ਕਿਊਬਿਕ, 13 ਮਾਰਚ (ਪੋਸਟ ਬਿਊਰੋ) : ਕਿਊਬਿਕ ਵਿੱਚ ਲੋਅਰ ਸੇਂਟ ਲਾਅਰੈਂਸ ਰੀਜਨ ਵਿੱਚ ਸੋਮਵਾਰ ਨੂੰ ਡਾਊਨਟਾਊਨ ਆਮਕੀ ਵਿੱਚ ਕੁੱਝ ਰਾਹਗੀਰਾਂ ਉੱਤੇ ਗੱਡੀ ਚੜ੍ਹ ਜਾਣ ਕਾਰਨ ਦੋ ਵਿਅਕਤੀਆਂ ਦੀ ਮੌਤ ਹੋ ਗਈ ਜਦਕਿ ਨੌਂ ਹੋਰ ਜ਼ਖ਼ਮੀ ਹੋ ਗਏ।
38 ਸਾਲਾ ਡਰਾਈਵਰ ਇਸ ਇਲਾਕੇ ਦਾ ਹੀ ਰਹਿਣ ਵਾਲਾ ਦੱਸਿਆ ਜਾਂਦਾ ਹੈ ਤੇ ਹਾਦਸੇ ਤੋਂ ਬਾਅਦ ਉਸ ਨੇ ਕਿਊਬਿਕ ਪ੍ਰੋਵਿੰਸ਼ੀਅਲ ਪੁਲਿਸ (ਐਸਕਿਊ) ਕੋਲ ਆਤਮ ਸਮਰਪਣ ਕਰ ਦਿੱਤਾ। ਉਸ ਨੂੰ ਹਿੱਟ ਐਂਡ ਰੰਨ ਕਾਰਨ ਹੋਈਆਂ ਮੌਤਾਂ ਦੇ ਸਬੰਧ ਵਿੱਚ ਗ੍ਰਿਫਤਾਰ ਕਰ ਲਿਆ ਗਿਆ। ਚਸ਼ਮਦੀਦਾਂ ਨੇ ਦੱਸਿਆ ਕਿ ਇਸ ਹਾਦਸੇ ਦਾ ਸਿ਼ਕਾਰ ਹੋਏ ਲੋਕ 100 ਮੀਟਰ ਤੱਕ ਫੈਲੇ ਹੋਏ ਸਨ। ਇਹ ਘਟਨਾ ਦੁਪਹਿਰੇ 3:00 ਵਜੇ ਤੋਂ ਬਾਅਦ ਕਿਊਬਿਕ ਸਿਟੀ ਤੋਂ 350 ਕਿਲੋਮੀਟਰ ਨੌਰਥਈਸਟ ਵੱਲ ਸੇਂਟ ਬੈਨੌਇਟ ਬੁਲੇਵਾਰਡ ਉੱਤੇ ਵਾਪਰੀ।
ਐਸਕਿਊ ਦੇ ਤਰਜ਼ਮਾਨ ਸਾਰਜੈਂਟ ਹੈਲਨ ਸੇਂਟ-ਪਿਏਰ ਨੇ ਦੱਸਿਆ ਕਿ ਮਰਨ ਵਾਲੇ ਵਿਅਕਤੀ 60 ਤੇ 70 ਸਾਲ ਦੇ ਸਨ। ਇਹ ਵੀ ਪਤਾ ਲੱਗਿਆ ਹੈ ਕਿ ਐਮਕੀ ਦੇ ਹਸਪਤਾਲ ਵਿੱਚ ਦਾਖਲ ਜ਼ਖ਼ਮੀਆਂ ਵਿੱਚ ਬੱਚੇ ਵੀ ਹਨ। ਜ਼ਖ਼ਮੀ ਹੋਏ ਨੌਂ ਵਿਅਕਤੀਆਂ ਵਿੱਚੋਂ ਦੋ ਦੀ ਹਾਲਤ ਨਾਜ਼ੁਕ ਦੱਸੀ ਜਾਂਦੀ ਹੈ। ਬਾਕੀ ਸੱਤਾਂ ਦੀ ਜਾਂਚ ਚੱਲ ਰਹੀ ਹੈ।