ਨਵੀਂ ਦਿੱਲੀ, 16 ਜੁਲਾਈ (ਪੋਸਟ ਬਿਊਰੋ): ਭਾਰਤ `ਚ ਆਪਣੇ ਪਹਿਲੇ ਸ਼ੋਅਰੂਮ ਦੀ ਸ਼ੁਰੂਆਤ ਦੇ ਨਾਲ ਟੇਸਲਾ ਨੇ ਦੇਸ਼ ‘ਚ ਆਪਣੀ ਪਹਿਲੀ ਇਲੈਕਟ੍ਰਿਕ ਕਾਰ ਮਾਡਲ ਵਾਈ ਲਾਂਚ ਕੀਤੀ ਹੈ। ਕੰਪਨੀ ਨੇ ਇਸ ਕਾਰ ਦੀ ਕੀਮਤ ਲਗਭਗ 60 ਲੱਖ ਰੁਪਏ (ਐਕਸ-ਸ਼ੋਰੂਮ) ਰੱਖੀ ਹੈ। ਟੇਸਲਾ ਦਾ ਪਹਿਲਾ ਸ਼ੋਅਰੂਮ ਮੁੰਬਈ `ਚ ਬਾਂਦਰਾ ਕੁਰਲਾ ਕੰਪਲੈਕਸ (ਬੀਕੇਸੀ) ਦੇ ਮੈਕਸਿਟੀ ਮਾਲ `ਚ ਖੁੱਲ੍ਹਿਆ ਹੈ। ਜਾਣਕਾਰੀ ਮੁਤਾਬਕ ਗਾਹਕਾਂ ਨੂੰ ਇਸ ਕਾਰ ਦੀ ਡਿਲੀਵਰੀ ਇਸ ਸਾਲ ਸਤੰਬਰ ਤੱਕ ਸ਼ੁਰੂ ਹੋ ਜਾਵੇਗੀ।
ਕੰਪਨੀ ਦੀ ਅਧਿਕਾਰਤ ਵੈੱਬਸਾਈਟ ਦੇ ਮੁਤਾਬਕ ਮੁੰਬਈ, ਦਿੱਲੀ ਅਤੇ ਗੁਰੂਗ੍ਰਾਮ ਲਈ ਮਾਡਲ ਦੀ ਬੁਕਿੰਗ ਸ਼ੁਰੂ ਕਰ ਦਿੱਤੀ ਗਈ ਹੈ। ਅਧਿਕਾਰਤ ਵੈੱਬਸਾਈਟ ਦੇ ਮੁਤਾਬਕ ਗਾਹਕਾਂ ਨੂੰ ਇਸ ਕਾਰ ਦੇ ਫੁੱਲ-ਸੈਲਫ ਡਰਾਈਵਿੰਗ ਵੇਰੀਐਂਟ ਲਈ ਵੱਖਰੇ ਤੌਰ ‘ਤੇ 6 ਲੱਖ ਰੁਪਏ ਦੇਣੇ ਪੈਣਗੇ।
ਇਸ ਇਲੈਕਟ੍ਰਿਕ ਕਾਰ ਨੂੰ ਦੋ ਵੱਖ-ਵੱਖ ਵੇਰੀਐਂਟਾਂ ‘ਚ ਪੇਸ਼ ਕੀਤਾ ਗਿਆ ਹੈ ਲੌਂਗ ਰੇਂਜ ਆਲ ਵ੍ਹੀਲ ਡਰਾਈਵ ਅਤੇ ਲੌਂਗ ਰੇਂਜ ਰੀਅਰ ਵ੍ਹੀਲ ਡਰਾਈਵ। ਇਸਦੇ ਵੇਰੀਐਂਟ ‘ਚ ਇੱਕ ਸਿੰਗਲ ਇਲੈਕਟ੍ਰਿਕ ਮੋਟਰ ਹੈ, ਜੋ ਲਗਭਗ 295 ਦੀ ਪਾਵਰ ਅਤੇ 420 ਦਾ ਟਾਰਕ ਪੈਦਾ ਕਰਦੀ ਹੈ। ਇਸਦੀ ਪ੍ਰਮਾਣਿਤ ਰੇਂਜ 500 ਕਿਲੋਮੀਟਰ ਦੱਸੀ ਜਾਂਦੀ ਹੈ। ਕਾਰ ਨੂੰ 0 ਤੋਂ 100 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਫੜਨ ‘ਚ ਸਿਰਫ਼ 5.6 ਸਕਿੰਟ ਲੱਗਦੇ ਹਨ।
ਲੰਬੀ ਰੇਂਜ ਵਾਲੇ ਵੇਰੀਐਂਟ ਦੀ ਗੱਲ ਕਰੀਏ ਤਾਂ ਇਸਦੀ ਪ੍ਰਮਾਣਿਤ ਡਰਾਈਵਿੰਗ ਰੇਂਜ 622 ਕਿਲੋਮੀਟਰ ਹੈ। ਇਸ ਦੇ ਨਾਲ ਹੀ, ਇਸਦਾ ਮੋਟਰ 384 ਪਾਵਰ ਅਤੇ 510 ਟਾਰਕ ਪੈਦਾ ਕਰਦਾ ਹੈ। ਇਸਦੀ ਟਾਪ ਸਪੀਡ 217 ਕਿਲੋਮੀਟਰ ਪ੍ਰਤੀ ਘੰਟਾ ਦੱਸੀ ਜਾਂਦੀ ਹੈ।
ਟੈਸਲਾ ਨੇ ਆਪਣੀਆਂ ਮਾਡਲ ਕਾਰਾਂ ਨੂੰ ਤੇਜ਼ ਚਾਰਜਿੰਗ ਤਕਨਾਲੋਜੀ ਨਾਲ ਲੈਸ ਕੀਤਾ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਹ ਕਾਰ ਸਿਰਫ਼ 15 ਮਿੰਟਾਂ ‘ਚ 238 ਕਿਲੋਮੀਟਰ ਤੱਕ ਚੱਲਣ ਲਈ ਚਾਰਜ ਹੋ ਜਾਂਦੀ ਹੈ।
ਟੇਸਲਾ ਮਾਡਲ ਦੇ ਸਾਰੇ ਵੇਰੀਐਂਟ ਲੈਵਲ-2 ਡਰਾਈਵਿੰਗ ਤਕਨਾਲੋਜੀ ਨਾਲ ਲੈਸ ਹਨ। ਇਸ ‘ਚ ਅੱਗੇ ਟੱਕਰ ਚੇਤਾਵਨੀ, ਆਟੋਮੈਟਿਕ ਐਮਰਜੈਂਸੀ ਬ੍ਰੇਕਿੰਗ, ਲੇਨ ਕੀਪ ਅਸਿਸਟ, ਸਪੀਡ ਲਿਮਟ ਅਸਿਸਟ ਵਰਗੀਆਂ ਕਈ ਵਿਸ਼ੇਸ਼ਤਾਵਾਂ ਹਨ। ਇਸ ਤੋਂ ਇਲਾਵਾ, ਕਾਰ ‘ਚ ਮਿਆਰੀ ਵਜੋਂ 6 ਏਅਰਬੈਗ ਵੀ ਦਿੱਤੇ ਗਏ ਹਨ।