ਟੋਰਾਂਟੋ, 16 ਅਪਰੈਲ (ਪੋਸਟ ਬਿਊਰੋ) : ਟੋਰਾਂਟੋ ਪੀਅਰਸਨ ਇੰਟਰਨੈਸ਼ਨਲ ਏਅਰਪੋਰਟ ਉੱਤੇ 20 ਮਿਲੀਅਨ ਡਾਲਰ ਦੇ ਸੋਨੇ ਦੀ ਹੋਈ ਚੋਰੀ ਦੇ ਮਾਮਲੇ ਵਿੱਚ ਪੀਲ ਰੀਜਨਲ ਪੁਲਿਸ ਦੇ ਜਾਂਚਕਾਰਾਂ ਦੀ ਟੀਮ ਨੇ ਕੁੱਝ ਵਿਅਕਤੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ।
ਇਹ ਗ੍ਰਿਫਤਾਰੀਆਂ ਘਟਨਾ ਵਾਪਰਨ ਤੋਂ ਇੱਕ ਸਾਲ ਬਾਅਦ ਕੀਤੀਆਂ ਗਈਆਂ।ਚੋਰੀ 17 ਅਪਰੈਲ, 2023 ਦੀ ਸ਼ਾਮ ਨੂੰ ਹੋਈ ਸੀ। ਉਸ ਸਮੇਂ ਪੁਲਿਸ ਨੇ ਆਖਿਆ ਸੀ ਕਿ ਇੱਕ ਕਾਰਗੋ ਕੰਟੇਨਰ ਜਿਸ ਵਿੱਚ ਸੋਨਾ ਤੇ ਹੋਰ ਸਮਾਨ ਸੀ, ਏਅਰਪੋਰਟ ਦੀ ਕਾਰਗੋ ਫੈਸਿਲਿਟੀ ਤੋਂ ਚੋਰੀ ਹੋ ਗਿਆ ਸੀ। ਹੁਣ ਤੱਕ ਕਿਸੇ ਵੀ ਮਸ਼ਕੂਕ ਦੀ ਸ਼ਨਾਖ਼ਤ ਤੱਕ ਨਹੀਂ ਸੀ ਹੋਈ। ਪੁਲਿਸ ਨੇ ਦੱਸਿਆ ਕਿ ਉਹ ਇਸ ਸਬੰਧ ਵਿੱਚ ਜਾਰੀ ਕੀਤੇ ਗਏ ਪੋ੍ਰਜੈਕਟ 24 ਕੇ ਦੇ ਨਤੀਜਿਆਂ ਦਾ ਐਲਾਨ ਬੁੱਧਵਾਰ ਨੂੰ ਸਵੇਰੇ 8:30 ਵਜੇ ਕਰੇਗੀ।
ਪੀਅਰਸਨ ਏਅਰਪੋਰਟ ਤੋਂ ਅਕਸਰ ਹੀ ਕੈਨੇਡਾ ਦੇ ਸੋਨੇ ਨੂੰ ਦੁਨੀਆ ਭਰ ਦੇ ਕਸਟਮਰਜ਼ ਲਈ ਟਰਾਂਸਪੋਰਟ ਕੀਤਾ ਜਾਂਦਾ ਹੈ। ਜਿ਼ਕਰਯੋਗ ਹੈ ਕਿ ਫਲਾਈਟ 17 ਅਪਰੈਲ, 2023 ਨੂੰ ਦੁਪਹਿਰੇ 4:00 ਵਜੇ ਪੀਅਰਸਨ ਉੱਤੇ ਲੈਂਡ ਕੀਤੀ। ਪੁਲਿਸ ਨੇ ਦੱਸਿਆ ਕਿ ਸੋਨੇ ਦੀ ਖੇਪ, ਜੋ ਕਿ ਇੱਕ ਕੰਟੇਨਰ ਵਿੱਚ ਸੀ, ਨੂੰ ਦੋ ਘੰਟੇ ਬਾਅਦ ਏਅਰਪੋਰਟ ਉੱਤੇ ਮੌਜੂਦ ਏਅਰ ਕੈਨੇਡਾ ਦੇ ਗੋਦਾਮ ਵਿੱਚ ਜਮ੍ਹਾਂ ਕਰਵਾ ਦਿੱਤਾ ਗਿਆ। ਫਿਰ ਜਾਅਲੀ ਦਸਤਾਵੇਜ਼ਾਂ ਨਾਲ ਹੀ ਕਿਸੇ ਮਸ਼ਕੂਕ ਵੱਲੋਂ ਕਾਰਗੋ ਫੈਸਿਲਿਟੀ ਤੋਂ ਸੋਨਾ ਚੋਰੀ ਕਰ ਲਿਆ ਗਿਆ।