ਨਵੀਂ ਦਿੱਲੀ, 27 ਮਾਰਚ (ਪੋਸਟ ਬਿਊਰੋ): ਬਾਂਧਵਗੜ੍ਹ ਟਾਈਗਰ ਰਿਜ਼ਰਵ ਵਲੋਂ ਅਲੋਪ ਹੋ ਚੁੱਕੇ ਬਾਰਾਂਸਿੰਗਾ ਨੂੰ ਇੱਕ ਵਾਰ ਫੇਰ ਬਾਂਧਵਗੜ੍ਹ ਵਿਚ ਬਸਾਉਣ ਦੇ ਚੁਣੌਤੀ ਭਰਪੂਰ ਪ੍ਰਾਜੈਕਟ ਉੱਤੇ ਵਣ ਵਿਭਾਗ ਨੇ ਅਮਲ ਸ਼ੁਰੂ ਕਰ ਦਿੱਤਾ ਹੈ। ਕਾਂਹਾ ਤੋਂ ਬਾਂਧਵਗੜ੍ਹ ਪਹੁੰਚੀ 19 ਬਾਰਾਂਸਿੰਗਾ ਦੀ ਪਹਿਲੀ ਖੇਪ ਨਾਲ ਇਸਦੀ ਸ਼ੁਰੁਆਤ ਕਰ ਦਿੱਤੀ ਗਈ ਹੈ। ਅਗਲੇ ਤਿੰਨ ਸਾਲਾਂ ਦੌਰਾਨ 100 ਬਾਰਾਂਸਿੰਗਾ ਕਾਂਹਾ ਤੋਂ ਲਿਆਕੇ ਬਾਂਧਵਗੜ੍ਹ ਵਿਚ ਬਸਾਏ ਜਾਣਗੇ । ਇਸ ਲਈ ਟਾਈਗਰ ਰਿਜ਼ਰਵ ਪ੍ਰਬੰਧਨ ਵਲੋਂ ਖਾਸ ਇੰਤਜ਼ਾਮ ਕੀਤੇ ਗਏ ਹਨ।
ਬਾਂਧਵਗੜ੍ਹ ਵਿਚ ਬਾਰਾਂਸਿੰਗਾ ਨੂੰ ਰੱਖਣ ਲਈ 50 ਹੇਕਟੇਅਰ ਖੇਤਰ ਵਿਚ ਵੱਡਾ ਇਨਕਲੋਜ਼ਰ ਬਾੜਾ ਤਿਆਰ ਕੀਤਾ ਗਿਆ ਹੈ। ਇੱਥੇ ਇਨ੍ਹਾਂ ਬਾਰਾਂਸਿੰਗਾ ਨੂੰ ਰੱਖਿਆ ਜਾਵੇਗਾ। ਇਨਕਲੋਜ਼ਰ ਦਾ ਡਿਜ਼ਾਇਨ ਇਸ ਤਰੀਕੇ ਨਾਲ ਤਿਆਰ ਕੀਤਾ ਗਿਆ ਹੈ ਕਿ ਇਸ ਵਿਚ ਬਾਘ ਦੇ ਨਾਲ ਹੀ ਅਜਗਰ ਵਰਗੇ ਸੱਪ ਵੀ ਪ੍ਰਵੇਸ਼ ਨਹੀਂ ਕਰ ਸਕਣਗੇ। ਤਿੰਨ ਸਾਲ ਬਾਅਦ ਜਦੋਂ ਇਹ ਬਾਰਾਂਸਿੰਗਾ ਬਾਂਧਵਗੜ੍ਹ ਦੀ ਆਬੋ ਹਵਾ ਵਿਚ ਘੁਲਮਿਲ ਜਾਣਗੇ, ਤੱਦ ਇਨ੍ਹਾਂ ਨੂੰ ਵਿਚਰਨ ਲਈ ਖੁੱਲੇ੍ਹ ਜੰਗਲ ਵਿਚ ਛੱਡ ਦਿੱਤਾ ਜਾਵੇਗਾ।
ਪੂਰੇ ਪ੍ਰਾਜੈਕਟ ਵਿਚ ਇਸ ਗੱਲ ਦਾ ਖਾਸ ਖਿਆਲ ਰੱਖਿਆ ਗਿਆ ਹੈ ਕਿ ਬਾਰਾਂਸਿੰਗਾ ਨੂੰ ਉਨ੍ਹਾਂ ਦੇ ਸੁਭਾਅ ਅਨੁਸਾਰ ਮਾਹੌਲ ਦਿੱਤਾ ਜਾਵੇ, ਜਿਸਦੇ ਨਾਲ ਉਹ ਨਾ ਸਿਰਫ ਇੱਥੇ ਪਲ ਸਕਣ, ਸਗੋਂ ਵੰਸ਼ ਵਾਧੇ ਨਾਲ ਉਨ੍ਹਾਂ ਦਾ ਇਹ ਨਵਾਂ ਰਹਿਵਾਸ ਬਣ ਜਾਵੇ । ਅੱਜ ਦੁਪਹਿਰ ਬਾਅਦ ਜਿਉਂ ਹੀ ਬਾਰਾਂਸਿੰਗਾ ਨਾਲ ਭਰੇ ਹੋਏ ਖਾਸ ਵਾਹਨ ਕਾਂਹਾ ਤੋਂ ਬਾਂਧਵਗੜ੍ਹ ਪਹੁੰਚੇ ਵਣ ਕਰਮੀਆਂ ਨੇ ਮਗਧੀ ਗੇਟ `ਤੇ ਤਾੜੀਆਂ ਦੀ ਗੜਗੜਾਹਟ ਨਾਲ ਉਨ੍ਹਾਂ ਦਾ ਸਵਾਗਤ ਕਰਕੇ ਪਾਰਕ ਅੰਦਰ ਪ੍ਰਵੇਸ਼ ਕਰਵਾਇਆ। ਪਹਿਲੀ ਖੇਪ ਵਿਚ ਆਏ 19 ਬਾਰਾਂਸਿੰਗਾ ਵਿਚ 11 ਨਰ ਅਤੇ 8 ਮਾਦਾ ਬਾਰਾਂਸਿੰਗਾ ਹਨ।