ਮੁੰਬਈ, 18 ਜੂਨ (ਪੋਸਟ ਬਿਊਰੋ): ਮਹਾਰਾਸ਼ਟਰ ਦੇ ਪਾਲਘਰ 'ਚ ਮੰਗਲਵਾਰ ਦੀ ਸਵੇਰ ਨੂੰ ਇਕ 20 ਸਾਲਾ ਲੜਕੀ ਦਾ ਉਸ ਦੇ ਪ੍ਰੇਮੀ ਨੇ ਪਾਨੇ ਨਾਲ ਵਾਰ ਕਰਕੇ ਕਤਲ ਕਰ ਦਿੱਤਾ। ਵਸਈ ਦੇ ਚਿੰਚਪਾੜਾ ਇਲਾਕੇ 'ਚ ਸਵੇਰੇ 8:30 ਵਜੇ ਹੋਏ ਇਸ ਕਤਲ ਦਾ ਵੀਡੀਓ ਸਾਹਮਣੇ ਆਇਆ ਹੈ। ਇਸ ਵੀਡੀਓ 'ਚ ਦੋਸ਼ੀ ਰੋਹਿਤ ਯਾਦਵ ਪਿੱਛੇ ਤੋਂ ਭੱਜਦਾ ਨਜ਼ਰ ਆ ਰਿਹਾ ਹੈ।
ਬਾਅਦ ਵਿੱਚ ਉਸਨੇ 30 ਸਕਿੰਟਾਂ ਵਿੱਚ ਲਗਭਗ 15 ਵਾਰ ਲੜਕੀ ਦੇ ਸਿਰ 'ਤੇ ਵਾਰ ਕੀਤਾ। ਇੱਕ ਲੋਹੇ ਦਾ ਪਾਨਾ (ਨਟ ਅਤੇ ਬੋਲਟ ਨੂੰ ਕੱਸਣ ਵਾਲਾ ਸੰਦ) ਉਸਦੇ ਸਿਰ 'ਤੇ ਵੱਜਣ ਤੋਂ ਬਾਅਦ ਲੜਕੀ ਬੇਹੋਸ਼ ਹੋ ਜਾਂਦੀ ਹੈ। ਇਸ ਦੇ ਬਾਵਜੂਦ ਮੁਲਜ਼ਮ ਰੋਹਿਤ ਉਸ ਨੂੰ ਕੁੱਟਦਾ ਰਹਿੰਦਾ ਹੈ। ਇਨਾ ਹੀ ਨਹੀਂ ਕੁਝ ਦੇਰ ਬਾਅਦ ਉਹ ਲਾਸ਼ ਕੋਲ ਬੈਠ ਕੇ ਗੱਲਾਂ ਕਰਨ ਲੱਗ ਪਿਆ।
ਸ਼ਰੇਆਮ ਹੋਏ ਇਸ ਕਤਲ ਦੇ ਸਬੰਧ ਵਿੱਚ ਵਾਲੀਵ ਥਾਣੇ ਵਿੱਚ ਕੇਸ ਦਰਜ ਕੀਤਾ ਗਿਆ ਹੈ। ਪੁਲਸ ਨੇ ਲਾਸ਼ ਨੂੰ ਪੋਸਟਮਾਰਟਮ ਲਈ ਭੇਜ ਦਿੱਤਾ ਹੈ ਅਤੇ ਮੁਲਜ਼ਮ ਨੂੰ ਪੁੱਛਗਿੱਛ ਲਈ ਹਿਰਾਸਤ 'ਚ ਲੈ ਲਿਆ ਹੈ।
ਪੁਲਸ ਨੇ ਦੱਸਿਆ ਕਿ ਰੋਹਿਤ ਅਤੇ ਆਰਤੀ ਦੋਵੇਂ ਇਕੱਠੇ ਕੰਮ 'ਤੇ ਜਾ ਰਹੇ ਸਨ ਤਾਂ ਰਸਤੇ 'ਚ ਉਨ੍ਹਾਂ ਦੀ ਲੜਾਈ ਹੋ ਗਈ। ਇਸ ਤੋਂ ਬਾਅਦ ਰੋਹਿਤ ਪਾਨਾ ਲੈ ਕੇ ਭੱਜਿਆ ਅਤੇ ਆਰਤੀ ਦੇ ਸਿਰ 'ਤੇ ਪਿੱਛੇ ਤੋਂਂ ਜ਼ੋਰ ਨਾਲ ਮਾਰਿਆ। ਮੁਲਜ਼ਮ ਆਰਤੀ ਦੇ ਸਿਰ 'ਤੇ ਉਦੋਂ ਤੱਕ ਮਾਰਦਾ ਰਿਹਾ, ਜਦੋਂ ਤੱਕ ਉਸ ਦੀ ਮੌਤ ਨਹੀਂ ਹੋ ਗਈ।