ਨਵੀਂ ਦਿੱਲੀ, 23 ਅਗਸਤ (ਪੋਸਟ ਬਿਊਰੋ)- ਕਾਂਗਰਸ ਨਾਲ ਸਬੰਧਤ ਵਿਦਿਆਰਥੀ ਜਥੇਬੰਦੀ ਐਨ ਐਸ ਯੂ ਆਈ ਨੇ ਦਿੱਲੀ ਯੂਨੀਵਰਸਿਟੀ ਵਿੱਚ ਵੀਰ ਸਾਵਰਕਰ ਦੇ ਬੁੱਤ ਉੱਤੇ ਕਾਲਖ ਫੇਰ ਦਿੱਤੀ, ਜਦ ਕਿ ਉਨ੍ਹਾਂ ਦੇ ਨਾਲ ਹੀ ਲੱਗੇ ਸ਼ਹੀਦ ਭਗਤ ਸਿੰਘ ਅਤੇ ਸੁਭਾਸ਼ ਚੰਦਰ ਬੋਸ ਦੇ ਬੁੱਤਾਂ ਨੂੰ ਹਾਰ ਪਾਏ ਹਨ।
ਵਰਨਣ ਯੋਗ ਹੈ ਕਿ ਆਰ ਐਸ ਐਸ ਦੀ ਵਿਚਾਰਧਾਰਾ ਨਾਲ ਸਬੰਧਤ ਅਖਿਲ ਭਾਰਤੀ ਵਿਦਿਆਰਥੀ ਪ੍ਰੀਸ਼ਦ (ਏ ਬੀ ਵੀ ਪੀ) ਨੇ ਦਿੱਲੀ ਯੂਨੀਵਰਸਿਟੀ ਦੇ ਆਰਟਸ ਬਲਾਕ ਮੂਹਰੇ 20 ਅਗਸਤ ਨੂੰ ਬੁੱਤ ਲਾਏ ਸਨ। ਨੈਸ਼ਨਲ ਸਟੂਡੈਂਟਸ ਯੂਨੀਅਨ ਆਫ ਇੰਡੀਆ ਅਤੇ ਖੱਬੇ ਪੱਖੀ ਵਿਚਾਰਧਾਰਾ ਵਾਲੀ ਜਥੇਬੰਦੀ ਨਾਲ ਇੰਡੀਆ ਸਟੂਡੈਂਟਸ ਐਸੋਸੀਏਸ਼ਨ ਨੇ ਏ ਬੀ ਵੀ ਪੀ ਵੱਲੋਂ ਬੁੱਤ ਲਾਉਣ ਦੀ ਨਿਖੇਧੀ ਕੀਤੀ ਸੀ। ਉਨ੍ਹਾਂ ਕਿਹਾ ਕਿ ਵੀਰ ਸਾਵਰਕਰ ਨੂੰ ਸੁਭਾਸ਼ ਚੰਦਰ ਬੋਸ ਤੇ ਭਗਤ ਸਿੰਘ ਦੇ ਬਰਾਬਰ ਦਰਜਾ ਨਹੀਂ ਦਿੱਤਾ ਜਾ ਸਕਦਾ। ਐਨ ਐਸ ਯੂ ਆਈ ਦੇ ਬੁਲਾਰੇ ਨੇ ਦੱਸਿਆ ਕਿ ਅੱਧੀ ਰਾਤ 20 ਪਾਰਟੀ ਕਾਰਕੁਨਾਂ ਨੇ ਬੁੱਤ ਉੱਤੇ ਕਾਲਾ ਰੰਗ ਫੇਰਿਆ ਤੇ ਜੁੱਤਿਆਂ ਦਾ ਹਾਰ ਪਹਿਨਾਇਆ। ਉਨ੍ਹਾਂ ਭਗਤ ਸਿੰਘ ਤੇ ਸੁਭਾਸ਼ ਚੰਦਰ ਬੋਸ ‘ਅਮਰ ਰਹੇ' ਦੇ ਨਾਅਰੇ ਵੀ ਲਾਏ। ਐਨ ਐਸ ਯੂ ਆਈ ਦੇ ਦਿੱਲੀ ਵਿੰਗ ਦੇ ਪ੍ਰਧਾਨ ਅਕਸ਼ੇ ਲਾਕੜਾ ਨੇ ਕਿਹਾ ਕਿ ਏ ਬੀ ਵੀ ਪੀ ਵਾਲੇ ਭਗਤ ਸਿੰਘ ਤੇ ਸੁਭਾਸ਼ ਚੰਦਰ ਬੋਸ ਦੇ ਬੁੱਤ ਬਰਾਬਰ ਸਾਵਰਕਰ ਦਾ ਬੁੱਤ ਕਿਵੇਂ ਲਾ ਸਕਦੇ ਹਨ ਅਤੇ ਉਹ ਵੀ ਅੱਧੀ ਰਾਤ ਨੂੰ। ਦੂਜੇ ਪਾਸੇ ਏ ਬੀ ਵੀ ਪੀ ਦੀ ਕੌਮੀ ਮੀਡੀਆ ਕਨਵੀਨਰ ਮੋਨਿਕਾ ਚੌਧਰੀ ਨੇ ਕਿਹਾ ਕਿ ਉਹ ਯੂਨੀਵਰਸਿਟੀ ਪ੍ਰਸ਼ਾਸਨ ਨੂੰ ਅਪੀਲ ਕਰੇਗੀ ਕਿ ਇਸ ਬਾਰੇ ਕਾਰਵਾਈ ਕੀਤੀ ਜਾਵੇ।
ਸੂਤਰਾਂ ਅਨੁਸਾਰ ਯੂਨੀਵਰਸਿਟੀ ਦੀ ਪ੍ਰੋਕਟਰ ਨੀਤਾ ਸਹਿਗਲ ਨੇ ਦਿੱਲੀ ਯੂਨੀਵਰਸਿਟੀ ਵਿਦਿਆਰਥੀ ਯੂਨੀਅਨ ਦੇ ਪ੍ਰਧਾਨ ਸ਼ਕਤੀ ਸਿੰਘ ਨੂੰ ਬੁੱਤ ਲਾਉਣ 'ਤੇ ਕਾਰਨ ਦੱਸੋ ਨੋਟਿਸ ਜਾਰੀ ਕੀਤਾ ਸੀ।