰਦ ਉੱਤੇ ਸ਼ਾਮ ਦਾ ਸਮਾਂ ਸੀ, ਜਦੋਂ ਆਰਬਿਟਰ ਓਥੋਂ ਗੁਜਰਿਆ ਸੀ, ਜਿਸ ਦਾ ਮਤਲਬ ਹੈ ਕਿ ਇਲਾਕੇ ਦਾ ਜਿਆਦਾ ਹਿੱਸਾ ਤਸਵੀਰ ਵਿੱਚ ਕੈਦ ਹੋਇਆ ਹੋਵੇਗਾ।