ਗਯਾ, 8 ਮਾਰਚ (ਪੋਸਟ ਬਿਊਰੋ): ਬਿਹਾਰ ਦੇ ਗਯਾ ਜ਼ਿਲੇ 'ਚ ਫੌਜੀ ਅਭਿਆਸ ਦੌਰਾਨ ਦਾਗੇ ਗਏ ਤੋਪ ਦੇ ਗੋਲੇ ਦੀ ਲਪੇਟ 'ਚ ਆਉਣ ਨਾਲ ਤਿੰਨ ਪਿੰਡ ਵਾਸੀਆਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਜਦਕਿ 3 ਜ਼ਖਮੀ ਦੱਸੇ ਜਾ ਰਹੇ ਹਨ। ਹਾਦਸੇ ਸਮੇਂ ਪਿੰਡ 'ਚ ਸਾਰੇ ਲੋਕ ਹੋਲੀ ਖੇਡ ਰਹੇ ਸਨ। ਜ਼ਖਮੀਆਂ ਦਾ ਸਥਾਨਕ ਹਸਪਤਾਲ 'ਚ ਇਲਾਜ ਚੱਲ ਰਿਹਾ ਹੈ। ਸੂਚਨਾ ਮਿਲਣ ਤੋਂ ਬਾਅਦ ਸਿਟੀ ਐਸਪੀ ਦੀ ਅਗਵਾਈ ਵਿੱਚ ਇੱਕ ਟੀਮ ਮੌਕੇ ਉੱਤੇ ਰਵਾਨਾ ਕੀਤੀ ਗਈ ਹੈ। ਪੁਲਿਸ ਸਾਰੇ ਪੁਆਇੰਟਾਂ ਦੀ ਜਾਂਚ ਕਰ ਰਹੀ ਹੈ ਕਿ ਤੋਪ ਦਾ ਗੋਲਾ ਫਾਇਰਿੰਗ ਰੇਂਜ ਤੋਂ ਬਾਹਰ ਕਿਵੇਂ ਡਿੱਗਿਆ।
ਜਾਣਕਾਰੀ ਮੁਤਾਬਕ ਮਾਮਲਾ ਗਯਾ ਜ਼ਿਲੇ ਦੇ ਬਾਰਚੱਟੀ ਥਾਣੇ ਦੇ ਪਿੰਡ ਗੁਲਾਰਵੇਦ ਦਾ ਹੈ। ਹੋਲੀ ਵਾਲੇ ਦਿਨ ਪਿੰਡ ਵਿੱਚ ਸੋਗ ਦਾ ਮਾਹੌਲ ਹੈ। ਗਯਾ ਦੇ ਐਸਪੀ ਆਸ਼ੀਸ਼ ਭਾਰਤੀ ਨੇ ਦੱਸਿਆ ਕਿ ਮਰਨ ਵਾਲਿਆਂ ਵਿੱਚ ਇੱਕ ਹੀ ਪਰਿਵਾਰ ਦੇ ਦੋ ਪੁਰਸ਼ ਅਤੇ ਇੱਕ ਔਰਤ, ਜੋ ਕਿ ਗੁਲਾਰਵੇਦ ਪਿੰਡ ਦੇ ਰਹਿਣ ਵਾਲੇ ਹਨ। ਇਸ ਹਾਦਸੇ 'ਚ ਜ਼ਖਮੀ ਹੋਏ ਦੋ ਔਰਤਾਂ ਸਮੇਤ ਤਿੰਨ ਲੋਕਾਂ ਨੂੰ ਇਲਾਜ ਲਈ ਗਯਾ ਸ਼ਹਿਰ ਦੇ ਅਨੁਗ੍ਰਹਿ ਨਰਾਇਣ ਮਗਧ ਮੈਡੀਕਲ ਹਸਪਤਾਲ 'ਚ ਭਰਤੀ ਕਰਵਾਇਆ ਗਿਆ ਹੈ।
ਰਿਪੋਰਟ ਮੁਤਾਬਕ ਮ੍ਰਿਤਕਾਂ ਦੀ ਪਛਾਣ ਗੋਲਾ ਮਾਂਝੀ ਦੇ ਜਵਾਈ ਗੋਵਿੰਦ ਮਾਂਝੀ, ਸੂਰਜ ਕੁਮਾਰ ਅਤੇ ਕੰਚਨ ਕੁਮਾਰੀ ਵਜੋਂ ਹੋਈ ਹੈ। ਜਦਕਿ ਜ਼ਖ਼ਮੀਆਂ ਵਿੱਚ ਗੀਤਾ ਕੁਮਾਰੀ, ਰਾਸ਼ੋ ਦੇਵੀ, ਪਿੰਟੂ ਮਾਂਝੀ ਸ਼ਾਮਲ ਹਨ। ਜਾਣਕਾਰੀ ਮੁਤਾਬਕ ਗਯਾ ਦੇ ਦੋਭੀ ਬਲਾਕ ਦੇ ਤ੍ਰਿਲੋਕੀਪੁਰ 'ਚ ਫੌਜ ਦੀ ਅਭਿਆਸ ਫਾਇਰਿੰਗ ਰੇਂਜ ਚੱਲਦੀ ਹੈ। ਨਾਲ ਲੱਗਦੇ ਪਿੰਡ ਇਸ ਫਾਇਰਿੰਗ ਰੇਂਜ ਤੋਂ ਪ੍ਰਭਾਵਿਤ ਹਨ। ਅਕਸਰ ਉੱਥੇ ਤੋਪ ਦਾ ਗੋਲਾ ਫਾਇਰਿੰਗ ਰੇਂਜ ਖੇਤਰ ਤੋਂ ਬਾਹਰ ਡਿੱਗਦਾ ਹੈ।