ਓਟਵਾ, 7 ਮਾਰਚ (ਪੋਸਟ ਬਿਊਰੋ) : ਕੈਨੇਡਾ ਦੇ ਸੱਭ ਤੋਂ ਵੱਡੇ ਗ੍ਰੌਸਰੀ ਸਟੋਰਜ਼ ਦੇ ਸੀਈਓਜ਼ ਨੂੰ ਲੰਮੇਂ ਹੱਥੀਂ ਲੈਣ ਲਈ ਐਮਪੀਜ਼ ਪੂਰੀ ਤਰ੍ਹਾਂ ਤਿਆਰ ਹਨ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਐਮਪੀਜ਼ ਇਹ ਪਤਾ ਲਾਉਣਾ ਚਾਹੁੰਦੇ ਹਨ ਕਿ ਮੰਦਵਾੜੇ ਦੇ ਇਸ ਦੌਰ ਵਿੱਚ ਗਰੌਸਰੀ ਸਟੋਰਜ਼ ਐਨੀ ਕਮਾਈ ਕਿਵੇਂ ਕਰ ਰਹੇ ਹਨ। ਐਮਪੀਜ਼ ਇਸ ਮਾਮਲੇ ਵਿੱਚ ਪੂਰੀ ਪਾਰਦਰਸ਼ਤਾ ਲਿਆਉਣੀ ਚਾਹੁੰਦੇ ਹਨ।
ਖਾਣੇ ਦੀਆਂ ਕੀਮਤਾਂ ਵਿੱਚ ਲਗਾਤਾਰ ਹੋ ਰਹੇ ਵਾਧੇ ਦੇ ਅਧਿਐਨ ਦੇ ਹਿੱਸੇ ਵਜੋਂ ਬੁੱਧਵਾਰ ਨੂੰ ਲੋਬਲਾਅ ਕੌਸ ਲਿਮਟਿਡ, ਮੈਟਰੋ ਇਨਕਾਰਪੋਰੇਸ਼ਨ ਤੇ ਐਂਪਾਇਰ ਕੋ· ਲਿਮਟਿਡ, ਜੋ ਕਿ ਸੋਬੇਅਜ਼, ਸੇਫਵੇਅ ਤੇ ਫਰੈਸਕੋ ਵਰਗੀਆਂ ਚੇਨਜ਼ ਆਪਰੇਟ ਕਰਦੇ ਹਨ, ਦੇ ਸੀਈਓ ਤੇ ਪ੍ਰੈਜ਼ੀਡੈਂਟ ਹਾਊਸ ਆਫ ਐਗਰੀਕਲਚਰ ਕਮੇਟੀ ਸਾਹਮਣੇ ਗਵਾਹੀ ਦੇਣਗੇ।ਇੱਥੇ ਦੱਸਣਾ ਬਣਦਾ ਹੈ ਕਿ ਹੋਰਨਾਂ ਕੰਪਨੀਆਂ ਦੇ ਸੀਈਓਜ਼ ਪਹਿਲਾਂ ਹੀ ਐਮਪੀਜ਼ ਸਾਹਮਣੇ ਇਸ ਸਬੰਧ ਵਿੱਚ ਆਪਣਾ ਪੱਖ ਰੱਖ ਚੁੱਕੇ ਹਨ।
ਪਰ ਐਨਡੀਪੀ ਵੱਲੋਂ ਉਚੇਚੇ ਤੌਰ ਉੱਤੇ ਇਸ ਗੱਲ ਉੱਤੇ ਇਤਰਾਜ਼ ਪ੍ਰਗਟਾਇਆ ਗਿਆ ਸੀ ਕਿ ਇਸ ਮਾਮਲੇ ਵਿੱਚ ਸੀਈਓਜ਼ ਵੱਲੋਂ ਖੁਦ ਗਵਾਹੀ ਕਿਉਂ ਨਹੀਂ ਦਿੱਤੀ ਜਾਂਦੀ।ਇੰਡਸਟਰੀ ਦੇ ਆਗੂਆਂ ਦਾ ਪੱਖ ਜਾਨਣ ਦਾ ਇਹ ਪ੍ਰਸਤਾਵ ਪਾਰਟੀ ਦੇ ਐਗਰੀਕਲਚਰ ਕ੍ਰਿਟਿਕ ਐਲਿਸਟੇਅਰ ਮੈਕਗ੍ਰੈਗਰ ਦਾ ਸੀ ਤੇ ਇਸ ਨੂੰ ਕਮੇਟੀ ਵਿੱਚ ਮੌਜੂਦ ਲਿਬਰਲ, ਕੰਜ਼ਰਵੇਟਿਵ ਤੇ ਬਲਾਕ ਕਿਊਬਿਕੁਆ ਦੇ ਐਮਪੀਜ਼ ਵੱਲੋਂ ਭਰਵਾਂ ਸਮਰਥਨ ਮਿਲਿਆ।