ਨੈਸ਼ਵਿੱਲ, 27 ਮਾਰਚ (ਪੋਸਟ ਬਿਊਰੋ) : ਸੋਮਵਾਰ ਨੂੰ ਅਸਾਲਟ ਸਟਾਈਲ ਰਾਈਫਲਾਂ ਤੇ ਇੱਕ ਪਿਸਟਲ ਲੈ ਕੇ ਨੈਸ਼ਵਿੱਲ ਦੇ ਪ੍ਰਾਈਵੇਟ ਕ੍ਰਿਸਚੀਅਨ ਸਕੂਲ ਪਹੁੰਚੀ ਇੱਕ ਮਹਿਲਾ ਨੇ ਤਿੰਨ ਵਿਦਿਆਰਥੀਆਂ ਤੇ ਤਿੰਨ ਬਾਲਗਾਂ ਦੀ ਜਾਨ ਲੈ ਲਈ।
ਕੌਨਵੈਂਟ ਸਕੂਲ ਵਿੱਚ ਇਸ ਹਿੰਸਕ ਘਟਨਾ ਨੂੰ ਅੰਜਾਮ ਦੇਣ ਵਾਲੀ ਮਸ਼ਕੂਕ ਨੂੰ ਵੀ ਪੁਲਿਸ ਵੱਲੋਂ ਗੋਲੀ ਮਾਰ ਕੇ ਮੌਤ ਦੇ ਘਾਟ ਉਤਾਰ ਦਿੱਤਾ ਗਿਆ। ਪ੍ਰੀਸਕੂਲ ਤੋਂ ਛੇਵੀਂ ਕਲਾਸ ਤੱਕ ਇਸ ਸਕੂਲ ਵਿੱਚ 200 ਵਿਦਿਆਰਥੀ ਹਨ। ਪੁਲਿਸ ਨੇ ਦੱਸਿਆ ਕਿ ਸ਼ੂਟਰ ਨੈਸ਼ਵਿੱਲ ਤੋਂ ਹੀ 28 ਸਾਲਾਂ ਦੀ ਮਹਿਲਾ ਸੀ। ਅਧਿਕਾਰੀ ਉਸ ਦੀ ਪਛਾਣ ਕਰਨ ਦੀ ਕੋਸਿ਼ਸ਼ ਕਰ ਰਹੇ ਹਨ ਤੇ ਇਹ ਵੀ ਪਤਾ ਲਾਉਣ ਦੀ ਕੋਸਿ਼ਸ਼ ਕੀਤੀ ਜਾ ਰਹੀ ਹੈ ਕਿ ਕੀ ਸਕੂਲ ਨਾਲ ਉਸ ਦਾ ਪਹਿਲਾਂ ਕੋਈ ਸਬੰਧ ਸੀ।
ਵੈਂਡਰਬਿਲਟ ਯੂਨੀਵਰਸਿਟੀ ਮੈਡੀਕਲ ਸੈਂਟਰ ਦੇ ਬੁਲਾਰੇ ਕ੍ਰੇਗ ਬੋਇਰਨਰ ਅਨੁਸਾਰ ਨੈਸ਼ਵਿੱਲ ਵਿੱਚ ਜਿਨ੍ਹਾਂ ਵਿਦਿਆਰਥੀਆਂ ਤੇ ਬਾਲਗਾਂ ਨੂੰ ਗੋਲੀਆਂ ਲੱਗੀਆਂ ਉਨ੍ਹਾਂ ਨੂੰ ਮੁਨਰੋਕੈਰਲ ਜੂਨੀਅਰ ਚਿਲਡਰਨਜ਼ ਹਸਪਤਾਲ ਵਿੱਚ ਲਿਆਉਣ ਉੱਤੇ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਹੋਰਨਾਂ ਵਿਦਿਆਰਥੀਆਂ ਨੂੰ ਸੁਰੱਖਿਅਤ ਥਾਂਵਾਂ ਉੱਤੇ ਪਹੁੰਚਾ ਦਿੱਤਾ ਗਿਆ। ਪੁਲਿਸ ਦੀਆਂ ਕਾਰਾਂ ਨਾਲ ਘਿਰੇ ਵਿਦਿਆਰਥੀਆਂ ਨੂੰ ਨੇੜਲੇ ਚਰਚ ਵਿੱਚ ਪਹੁੰਚਾਇਆ ਗਿਆ ਜਿੱਥੋਂ ਉਨ੍ਹਾਂ ਦੇ ਮਾਪੇ ਉਨ੍ਹਾਂ ਨੂੰ ਲੈ ਗਏ।