ਨਵੀਂ ਦਿੱਲੀ, 20 ਸਤੰਬਰ (ਪੋਸਟ ਬਿਊਰੋ)- ਵਿੱਤੀ ਸੰਕਟ ਨਾਲ ਜੂਝ ਰਹੀ ਭਾਰਤ ਦੀ ਸਰਕਾਰੀ ਜਹਾਜ਼ਰਾਨੀ ਕੰਪਨੀ ਏਅਰ ਇੰਡੀਆ ਦੀ ਹਾਲਤ ਇੰਨੀ ਮਾੜੀ ਹੋ ਗਈ ਹੈ ਕਿ ਉਸ ਕੋਲ ਟੀ ਡੀ ਐਸ ਅਤੇ ਕਰਮਚਾਰੀਆਂ ਦਾ ਪ੍ਰਾਵੀਡੈਂਟ ਫੰਡ (ਈ ਪੀ ਐਫ) ਜਮਾਂ ਕਰਾਉਣ ਲਈ ਵੀ ਪੈਸਾ ਨਹੀਂ।
ਜਾਣਕਾਰ ਸੂਤਰਾਂ ਮੁਤਾਬਕ ਏਅਰ ਇੰਡੀਆ ਨੇ ਟੀ ਡੀ ਐਸ ਅਤੇ ਪੀ ਐਫ ਦੇ ਭੁਗਤਾਨ `ਚ ਉਲੰਘਣਾ ਕੀਤੀ ਹੈ। ਸਰਕਾਰ ਏਅਰ ਇੰਡੀਆ ਨੂੰ ਵੇਚਣ ਲਈ ਜ਼ੋਰ ਲਗਾ ਰਹੀ ਹੈ, ਪਰ ਹਾਲੇ ਤੱਕ ਉਸ ਨੂੰ ਸਫਲਤਾ ਨਹੀਂ ਮਿਲੀ। ਏਅਰ ਇੰਡੀਆ ਨੇ ਇਸ ਗੱਲ ਤੋਂ ਇਨਕਾਰ ਕੀਤਾ ਹੈ ਕਿ ਉਸ ਨੇ ਟੀ ਡੀ ਐਸ ਦੇ ਭੁਗਤਾਨ `ਚ ਡਿਫਾਲਟ ਕੀਤਾ ਹੈ, ਪਰ ਪੀ ਐਫ ਬਾਰੇ ਕੰਪਨੀ ਨੇ ਕੁਝ ਨਹੀਂ ਕਿਹਾ। ਇੱਕ ਈ-ਮੇਲ ਦੇ ਜਵਾਬ ਵਿੱਚ ਕੰਪਨੀ ਨੇ ਕਿਹਾ ਕਿ ਏਅਰ ਇੰਡੀਆ ਟੀ ਡੀ ਐਸ ਪਹਿਲਾਂ ਹੀ ਜਮ੍ਹਾਂ ਕਰ ਚੁੱਕੀ ਹੈ ਅਤੇ ਫਾਰਮ 16 ਦੇ ਡਿਸਟ੍ਰੀਬਿੂਸ਼ਨ ਦੀ ਪ੍ਰਕਿਰਿਆ ਚੱਲ ਰਹੀ ਹੈ, ਪਰ ਸਰਕਾਰੀ ਅਧਿਕਾਰੀਆਂ ਦਾ ਕੁਝ ਹੋਰ ਕਹਿਣਾ ਹੈ । ਇੱਕ ਅਧਿਕਾਰੀ ਨੇ ਕਿਹਾ ਕਿ ਏਅਰ ਇੰਡੀਆ ਨੇ ਇਸ ਸਾਲ ਜਨਵਰੀ ਤੋਂ ਟੀ ਡੀ ਐਸ ਅਤੇ ਪੀ ਐਫ ਦਾ ਭੁਗਤਾਨ ਨਹੀਂ ਕੀਤਾ। ਮਾਰਚ ਅੰਤ ਤੱਕ ਕੰਪਨੀ `ਤੇ ਟੀ ਡੀ ਐਸ ਦਾ 26 ਕਰੋੜ ਰੁਪਏ ਬਕਾਇਆ ਹੈ। ਪੀ ਐਫ ਦਾ ਬਕਾਇਆ ਵੀ ਕਰੋੜਾਂ `ਚ ਹੈ।
ਪੀ ਐਫ ਦੇ ਮੁੱਦੇ `ਤੇ ਵਾਰ-ਵਾਰ ਰਿਮਾਈਂਡਰ ਭੇਜਣ `ਤੇ ਏਅਰ ਇੰਡੀਆ ਦੇ ਬੁਲਾਰੇ ਨੇ ਦੱਸਿਆ ਕਿ ਕੰਪਨੀ ਇਸ ਬਾਰੇ ਕੋਈ ਹੋਰ ਟਿੱਪਣੀ ਨਹੀਂ ਕਰਨਾ ਚਾਹੁੰਦੀ। ਏਅਰ ਇੰਡੀਆ ਦੇ ਪੀ ਐਫ ਅਤੇ ਟੀ ਡੀ ਐਸ ਨਾ ਦੇਣ ਨਾਲ ਕੰਮ ਕਰ ਰਹੇ ਅਤੇ ਸਾਬਕਾ ਕਰਮਚਾਰੀ ਪ੍ਰਭਾਵਤ ਹੋ ਰਹੇ ਹਨ। ਸਾਬਕਾ ਕਰਮਚਾਰੀਆਂ ਨੂੰ ਇਸ ਦੀ ਉਡੀਕ ਹੈ। ਇਸ ਤੋਂ ਪਹਿਲਾਂ 12 ਜੁਲਾਈ ਨੂੰ ਖਬਰ ਆਈ ਸੀ ਕਿ ਹਵਾਬਾਜ਼ੀ ਮਨਿਸਟਰੀ ਨੇ ਏਅਰ ਇੰਡੀਆ ਨੂੰ ਹੋਰ ਇਕਵਿਟੀ ਸਪੋਰਟ ਦੇਣ ਤੋਂ ਨਾਂਹ ਕਰ ਦਿੱਤੀ ਹੈ। ਇਸ ਨਾਲ ਕੰਪਨੀ ਦੀ ਸਥਿਤੀ ਵਿਗੜ ਹੋ ਗਈ ਹੈ।