ਨਵੀਂ ਦਿੱਲੀ, 15 ਸਤੰਬਰ (ਪੋਸਟ ਬਿਊਰੋ)- ਸੈਂਟਰਲ ਵਿਸਟਾ ਪ੍ਰਾਜੈਕਟ ਹੇਠ ਭਾਰਤ ਦੀ ਪਾਰਲੀਮੈਂਟ ਦੀ ਇੱਕ ਨਵੀਂ ਇਮਾਰਤ ਅਤੇ ਇੱਕ ਨਵਾਂ ਰਿਹਾਇਸ਼ੀ ਕੰਪਲੈਕਸ ਬਣ ਰਿਹਾ ਹੈ। ਇਸ ਵਿੱਚ ਪ੍ਰਧਾਨ ਮੰਤਰੀ ਅਤੇ ਉਪ ਰਾਸ਼ਟਰਪਤੀ ਦੇ ਨਿਵਾਸ ਦੇ ਨਾਲ ਮੰਤਰਾਲੇ ਦੇ ਦਫ਼ਤਰਾਂ ਲਈ ਕਈ ਨਵੀਂਆਂ ਦਫ਼ਤਰੀ ਇਮਾਰਤਾਂ ਅਤੇ ਕੇਂਦਰੀ ਸਕੱਤਰੇਤ ਦਾ ਨਿਰਮਾਣ ਕੀਤਾ ਜਾ ਰਿਹਾ ਹੈ, ਜਿਸ ਬਾਰੇ ਕਈ ਗੱਲਾਂ ਸਾਹਮਣੇ ਆ ਰਹੀਆਂ ਹਨ।
ਮਿਲੀ ਜਾਣਕਾਰੀ ਅਨੁਸਾਰ ਇਸ ਦੇ ਨਾਲ ਹੀ ਦਿੱਲੀ ਦੇ ਡਲਹੌਜੀ ਰੋਡ ਉੱਤੇ ਰੱਖਿਆ ਮੰਤਾਰਲੇ (ਐਮ ਓ ਡੀ) ਨਾਲ ਸਬੰਧਤ ਕਈ ਅਧਿਕਾਰੀਆਂ ਦੇ ਦਫ਼ਤਰਾਂ ਨੂੰ ਪ੍ਰਧਾਨ ਮੰਤਰੀ ਦੀ ਨਵੀਂ ਰਿਹਾਇਸ਼ ਵਿੱਚ ਬਦਲਿਆ ਜਾ ਰਿਹਾ ਹੈ। ਪ੍ਰਧਾਨ ਮੰਤਰੀ ਦੀ ਨਵੀਂ ਰਿਹਾਇਸ਼ ਤੇ ਦਫ਼ਤਰ ਬਣਾਉਣ ਲਈ 700 ਤੋਂ ਵੱਧ ਦਫ਼ਤਰ ਉਥੋਂ ਹਟਾਏ ਜਾਣਗੇ। ਮੰਤਰਾਲੇ ਦੇ ਲੱਗਭਗ 7000 ਅਧਿਕਾਰੀਆਂ ਦੇ ਨਵੇਂ ਦਫ਼ਤਰ ਕੇਂਦਰੀ ਦਿੱਲੀ ਦੇ ਕਸਤੂਰਬਾ ਗਾਂਧੀ ਮਾਰਗ ਅਤੇ ਚਾਣਕਯਪੁਰੀ ਦੇ ਕੋਲ ਅਫ਼ਰੀਕਾ ਐਵੇਨਿਊ ਵਿੱਚ ਬਦਲ ਦਿੱਤੇ ਜਾਣਗੇ।ਰਿਪੋਰਟ ਅਨੁਸਾਰ ਰੱਖਿਆ ਮੰਤਰਾਲੇ ਦੇ ਦਫ਼ਤਰ ਹਟਾਉਣਨਾਲ ਸਾਊਥ ਬਲਾਕ ਕੋਲ 50 ਏਕੜ ਤੋਂ ਵੱਧ ਖ਼ਾਲੀ ਜ਼ਮੀਨ ਦੀ ਵਰਤੋਂ ਸੈਂਟਰਲ ਵਿਸਟਾ ਪ੍ਰਾਜੈਕਟ ਦੇ ‘ਐਗਜੀਕਿਊਟਿਵ ਐਨਕਲੇਵ' ਨੂੰ ਵਿਕਸਤ ਕਰਨ ਲਈ ਕੀਤੀ ਜਾਵੇਗੀ। ਨਵੇਂ ਕਾਰਜਕਾਰੀ ਐਨਕੇਲਵ ਵਿੱਚ ਪ੍ਰਧਾਨ ਮੰਤਰੀ ਦੀ ਰਿਹਾਇਸ਼ ਤੋਂ ਇਲਾਵਾ, ਕੈਬਨਿਟ ਸਕੱਤਰੇਤ ਅਤੇ ਹੋਰ ਸੀਨੀਅਰ ਅਧਿਕਾਰੀਆਂ ਦੇ ਦਫ਼ਤਰਾਂ ਹੋਣਗੇ।
ਇੱਕ ਸੀਨੀਅਰ ਸਰਕਾਰੀ ਅਧਿਕਾਰੀ ਦੇ ਅਨੁਸਾਰ ਡਲਹੌਜੀ ਰੋਡ ਦੇ ਆਲੇ ਦੁਆਲੇ ਦੇ ਸਾਰੇ ਦਫ਼ਤਰ ਅਗਲੇ ਦੋ ਮਹੀਨਿਆਂ ਵਿੱਚ ਖ਼ਾਲੀ ਕਰ ਦਿੱਤੇ ਜਾਣਗੇ ਅਤੇ ਨਵੇਂ ਦਫ਼ਤਰ ਸਥਾਈ ਹੋਣਗੇ। ਅਧਿਕਾਰੀ ਨੇ ਦੱਸਿਆ ਕਿ 27 ਵੱਖ-ਵੱਖ ਅਦਾਰਿਆਂ ਨਾਲ ਸਬੰਧਤ 7,000 ਤੋਂ ਵੱਧ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਦੇ ਤਬਾਦਲੇ ਕੀਤੇ ਜਾ ਰਹੇ ਹਨ। ਇਹ ਅਧਿਕਾਰੀ ਰੱਖਿਆ ਮੰਤਰਾਲੇ, ਸੇਵਾ ਮੁੱਖ ਦਫ਼ਤਰ ਤੇ ਹੋਰ ਅਧੀਨ ਦਫ਼ਤਰਾਂ ਨਾਲ ਜੁੜੇ ਹੋਏ ਹਨ। ਨਵੀਂ ਇਮਾਰਤ ਵਿੱਚ ਆਧੁਨਿਕ ਸਹੂਲਤਾਂ, ਸੰਪਰਕ ਅਤੇ ਕੰਟੀਨ, ਬੈਂਕ ਆਦਿ ਵਰਗੀਆਂ ਭਲਾਈ ਸਹੂਲਤਾਂ ਵੀ ਹੋਣਗੀਆਂ।