ਅਹਿਮਦਾਬਾਦ, 24 ਜੂਨ (ਪੋਸਟ ਬਿਊਰੋ): ਦੇਸ਼ ਦੇ 12 ਰਾਜਾਂ ਵਿੱਚ ਬੰਬ ਧਮਾਕੇ ਦੀ ਧਮਕੀ ਦੇਣ ਵਾਲੀ ਲੜਕੀ ਨੂੰ ਅਹਿਮਦਾਬਾਦ ਪੁਲਿਸ ਨੇ ਚੇਨਈ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲਿਸ ਅਨੁਸਾਰ ਗ੍ਰਿਫ਼ਤਾਰ ਕੀਤੀ ਗਈ ਕੁੜੀ ਰੇਨੀ ਜੋਸ਼ੀਲਡਾ ਆਪਣੇ ਦਫ਼ਤਰ ਦੇ ਇੱਕ ਨੌਜਵਾਨ ਨਾਲ ਇੱਕ ਪਾਸੜ ਪਿਆਰ ਕਰਦੀ ਸੀ, ਪਰ ਨੌਜਵਾਨ ਨੇ ਦੂਜੀ ਲੜਕੀ ਨਾਲ ਵਿਆਹ ਕਰਵਾ ਲਿਆ।
ਰੇਨੀ ਨੇ ਨੌਜਵਾਨਾਂ ਨੂੰ ਫਸਾਉਣ ਲਈ ਸਿਰਫ਼ ਧਮਕੀ ਭਰੇ ਈਮੇਲ ਭੇਜੇ। ਇਨ੍ਹਾਂ ਵਿੱਚ ਅਹਿਮਦਾਬਾਦ ਦੇ ਨਰਿੰਦਰ ਮੋਦੀ ਸਟੇਡੀਅਮ ਅਤੇ ਗੁਜਰਾਤ ਦੇ ਜੈਪੁਰ ਦੇ ਐੱਮਐੱਮਐੱਸ ਸਟੇਡੀਅਮ ਵਿੱਚ ਧਮਾਕੇ ਦੀਆਂ ਧਮਕੀਆਂ ਸ਼ਾਮਿਲ ਹਨ। ਇਸ ਤੋਂ ਇਲਾਵਾ, ਏਅਰ ਇੰਡੀਆ ਜਹਾਜ਼ ਹਾਦਸੇ ਤੋਂ ਬਾਅਦ ਵੀ ਇੱਕ ਮੇਲ ਭੇਜਿਆ ਗਿਆ ਸੀ ਅਤੇ ਜਿ਼ੰਮੇਵਾਰੀ ਲਈ ਗਈ ਸੀ।
ਅੱਜ (ਮੰਗਲਵਾਰ) ਵੀ ਗੁਜਰਾਤ ਹਾਈ ਕੋਰਟ ਨੂੰ ਇੱਕ ਧਮਕੀ ਭਰਿਆ ਈਮੇਲ ਮਿਲਿਆ ਹੈ, ਜਿਸ ਵਿੱਚ ਰੇਨੀ ਦਾ ਨਾਮ ਵੀ ਵਰਤਿਆ ਗਿਆ ਹੈ। ਰੇਨੀ ਨੂੰ ਚੇਨਈ ਤੋਂ ਗ੍ਰਿਫ਼ਤਾਰ ਕਰਕੇ ਅਹਿਮਦਾਬਾਦ ਲਿਆਂਦਾ ਜਾ ਰਿਹਾ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਇਹ ਇੱਕ ਸ਼ਡਿਊਲਡ ਮੇਲ ਹੋ ਸਕਦਾ ਹੈ।
ਚੇਨੱਈ ਦੀ ਰਹਿਣ ਵਾਲੀ ਰੇਨੀ ਜੋਸ਼ੀਲਡਾ ਰੋਬੋਟਿਕਸ ਵਿੱਚ ਗ੍ਰੈਜੂਏਟ ਹੈ। ਵਰਤਮਾਨ ਵਿੱਚ ਉਹ ਡੇਲੋਇਟ ਵਿੱਚ ਇੱਕ ਸੀਨੀਅਰ ਸਲਾਹਕਾਰ ਵਜੋਂ ਕੰਮ ਕਰਦੀ ਹੈ। ਰੇਨੀ ਨੇ ਆਪਣੀ ਪਛਾਣ ਅਤੇ ਪਤਾ ਲੁਕਾਉਣ ਲਈ ਨਕਲੀ ਈਮੇਲ ਆਈਡੀ, ਵਰਚੁਅਲ ਪ੍ਰਾਈਵੇਟ ਨੈੱਟਵਰਕ ਅਤੇ ਡਾਰਕ ਵੈੱਬ ਦੀ ਵਰਤੋਂ ਕੀਤੀ।