ਚੁਰੂ, 19 ਨਵੰਬਰ (ਪੋਸਟ ਬਿਊਰੋ): ਵੀ.ਆਈ.ਪੀ. ਡਿਊਟੀ ਲਈ ਝੁੰਝੁਨੂੰ ਜਾ ਰਹੇ ਪੁਲਿਸ ਮੁਲਾਜ਼ਮਾਂ ਦੀ ਕਾਰ ਇੱਕ ਟਰੱਕ ਨਾਲ ਟਕਰਾ ਗਈ। ਇਸ ਹਾਦਸੇ ਵਿਚ 6 ਪੁਲਸ ਮੁਲਾਜ਼ਮਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ, ਜਦਕਿ 1 ਜ਼ਖਮੀ ਹੋ ਗਿਆ। ਹਾਦਸਾ ਇਨਾ ਜ਼ਬਰਦਸਤ ਸੀ ਕਿ ਕਾਰ ਦਾ ਅਗਲਾ ਹਿੱਸਾ ਚਕਨਾਚੂਰ ਹੋ ਗਿਆ। ਇਹ ਹਾਦਸਾ ਚੁਰੂ ਜਿ਼ਲ੍ਹੇ ਦੇ ਸੁਜਾਨਗੜ੍ਹ ਸਦਰ ਥਾਣਾ ਖੇਤਰ ਵਿੱਚ ਵਾਪਰਿਆ।
ਜਾਣਕਾਰੀ ਮੁਤਾਬਕ ਨਾਗੌਰ ਦੇ ਖਿਨਵਸਰ ਥਾਣੇ ਦੇ 6 ਪੁਲਸ ਕਰਮਚਾਰੀ ਅਤੇ ਮਹਿਲਾ ਥਾਣੇ ਦਾ ਇਕ ਪੁਲਸ ਕਰਮਚਾਰੀ ਝੁੰਝੁਨੂ ਵਿਚ ਹੋਣ ਵਾਲੀ ਪ੍ਰਧਾਨ ਮੰਤਰੀ ਮੋਦੀ ਦੀ ਰੈਲੀ ਵਿਚ ਡਿਊਟੀ 'ਤੇ ਸਨ। ਸਾਰੇ ਲੋਕ ਜ਼ਾਈਲੋ ਕਾਰ 'ਚ ਝੁੰਝਨੂ ਜਾ ਰਹੇ ਸਨ। ਇਸ ਦੌਰਾਨ ਸੁਜਾਨਗੜ੍ਹ ਸਦਰ ਥਾਣੇ ਦੀ ਕਨੂਟਾ ਚੌਕੀ ਨੇੜੇ ਨੈਸ਼ਨਲ ਹਾਈਵੇਅ 58 'ਤੇ ਉਨ੍ਹਾਂ ਦੀ ਕਾਰ ਦੀ ਟੱਕਰ ਇਕ ਟਰੱਕ ਨਾਲ ਹੋ ਗਈ।
ਸਵੇਰੇ 5:30 ਵਜੇ ਵਾਪਰੇ ਇਸ ਹਾਦਸੇ ਵਿੱਚ ਗੱਡੀ ਦਾ ਅਗਲਾ ਹਿੱਸਾ ਪੂਰੀ ਤਰ੍ਹਾਂ ਚਕਨਾਚੂਰ ਹੋ ਗਿਆ ਅਤੇ ਸਾਰੇ ਪੁਲਿਸ ਮੁਲਾਜ਼ਮ ਅੰਦਰ ਹੀ ਫਸ ਗਏ। ਹਾਦਸੇ 'ਚ ਜ਼ਖਮੀ ਹੋਏ ਪੁਲਸ ਕਰਮਚਾਰੀਆਂ ਨੂੰ ਘਟਨਾ ਵਾਲੀ ਥਾਂ ਤੋਂ ਗ੍ਰੀਨ ਕੋਰੀਡੋਰ ਬਣਾ ਕੇ ਜੋਧਪੁਰ ਭੇਜਿਆ ਗਿਆ ਪਰ ਰਸਤੇ 'ਚ ਇਕ ਦੀ ਮੌਤ ਹੋ ਗਈ।
ਮੌਕੇ 'ਤੇ ਮਰਨ ਵਾਲੇ ਪੁਲਿਸ ਮੁਲਾਜ਼ਮਾਂ ਦੀ ਪਛਾਣ ਖਿਨਵਸਰ ਥਾਣੇ ਦੇ ਏਐੱਸਆਈ ਰਾਮਚੰਦਰ, ਕਾਂਸਟੇਬਲ ਕੁੰਭਰਾਮ, ਸੁਰੇਸ਼ ਮੀਨਾ, ਥਨਾਰਾਮ ਅਤੇ ਮਹਿਲਾ ਥਾਣੇ ਦੇ ਕਾਂਸਟੇਬਲ ਮਹਿੰਦਰ ਵਜੋਂ ਹੋਈ ਹੈ। ਹਾਦਸੇ ਵਿਚ ਹੈੱਡ ਕਾਂਸਟੇਬਲ ਸੁਖਰਾਮ ਅਤੇ ਖਿਨਵਸਰ ਥਾਣੇ ਦੇ ਕਾਂਸਟੇਬਲ ਸੁਖਾਰਾਮ ਜ਼ਖਮੀ ਹੋ ਗਏ, ਜਿਨ੍ਹਾਂ ਨੂੰ ਜੋਧਪੁਰ ਰੈਫਰ ਕਰ ਦਿੱਤਾ ਗਿਆ। ਜੋਧਪੁਰ ਲਿਜਾਂਦੇ ਸਮੇਂ ਕਾਂਸਟੇਬਲ ਸੁਖਰਾਮ ਦੀ ਵੀ ਮੌਤ ਹੋ ਗਈ। ਪੁਲਿਸ ਨੇ ਮ੍ਰਿਤਕਾਂ ਦੀਆਂ ਲਾਸ਼ਾਂ ਨੂੰ ਕਨੂਤਾ ਸੀਐੱਚਸੀ ਵਿੱਚ ਰੱਖਵਾ ਦਿੱਤਾ ਹੈ।