ਓਟਵਾ, 23 ਮਾਰਚ (ਪੋਸਟ ਬਿਊਰੋ) : ਵੀਰਵਾਰ ਸ਼ਾਮ ਨੂੰ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਇਡਨ ਪਹਿਲੀ ਵਾਰੀ ਕੈਨੇਡਾ ਦੇ ਦੌਰੇ ਉੱਤੇ ਪਹੁੰਚਣ ਵਾਲੇ ਹਨ। ਉਨ੍ਹਾਂ ਦੇ ਇਸ ਰਸਮੀ ਦੌਰੇ ਦੀ ਲੰਮੇਂ ਸਮੇਂ ਤੋਂ ਉਡੀਕ ਕੀਤੀ ਜਾ ਰਹੀ ਸੀ।
ਓਟਵਾ ਵਿੱਚ ਠਹਿਰਣ ਸਮੇਂ ਬਾਇਡਨ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਾਲ ਮੁਲਾਕਾਤ ਕਰਨ ਦੇ ਨਾਲ ਨਾਲ ਸ਼ੁੱਕਰਵਾਰ ਨੂੰ ਪਾਰਲੀਆਮੈਂਟ ਨੂੰ ਸੰਬੋਧਨ ਕਰਨਗੇ। ਪਰ ਅਮਰੀਕਾ ਦੀ ਫਰਸਟ ਲੇਡੀ ਜਿੱਲ ਬਾਇਡਨ ਨਾਲ ਜੋਅ ਬਾਇਡਨ ਕੈਨੇਡਾ ਵਿੱਚ ਹੋਰ ਕਾਫੀ ਈਵੈਂਟਸ ਵਿੱਚ ਹਿੱਸਾ ਲੈਣਗੇ, ਜਿੱਥੇ ਕੈਨੇਡਾ ਤੇ ਅਮਰੀਕਾ ਲਈ ਅਹਿਮ ਮੁੱਦਿਆਂ ਉੱਤੇ ਚਰਚਾ ਕੀਤੀ ਜਾਵੇਗੀ ਤੇ ਸਾਂਝੀਆਂ ਤਰਜੀਹਾਂ ਉੱਤੇ ਵਿਚਾਰ ਵਟਾਂਦਰਾ ਕੀਤਾ ਜਾਵੇਗਾ।ਬਾਇਡਨ ਤੇ ਉਨ੍ਹਾਂ ਦੇ ਅਮਲੇ ਦੇ ਸਵਾਗਤ ਲਈ ਤਿਆਰੀਆਂ ਜੰਗੀ ਪੱਧਰ ਉੱਤੇ ਚੱਲ ਰਹੀਆਂ ਹਨ।
ਬਾਇਡਨ ਦੇ ਆਪਣੇ ਵਫਦ ਨਾਲ ਵੀਰਵਾਰ ਸ਼ਾਮ ਨੂੰ 6:25 ਉੱਤੇ ਏਅਰ ਫੋਰਸ ਵੰਨ ਉੱਤੇ ਸਵਾਰ ਹੋਕੇ ਓਟਵਾ ਪਹੁੰਚਣ ਦੀ ਯੋਜਨਾ ਹੈ। ਇਸ ਮੌਕੇ ਉਨ੍ਹਾਂ ਦਾ ਸਵਾਗਤ ਕਰਨ ਲਈ ਗਵਰਨਰ ਜਨਰਲ ਮੈਰੀ ਸਾਈਮਨਜ਼, ਅਮਰੀਕਾ ਵਿੱਚ ਕੈਨੇਡਾ ਦੀ ਅੰਬੈਸਡਰ ਕਰਸਟਿਨ ਹਿੱਲਮੈਨ, ਡਿਪਟੀ ਪ੍ਰਧਾਨ ਮੰਤਰੀ ਤੇ ਵਿੱਤ ਮੰਤਰੀ ਕ੍ਰਿਸਟੀਆ ਫਰੀਲੈਂਡ, ਖਜ਼ਾਨਾ ਬੋਰਡ ਦੀ ਪ੍ਰੈਜ਼ੀਡੈਂਟ ਮੋਨਾ ਫਰਟੀਅਰ, ਵਿਦੇਸ਼ ਮੰਤਰੀ ਮਿਲੇਨੀ ਜੋਲੀ ਤੋਂ ਇਲਾਵਾ ਵਿਦੇਸ਼ੀ ਮਾਮਲਿਆਂ ਦੇ ਪਾਰਲੀਆਮੈਂਟਰੀ ਸੈਕਟਰੀਜ਼, ਲਿਬਰਲ ਐਮਪੀਜ਼ ਰੌਬ ਓਲੀਫੈਂਟ ਤੇ ਮਨਿੰਦਰ ਸਿੱਧੂ ਹਾਜ਼ਰ ਹੋਣਗੇ।
ਫਿਰ ਬਾਇਡਨ ਨੂੰ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਤੇ ਉਨ੍ਹਾਂ ਦੀ ਪਤਨੀ ਸੋਫੀ ਗ੍ਰੈਗੌਇਰ ਟਰੂਡੋ ਨਾਲ ਮੁਲਾਕਾਤ ਲਈ ਰਿਡੂ ਕਾਟੇਜ ਲਿਜਾਇਆ ਜਾਵੇਗਾ।ਸ਼ੁੱਕਰਵਾਰ ਨੂੰ ਬਾਇਡਨ ਦਾ ਦਿਨ ਬਹੁਤਾ ਕਰਕੇ ਪਾਰਲੀਆਮੈਂਟ ਹਿੱਲ ਉੱਤੇ ਹੀ ਬਤੀਤ ਹੋਵੇਗਾ। ਇਸ ਦੌਰੇ ਦੌਰਾਨ ਦੋਵੇਂ ਦੇਸ਼ ਹੇਠ ਲਿਖੇ ਮੁੱਦਿਆਂ ਉੱਤੇ ਵਿਚਾਰ ਕਰਨਗੇ :
· ਨੌਰਥ ਅਮੈਰੀਕਨ ਕੌਂਟੀਨੈਂਟਲ ਐਂਡ ਆਰਕਟਿਕ ਡਿਫੈਂਸ ਤੇ ਸਬੰਧਤ ਖਰਚਿਆਂ
· ਟਰੇਡ, ਸਪਲਾਈ ਚੇਨ, ਤੇ ਸੀਯੂਐਸਐਮਏ/ਯੂਐਸਐਮਸੀਏ ਦੀ ਸਥਿਤੀ
· ਅਨਿਯਮਿਤ ਮਾਈਗ੍ਰੇਸ਼ਨ ਤੇ ਸੇਫ ਥਰਡ ਕੰਟਰੀ ਸਮਝੌਤੇ
· ਕਲਾਈਮੇਟ ਚੇਂਜ ਤੇ ਕਲੀਨ ਆਟੋਮੋਟਿਵ ਸੈਕਟਰ ਵਿੱਚ ਨਿਵੇਸ਼
· ਮਹਿੰਗਾਈ ਨੂੰ ਠੱਲ੍ਹ ਪਾਉਣ ਤੇ ਰੋਜ਼ਗਾਰ ਦੇ ਮੌਕੇ ਪੈਦਾ ਕਰਨ
· ਜਮਹੂਰੀਅਤ ਨੂੰ ਖਤਰੇ ਜਿਵੇਂ ਕਿ ਦੇਸੀ ਤੇ ਵਿਦੇਸ਼ੀ ਦਖਲ
· ਹਾਇਤੀ ਤੇ ਯੂਕਰੇਨ ਲਈ ਅਗਾਂਹ ਮਦਦ ਬਾਰੇ