ਟੋਰਾਂਟੋ, 15 ਅਪਰੈਲ (ਪੋਸਟ ਬਿਊਰੋ) : ਵੀਕੈਂਡ ਉੱਤੇ ਐਸ਼ਬ੍ਰਿਜਿੱਜ਼ ਬੇਅ ਨੇੜੇ ਪਾਣੀ ਵਿੱਚ ਸਵਿਮਿੰਗ ਲਈ ਜਾਣ ਤੋਂ ਬਾਅਦ ਲਾਪਤਾ ਹੋਏ 14 ਸਾਲਾ ਲੜਕੇ ਦੀ ਲਾਸ਼ ਟੋਰਾਂਟੋ ਪੁਲਿਸ ਨੂੰ ਮਿਲ ਗਈ ਹੈ।
ਐਤਵਾਰ ਨੂੰ ਸ਼ਾਮੀਂ 6:00 ਵਜੇ ਦੇ ਨੇੜੇ ਤੇੜੇ ਸਿਟੀ ਦੇ ਪੂਰਬੀ ਸਿਰੇ ਉੱਤੇ ਵੁੱਡਬਾਈਨ ਬੀਚ ਉੱਤੇ ਐਮਰਜੰਸੀ ਅਮਲੇ ਨੂੰ ਸੱਦਿਆ ਗਿਆ। ਸੋਮਵਾਰ ਨੂੰ ਕਾਰਜਕਾਰੀ ਡਿਊਟੀ ਇੰਸਪੈਕਟਰ ਡੈਨ ਪ੍ਰੇਵਿਕਾ ਨੇ ਆਖਿਆ ਕਿ ਇਹ ਲੜਕਾ ਆਪਣੇ ਦੋਸਤਾਂ ਨਾਲ ਪਾਣੀ ਵਿੱਚ ਸਵਿਮਿੰਗ ਲਈ ਗਿਆ ਸੀ ਜਦੋਂ ਉਨ੍ਹਾਂ ਨੂੰ ਉੱਥੇ ਦਿੱਕਤ ਹੋਣ ਲੱਗੀ। ਇਨ੍ਹਾਂ ਵਿੱਚੋਂ ਇੱਕ ਵਿਅਕਤੀ ਤਾਂ ਤੈਰ ਕੇ ਕੰਢੇ ਆ ਗਿਆ ਤੇ ਉਸ ਨੇ ਨੇੜਿਓਂ ਲੰਘ ਰਹੇ ਇੱਕ ਵਿਅਕਤੀ ਨੂੰ ਇਸ ਗੜਬੜੀ ਦੀ ਜਾਣਕਾਰੀ ਦਿੱਤੀ। ਉਸ ਵਿਅਕਤੀ ਨੇ ਪਾਣੀ ਵਿੱਚ ਛਾਲ ਮਾਰ ਕੇ ਟੀਨੇਜਰ ਨੂੰ ਬਚਾਉਣ ਦੀ ਕੋਸਿ਼ਸ਼ ਕੀਤੀ ਪਰ ਉਹ ਉਸ ਨੂੰ ਨਹੀਂ ਲੱਭਿਆ। ਫਿਰ ਉਸ ਵੱਲੋਂ 911 ਉੱਤੇ ਕਾਲ ਕੀਤੀ ਗਈ।
ਪੈਰਾਮੈਡਿਕਸ ਨੇ ਦੱਸਿਆ ਕਿ ਉਹ ਇੱਕ ਲੜਕੇ ਨੂੰ ਮਾਮੂਲੀ ਜ਼ਖ਼ਮਾਂ ਨਾਲ ਹਸਪਤਾਲ ਲੈ ਗਏ ਜਦਕਿ ਇੱਕ ਵਿਅਕਤੀ ਦਾ ਇਲਾਜ ਮੌਕੇ ਉੱਤੇ ਹੀ ਕਰ ਦਿੱਤਾ ਗਿਆ। ਉਸ ਟੀਨੇਜਰ ਦੀ ਭਾਲ ਦਿਨ ਰਾਤ ਚੱਲਦੀ ਰਹੀ ਪਰ ਉਸ ਦੀ ਲਾਸ਼ ਸੋਮਵਾਰ ਨੂੰ ਸਵੇਰੇ 9:00 ਵਜੇ ਦੇ ਨੇੜੇ ਤੇੜੇ ਮਿਲੀ। ਇਹ ਪਤਾ ਨਹੀਂ ਲੱਗ ਸਕਿਆ ਕਿ ਪਾਣੀ ਵਿੱਚ ਕੀ ਗੜਬੜੀ ਹੋਈ ਤੇ ਇਹ ਦੋਵੇਂ ਦੋਸਤ ਕਿੰਨੇ ਸਮੇਂ ਤੋਂ ਤੈਰ ਰਹੇ ਸਨ।