ਐਡਮੰਟਨ, 16 ਮਾਰਚ (ਪੋਸਟ ਬਿਊਰੋ) : ਵੀਰਵਾਰ ਸਵੇਰੇ ਇੱਕ ਘਰੇਲੂ ਝਗੜੇ ਨੂੰ ਹੱਲ ਕਰਨ ਲਈ ਪਹੁੰਚੇ ਐਡਮੰਟਨ ਦੇ ਦੋ ਪੁਲਿਸ ਸਰਵਿਸ ਪੈਟਰੋਲ ਅਧਿਕਾਰੀ ਮਾਰੇ ਗਏ। 16 ਸਾਲਾਂ ਦਾ ਮਸ਼ਕੂਕ ਵੀ ਇਸ ਦੌਰਾਨ ਮਾਰਿਆ ਗਿਆ।
ਪ੍ਰਾਪਤ ਜਾਣਕਾਰੀ ਅਨੁਸਾਰ ਮਸ਼ਕੂਕ 16 ਸਾਲਾਂ ਦਾ ਲੜਕਾ ਸੀ ਤੇ ਖੁਦ ਨੂੰ ਲੱਗੀ ਗੋਲੀ ਕਾਰਨ ਉਸ ਦੀ ਮੌਤ ਹੋ ਗਈ। ਈਪੀਐਸ ਦੇ ਬੁਲਾਰੇ ਨੇ ਦੱਸਿਆ ਕਿ ਇਸ ਲੜਕੇ ਵੱਲੋਂ ਆਪਣੀ ਮਾਂ ਨੂੰ ਵੀ ਗੋਲੀ ਮਾਰੀ ਗਈ ਤੇ ਉਹ ਨਾਜੁ਼ਕ ਹਾਲਤ ਵਿੱਚ ਇਸ ਸਮੇਂ ਹਸਪਤਾਲ ਦਾਖਲ ਹੈ। ਈਪੀਐਸ ਦੇ ਚੀਫ ਡੇਲ ਮੈਕੈਫੀ ਨੇ ਆਖਿਆ ਕਿ ਗਸ਼ਤ ਕਰਨ ਵਾਲੀ ਉਨ੍ਹਾਂ ਦੀ ਟੀਮ ਦੇ ਦੋ ਮੈਂਬਰਾਂ ਦੀਆਂ ਮੌਤਾਂ ਦਿਲ ਦਹਿਲਾ ਦੇਣ ਵਾਲੀਆਂ ਹਨ। ਇਸ ਤਰ੍ਹਾਂ ਦੀ ਤ੍ਰਾਸਦੀ ਦਾ ਅਸੀਂ ਕਿਆਸ ਵੀ ਨਹੀਂ ਸੀ ਕੀਤਾ। ਉਨ੍ਹਾਂ ਦੱਸਿਆ ਕਿ ਇਸ ਘਟਨਾ ਵਿੱਚ 35 ਸਾਲਾਂ ਦੇ ਕਾਂਸਟੇਬਲ ਟਰੈਵਿਸ ਜੌਰਡਨ ਤੇ 30 ਸਾਲਾਂ ਦੇ ਕਾਂਸਟੇਬਲ ਬ੍ਰੈਂਟ ਰਾਇਨ ਮਾਰੇ ਗਏ। ਜੌਰਡਨ ਨੇ ਸਾਢੇ ਅੱਠ ਸਾਲ ਲਈ ਤੇ ਰਾਇਨ ਨੇ ਸਾਢੇ ਪੰਜ ਸਾਲ ਤੱਕ ਈਪੀਐਸ ਵਿੱਚ ਸੇਵਾ ਨਿਭਾਈ।
ਅੱਧੀ ਰਾਤ ਤੋਂ ਬਾਅਦ ਐਡਮੰਟਨ ਦੇ ਇੰਗਲਵੁੱਡ ਇਲਾਕੇ ਵਿੱਚ ਈਪੀਐਸ ਨੂੰ ਸੱਦਿਆ ਗਿਆ। ਮੈਕੈਫੀ ਅਨੁਸਾਰ ਰਾਤੀਂ 12:47 ਦੇ ਨੇੜੇ ਤੇੜੇ ਦੋਵੇਂ ਕਾਂਸਟੇਬਲ ਜੌਰਡਨ ਤੇ ਰਾਇਨ ਇੱਕ ਪਰਿਵਾਰਕ ਮਸਲੇ ਨੂੰ ਹੱਲ ਕਰਨ ਲਈ 114 ਐਵਨਿਊ ਤੇ 132 ਸਟਰੀਟ ਇਲਾਕੇ ਵਿੱਚ ਇੱਕ ਰਿਹਾਇਸ਼ੀ ਇਮਾਰਤ ਨੇੜੇ ਪਹੁੰਚੇ।ਇਸ ਤੋਂ ਬਾਅਦ ਜਿਵੇਂ ਹੀ ਦੋਵੇਂ ਕਾਂਸਟੇਬਲ ਬਿਲਡਿੰਗ ਵਿੱਚ ਦਾਖਲ ਹੋਏ ਤੇ ਸੁਈਟ ਵੱਲ ਵਧੇ ਤਾਂ ਉਨ੍ਹਾਂ ਨੂੰ ਕਿਸੇ ਵਿਅਕਤੀ ਵੱਲੋਂ ਗੋਲੀ ਮਾਰ ਦਿੱਤੀ ਗਈ।ਮੈਕੈਫੀ ਨੇ ਆਖਿਆ ਕਿ ਇਸ ਸਮੇਂ ਤੱਕ ਇਹੋ ਪਤਾ ਲੱਗਿਆ ਹੈ ਕਿ ਦੋਵਾਂ ਕੋਲ ਆਪਣੇ ਹਥਿਆਰਾਂ ਦੀ ਵਰਤੋਂ ਕਰਨ ਦਾ ਸਮਾਂ ਹੀ ਨਹੀਂ ਸੀ।ਦੋਵਾਂ ਕਾਂਸਟੇਬਲਜ਼ ਨੂੰ ਉਸੇ ਸਮੇਂ ਹਸਪਤਾਲ ਲਿਜਾਇਆ ਗਿਆ। ਪਰ ਉਨ੍ਹਾਂ ਨੂੰ ਹਸਪਤਾਲ ਪਹੁੰਚਣ ਉੱਤੇ ਮ੍ਰਿਤਕ ਐਲਾਨ ਦਿੱਤਾ ਗਿਆ।