ਓਨਟਾਰੀਓ, 16 ਅਪਰੈਲ (ਪੋਸਟ ਬਿਊਰੋ) : ਓਨਟਾਰੀਓ ਦੀ ਮਹਿਲਾ ਦੀ ਉਸ ਸਮੇਂ ਕੋਈ ਹੈਰਾਨੀ ਦੀ ਹੱਦ ਨਹੀਂ ਰਹੀ ਜਦੋਂ ਉਸ ਨੂੰ ਸਿਰਫ 20 ਮਿੰਟ ਦੀ ਟੈਕਸੀ ਦੀ ਰਾਈਡ ਲਈ 7,000 ਡਾਲਰ ਦਾ ਬਿੱਲ ਆ ਗਿਆ। ਉਸ ਵੱਲੋਂ ਗੈਰਅਧਿਕਾਰਤ ਟੈਕਸੀ ਕੰਪਨੀ ਰਾਹੀਂ ਐਂਟਾਰਕਟਿਕਾ ਦਾ ਟਰਿੱਪ ਕੀਤਾ ਗਿਆ ਸੀ।
ਓਨਟਾਰੀਓ ਦੇ ਮਿੱਡਲੈਂਡ ਦੀ ਪੈਟ ਸ਼ੈਕਲੇਡੀ ਨੇ ਇੱਕ ਗੱਲਬਾਤ ਦੌਰਾਨ ਦੱਸਿਆ ਕਿ ਸਾਡਾ ਪਹਿਲਾ ਸਟੌਪ ਸੈਂਟੀਏਗੋ, ਚਿਲੀ ਸੀ, ਜਿੱਥੇ ਉਨ੍ਹਾਂ ਨਾਲ ਸਕੈਮ ਹੋਇਆ। ਸੈ਼ਕਲੇਡੀ ਨੇ ਦੱਸਿਆ ਕਿ ਜਨਵਰੀ ਵਿੱਚ ਸੈਂਟੀਏਗੋ ਏਅਰਪੋਰਟ ਤੋਂ ਉਸ ਨੇ ਤੇ ਉਸ ਦੀ ਦੋਸਤ ਨੇ ਇੱਕ ਟੈਕਸੀ ਪਹਿਲਾਂ ਤੋਂ ਹੀ ਬੁੱਕ ਕੀਤੀ ਹੋਈ ਸੀ। ਉਸ ਨੇ ਦੱਸਿਆ ਕਿ ਟੈਕਸੀ ਦੇ ਡਰਾਈਵਰ ਨੇ ਮੌਕੇ ਉੱਤੇ ਪਹੁੰਚ ਕੇ ਦੱਸਿਆ ਕਿ ਉਨ੍ਹਾਂ ਦੇ ਡਰਾਈਵਰ ਦੀ ਗੱਡੀ ਦਾ ਐਕਸੀਡੈਂਟ ਹੋ ਗਿਆ ਹੈ ਤੇ ਇਸ ਲਈ ਉਨ੍ਹਾਂ ਨੂੰ ਵੱਖਰੀ ਕੰਪਨੀ ਰਾਹੀਂ ਭੇਜਿਆ ਜਾਵੇਗਾ।
ਸੈ਼ਕਲੇਡੀ ਨੇ ਆਖਿਆ ਕਿ ਉਨ੍ਹਾਂ ਨਕਦੀ ਦੇਣ ਦੀ ਗੱਲ ਕੀਤੀ ਤਾਂ ਉਨ੍ਹਾਂ ਆਖਿਆ ਕਿ ਉਹ ਕੈਸ਼ ਨਹੀਂ ਲੈਂਦੇ ਤੇ ਇਸ ਲਈ ਉਨ੍ਹਾ ਨੂੰ ਕ੍ਰੈਡਿਟ ਕਾਰਡ ਰਾਹੀਂ ਪੈਸੇ ਦੇਣੇ ਪਏ। ਉਨ੍ਹਾਂ ਨੂੰ ਚਿਲੀਅਨ ਪੀਸੋਸ ਦੇ 45000 ਡਾਲਰ ਦੀ ਰਸੀਦ ਦੇ ਦਿੱਤੀ ਗਈ ਜੋ ਕਿ 62 ਡਾਲਰ ਬਣਦੇ ਸਨ ਤੇ ਫਿਰ ਉਹ ਆਪਣੇ ਟਰਿੱਪ ਉੱਤੇ ਚਲੇ ਗਏ। ਪਰ ਜਦੋਂ ਸ਼ੈਕਲੇਡੀ ਘਰ ਪਹੁੰਚੀ ਤਾਂ ਉਸ ਦੇ ਕ੍ਰੈਡਿਟ ਕਾਰਡ ਉੱਤੇ 6,943 ਡਾਲਰ ਉਸ ਤੋਂ ਚਾਰਜ ਕਰਨ ਦੀ ਸਟੇਟਮੈਂਟ ਆ ਗਈ।ਉਸ ਨੇ ਦੱਸਿਆ ਕਿ ਇਹ ਪਤਾ ਲੱਗਣ ਉੱਤੇ ਇੱਕ ਵਾਰੀ ਤਾਂ ਉਸ ਨੂੰ ਦਿਲ ਦਾ ਦੌਰਾ ਹੀ ਪੈ ਚੱਲਿਆ ਸੀ।
ਫਿਰ ਉਸ ਨੇ ਬੈਂਕ ਆਫ ਮਾਂਟਰੀਅਲ (ਬੀਐਮਓ) ਨਾਲ ਸੰਪਰਕ ਕੀਤਾ। ਪਹਿਲਾਂ ਤਾਂ ਬੈਂਕ ਨੇ ਉਸ ਦੇ ਦਾਅਵੇ ਨੂੰ ਨਕਾਰ ਦਿੱਤਾ ਤੇ ਉਸ ਨੂੰ ਦੱਸਿਆ ਕਿ ਉਸ ਦੀ ਰਕਮ ਉਸ ਨੂੰ ਮੋੜੀ ਨਹੀਂ ਜਾਵੇਗੀ। ਸੈ਼ਕਲੇਡੀ ਨੇ ਆਖਿਆ ਕਿ ਜੇ 200 ਡਾਲਰ ਦੀ ਵੀ ਗੱਲ ਹੁੰਦੀ ਤਾਂ ਉਹ ਆਈ ਗਈ ਕਰ ਦਿੰਦੀ ਪਰ ਇਹ ਪੂਰੇ 7,000 ਡਾਲਰ ਦੀ ਗੱਲ ਸੀ।ਬਾਅਦ ਵਿੱਚ ਬੀਐਮਓ ਦੇ ਬੁਲਾਰੇ ਨੇ ਦੱਸਿਆ ਕਿ ਸੈ਼ਕਲੇਡੀ ਦੇ ਕੇਸ ਦਾ ਮੁਲਾਂਕਣ ਕੀਤਾ ਜਾ ਰਿਹਾ ਹੈ ਤੇ ਉਸ ਦੇ ਪੈਸੇ ਮੋੜ ਦਿੱਤੇ ਜਾਣਗੇ।