ਓਨਟਾਰੀਓ, 15 ਅਪਰੈਲ (ਪੋਸਟ ਬਿਊਰੋ) : ਫੋਰਡ ਸਰਕਾਰ ਮਿਲਟਨ, ਲੇਕਸ਼ੋਰ ਵੈਸਟ, ਲੇਕਸ਼ੋਰ ਈਸਟ, ਕਿਚਨਰ ਤੇ ਸਟੱਫਵਿੱਲ ਗੋ ਟਰੇਨ ਲਾਈਨਜ਼ ਉੱਤੇ 300 ਨਵੇਂ ਹਫਤਾਵਾਰੀ ਟਰਿੱਪ ਸ਼ੁਰੂ ਕਰਨ ਦੀ ਯੋਜਨਾ ਬਣਾ ਰਹੀ ਹੈ।
ਸੋਮਵਾਰ ਨੂੰ ਪ੍ਰੀਮੀਅਰ ਡੱਗ ਫੋਰਡ ਨੇ ਮਿਲਟਨ ਵਿੱਰ ਓਨਟਾਰੀਓ ਦੇ ਟਰਾਂਸਪੋਰਟੇਸ਼ਨ ਮੰਤਰੀ ਪ੍ਰਭਮੀਤ ਸਰਕਾਰੀਆ ਦੀ ਮੌਜੂਦਗੀ ਵਿੱਚ ਇਸ ਸਬੰਧੀ ਐਲਾਨ ਕੀਤਾ। 28 ਅਪਰੈਲ ਤੋਂ ਵੀਕੈਂਡ ਦੀ ਦੁਪਹਿਰ ਤੇ ਸ਼ਾਮ ਵਾਲੀ ਟਰੇਨ ਸਰਵਿਸ ਓਕਵਿੱਲ ਗੋ ਸਟੇਸ਼ਨ, ਯੂਨੀਅਨ ਸਟੇਸ਼ਨ ਤੇ ਦਰਹਾਮ ਕਾਲਜ ਓਸ਼ਵਾ ਗੋ ਸਟੇਸ਼ਨ ਦਰਮਿਆਨ ਲੇਕਸ਼ੋਰ ਵੈਸਟ ਤੇ ਲੇਕਸ਼ੋਰ ਈਸਟ ਲਾਈਨਾਂ ਉੱਤੇ ਹਰੇਕ 30 ਮਿੰਟ ਤੋਂ ਹਰੇਕ 15ਵੇਂ ਮਿੰਟ ਸ਼ੁਰੂ ਕੀਤੀ ਜਾਵੇਗੀ।
ਕਿਚਨਰ ਲਾਈਨ ਉੱਤੇ ਗੋ ਟਰੇਨ ਰਾਈਡਰਜ਼ ਨੂੰ ਹੁਣ ਬ੍ਰੈਮਲੀ ਤੇ ਯੂਨੀਅਨ ਸਟੇਸ਼ਨ ਦਰਮਿਆਨ ਵੀਕਡੇਅਜ਼ ਉੱਤੇ ਵੀ ਦਿਨ ਵੇਲੇ ਤੇ ਸ਼ਾਮ ਨੂੰ ਹਰ 30 ਮਿੰਟ ਬਾਅਦ ਸਰਵਿਸ ਮਿਲੇਗੀ। ਫੋਰਡ ਨੇ ਆਖਿਆ ਕਿ ਇੱਕ ਦਹਾਕੇ ਤੋਂ ਵੀ ਵੱਧ ਸਮੇਂ ਵਿੱਚ ਇਹ ਗੋ ਟਰੇਨ ਦੀ ਪਹਿਲੀ ਸੱਭ ਤੋਂ ਵੱਡੀ ਟਰੇਨ ਸਰਵਿਸ ਹੈ ਜਿਸ ਦਾ ਐਨਾ ਪਸਾਰ ਹੋਇਆ ਹੈ। ਇਸ ਨਾਲ ਕਮਿਊਟਰਜ਼ ਨੂੰ ਤੇਜ਼ੀ ਨਾਲ ਕਿਤੇ ਆਉਣ ਜਾਣ ਲਈ ਹੋਰ ਬਦਲ ਮਿਲ ਸਕਣਗੇ।