ਟੋਰਾਂਟੋ, 25 ਨਵੰਬਰ (ਪੋਸਟ ਬਿਊਰੋ) : ਸਿਟੀ ਆਫ ਟੋਰਾਂਟੋ ਦਾ ਕਹਿਣਾ ਹੈ ਕਿ ਉਹ ਗ੍ਰੀਨਹਾਊਸ ਗੈਸਾਂ ਦੇ ਰਿਸਾਅ ਨੂੰ ਘਟਾਉਣ ਲਈ ਮਿਥੇ ਆਪਣੇ ਟੀਚੇ ਮੁਤਾਬਕ ਸਹੀ ਦਿਸ਼ਾ ਵੱਲ ਚੱਲ ਰਹੇ ਹਨ।
ਸਿਟੀ ਦਾ ਕਹਿਣਾ ਹੈ ਕਿ 1990 ਦੇ ਮੁਕਾਬਲੇ 2019 ਵਿੱਚ ਗ੍ਰੀਨਹਾਊਸ ਗੈਸਾਂ ਦਾ ਰਿਸਾਅ 38 ਫੀ ਸਦੀ ਘੱਟ ਰਿਹਾ। ਟੋਰਾਂਟੋ ਨੇ 2020 ਤੱਕ 30 ਫੀ ਸਦੀ ਰਿਸਾਅ ਘਟਾਉਣ ਦਾ ਟੀਚਾ ਮਿਥਿਆ ਸੀ, 2030 ਤੱਕ 65 ਫੀ ਸਦੀ ਤੇ 2050 ਤੱਕ ਜ਼ੀਰੋ ਰਿਸਾਅ ਦਾ ਟੀਚਾ ਮਿਥਿਆ ਸੀ। ਸਿਟੀ ਦਾ ਕਹਿਣਾ ਹੈ ਕਿ ਰੈਜ਼ੀਡੈਂਸ਼ੀਅਲ, ਕਮਰਸ਼ੀਅਲ ਤੇ ਇੰਡਸਟਰੀਅਲ ਬਿਲਡਿੰਗਜ਼ 57 ਫੀ ਸਦੀ ਰਿਸਾਅ ਲਈ ਜਿ਼ੰਮੇਵਾਰ ਹਨ ਤੇ ਅਜਿਹਾ ਮੁੱਖ ਤੌਰ ਉੱਤੇ ਇਨ੍ਹਾਂ ਇਮਾਰਤਾਂ ਨੂੰ ਨਿੱਘਾ ਰੱਖਣ ਲਈ ਵਰਤੀ ਜਾਂਦੀ ਕੁਦਰਤੀ ਗੈਸ ਕਾਰਨ ਹੈ।
ਰਿਸਾਅ ਦਾ ਦੂਜਾ ਵੱਡਾ ਸਰੋਤ ਟਰਾਂਸਪੋਰਟੇਸ਼ਨ ਹੈ ਜੋ 36 ਫੀ ਸਦੀ ਰਿਸਾਅ ਲਈ ਜਿ਼ੰਮੇਵਾਰ ਹੈ। ਗੱਡੀਆਂ ਲਈ ਗੈਸੋਲੀਨ ਗ੍ਰੀਨਹਾਊਸ ਗੈਸਾਂ ਦੇ ਰਿਸਾਅ ਦਾ ਮੁੱਖ ਕਾਰਨ ਹੈ।ਸਿਟੀ ਨੇ ਆਖਿਆ ਕਿ ਜੇ ਉਹ 2030 ਤੱਕ ਆਪਣਾ ਟੀਚਾ ਪੂਰਾ ਕਰਨਾ ਚਾਹੁੰਦੇ ਹਨ ਤਾਂ ਉਨ੍ਹਾਂ ਨੂੰ ਤੇਜ਼ੀ ਨਾਲ ਇਸ ਰਿਸਾਅ ਨੂੰ ਘਟਾਉਣਾ ਹੋਵੇਗਾ।