ਟੋਰਾਂਟੋ, 8 ਅਪਰੈਲ (ਪੋਸਟ ਬਿਊਰੋ) : ਟੋਰਾਂਟੋ ਪੁਲਿਸ ਦਾ ਕਹਿਣਾ ਹੈ ਕਿ ਇੱਕ ਵਿਅਕਤੀ ਵੱਲੋਂ ਇੱਕ ਮਹਿਲਾ ਦੇ ਘਰ ਦਾਖਲ ਹੋ ਕੇ ਨਕਲੀ ਗੰਨ ਨਾਲ ਉਸ ਨੂੰ ਧਮਕਾਉਣ ਦੇ ਮਾਮਲੇ ਦੇ ਸਬੰਧ ਵਿੱਚ ਮਸ਼ਕੂਕ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ।
ਅੱਜ ਸਵੇਰੇ ਚਰਚ ਤੇ ਵੈਲਸਲੇ ਇਲਾਕੇ ਵਿੱਚ ਯੰਗ ਸਟਰੀਟ ਤੇ ਸੇਂਟ ਜੋਸਫ ਸਟਰੀਟ ਨੇੜੇ ਸਥਿਤ ਇੱਕ ਘਰ ਵਿੱਚ ਪੁਲਿਸ ਨੂੰ ਡਾਕੇ ਦੀ ਸੂਚਨਾ ਦੇ ਕੇ ਸੱਦਿਆ ਗਿਆ। ਪੁਲਿਸ ਅਨੁਸਾਰ ਇੱਕ ਵਿਅਕਤੀ ਅੱਗ ਤੋਂ ਬਚਣ ਲਈ ਲਗਾਈ ਗਈ ਪੌੜੀ ਤੋਂ ਘਰ ਦੇ ਉੱਪਰ ਚੜ੍ਹਿਆ ਤੇ ਘਰ ਦੇ ਪਿਛਲੇ ਪਾਸੇ ਲੱਗੇ ਦਰਵਾਜ਼ੇ ਨੂੰ ਉਸ ਨੇ ਧੱਕੇ ਨਾਲ ਖੋਲ੍ਹਿਆ ਤੇ ਫਿਰ ਉਹ ਘਰ ਦੇ ਬੈੱਡਰੂਮ ਵਿੱਚ ਦਾਖਲ ਹੋ ਗਿਆ। ਇਸ ਕਮਰੇ ਵਿੱਚ 57 ਸਾਲਾ ਮਹਿਲਾ ਬੈਠੀ ਸੀ।
ਉਸ ਵਿਅਕਤੀ ਨੇ ਮਹਿਲਾ ਕੋਲ ਜਾ ਕੇ ਉਸ ਉੱਤੇ ਨਕਲੀ ਗੰਨ ਤਾਣ ਦਿੱਤੀ। ਫਿਰ ਦੋਵਾਂ ਵਿੱਚ ਹੱਥੋਪਾਈ ਹੋਈ ਕਿਉਂਕਿ ਮਹਿਲਾ ਉਸ ਵਿਅਕਤੀ ਨੂੰ ਬਾਹਰ ਕੱਢਣਾ ਚਾਹੰੁਦੀ ਸੀ ਤੇ ਦਰਵਾਜ਼ਾ ਬੰਦ ਕਰਨਾ ਚਾਹੁੰਦੀ ਸੀ।ਮਸ਼ਕੂਕ ਉਸ ਸਮੇੱ ਭੱਜ ਨਿਕਲਿਆ ਜਦੋਂ ਘਰ ਵਿੱਚ ਰਹਿਣ ਵਾਲਾ ਦੂਜਾ ਵਿਅਕਤੀ ਉੱਥੇ ਪਹੁੰਚ ਗਿਆ। ਪੁਲਿਸ ਤੁਰੰਤ ਮੌਕੇ ਉੱਤੇ ਪਹੁੰਚ ਗਈ ਤੇ ਉਨ੍ਹਾਂ ਮਸ਼ਕੂਕ ਦਾ ਵੀ ਪਤਾ ਲਾ ਲਿਆ। ਪੁਲਿਸ ਨੇ ਦੱਸਿਆ ਕਿ ਮਸ਼ਕੂਕ ਕੋਲ ਨਕਲੀ ਹਥਿਆਰ ਤੇ ਮੈਥਾਮਫੈਟਾਮਾਈਨ ਵੀ ਮਿਲੀ।ਕਿਸੇ ਦੇ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋਣ ਦੀ ਖਬਰ ਨਹੀਂ ਹੈ।
ਟੋਰਾਂਟੋ ਪੁਲਿਸ ਨੇ ਦੱਸਿਆ ਕਿ 32 ਸਾਲਾ ਜਸਟਿਨ ਪਿਲਗ੍ਰਿਮ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ ਤੇ ਉਸ ਉੱਤੇ ਡਾਕਾ ਮਾਰਨ, ਚੋਰੀ ਨਾਲ ਘਰ ਵਿੱਚ ਦਾਖਲ ਹੋਣ, ਨਕਲੀ ਹਥਿਆਰ ਦੀ ਵਰਤੋਂ ਕਰਨ, ਲੁਕਿਆ ਹੋਇਆ ਹਥਿਆਰ ਰੱਖਣ ਤੇ ਪ੍ਰੋਬੇਸ਼ਨ ਦੀ ਉਲੰਘਣਾਂ ਕਰਨ ਵਰਗੇ ਕਈ ਚਾਰਜਿਜ਼ ਲਾਏ ਗਏ ਹਨ।