ਮੁੰਬਈ, 27 ਮਾਰਚ (ਪੋਸਟ ਬਿਊਰੋ)- ਮੁੰਬਈ ਦੇ ਇੱਕ ਮਾਲ ਵਿਚਲੇ ਹਸਪਤਾਲ ਵਿੱਚ ਅੱਗ ਲੱਗਣ ਕਾਰਨ 9 ਮਰੀਜ਼ਾਂ ਦੀ ਮੌਤ ਹੋ ਗਈ, ਜਿੱਥੇ ਕੋਰੋਨਾ ਮਰੀਜ਼ਾਂ ਦਾ ਇਲਾਜ ਚੱਲ ਰਿਹਾ ਸੀ। ਇਹ ਪਤਾ ਨਹੀਂ ਲੱਗਾ ਕਿ ਮ੍ਰਿਤਕਾਂ ਵਿੱਚ ਕੋਰੋਨਾ ਦੇ ਮਰੀਜ਼ ਕਿੰਨੇ ਸਨ ਅਤੇ ਸਥਾਨਕ ਅਧਿਕਾਰੀਆਂ ਨੂੰ ਵੀ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ।
ਅਧਿਕਾਰੀਆਂ ਨੇ ਦੱਸਿਆ ਕਿ ਬਾਂਡੁਪ ਇਲਾਕੇ ਵਿੱਚ ਸਨਰਾਈਜ਼ ਹਸਪਤਾਲ ਦੀ ਡਰੀਮਜ਼ ਇਮਾਰਤ ਵਿੱਚ ਅੱਧੀ ਰਾਤ ਦੇ ਬਾਅਦ ਅੱਗ ਲੱਗੀ। ਹਸਪਤਾਲ ਨੇ ਦੋ ਮਰੀਜ਼ਾਂ ਦੀ ਮੌਤ ਦੀ ਪੁਸ਼ਟੀ ਕੀਤੀ ਤੇ ਕਿਹਾ ਕਿ ਇਨ੍ਹਾਂ ਮੌਤ ਅੱਗ ਲੱਗਣ ਤੋਂ ਪਹਿਲਾਂ ਬਿਮਾਰੀ ਨਾਲ ਹੋ ਗਈ ਸੀ ਅਤੇ ਅੱਗ ਨਾਲ ਕਿਸੇ ਦੀ ਮੌਤ ਨਹੀਂ ਹੋਈ। ਹਸਪਤਾਲ ਤੇ ਅੱਗ ਬੁਝਾਊ ਅਮਲੇ ਦੇ ਵੱਖ-ਵੱਖ ਬਿਆਨਾਂ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇੱਕ ਅਧਿਕਾਰੀ ਨੇ ਕਿਹਾ ਕਿ ਹਸਪਤਾਲ ਮਾਲ ਇਮਾਰਤ ਦੀ ਚਾਰ ਚੌਥੀ ਮੰਜ਼ਿਲ ਉੱਤੇ ਸੀ। ਅੱਗ ਲੱਗਣ ਸਮੇਂ ਇੱਥੇ 76 ਮਰੀਜ਼ ਸਨ, ਇਨ੍ਹਾਂ ਵਿੱਚਬਹੁਤੇ ਕੋਵਿਡ-19 ਤੋਂ ਪੀੜਤ ਸਨ।
ਮੁੰਬਈ ਦੇ ਮੇਅਰ ਕਿਸ਼ੋਰੀ ਪੇਡਨੇਕਰ ਨੇ ਹੈਰਾਨੀ ਪ੍ਰਗਟ ਕੀਤੀ ਕਿ ਹਸਪਤਾਲ ਮਾਲ ਇਮਾਰਤ ਵਿੱਚ ਚੱਲ ਰਿਹਾ ਸੀ। ਹਸਪਤਾਲ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਬਾਂਡੁਪ ਵਿੱਚ ਡਰੀਮਸ ਮਾਲ ਦੀ ਪਹਿਲੀ ਮੰਜ਼ਿਲ ਨੂੰ ਅੱਗ ਲੱਗੀ, ਜਿਸ ਦਾ ਧੂੰਆਂ ਚੌਥੀ ਮੰਜ਼ਿਲ ਉੱਤੇ ਹਸਪਤਾਲ ਤੱਕ ਪੁੱਜ ਗਿਆ। ਪਿਛਲੇ ਸਾਲ ਮੁੰਬਈ ਨਗਰ ਨਿਗਮ (ਬੀ ਐਮ ਸੀ) ਨੇ ਇਸ ਮਾਲ ਇਮਾਰਤ ਨੂੰ ਅੱਗ ਬੁਝਾਉਣ ਦੀਆਂ ਸ਼ਰਤਾਂ ਪੂਰੀਆਂ ਨਾ ਕਰਨ ਦਾ ਨੋਟਿਸ ਭੇਜਿਆ ਸੀ।