ਨਵੀਂ ਦਿੱਲੀ, 16 ਅਕਤੂਬਰ (ਪੋਸਟ ਬਿਊਰੋ)- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ, ਗ੍ਰਹਿ ਮੰਤਰੀ ਅਮਿਤ ਸ਼ਾਹ, ਰੱਖਿਆ ਮੰਤਰੀ ਰਾਜਨਾਥ ਸਿੰਘ, ਵਿਦੇਸ਼ ਮੰਤਰੀ ਐਸ ਜੈਸ਼ੰਕਰ ਅਤੇ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਆਪਣੇ ਬੈਂਕ ਖਾਤਿਆਂ ਅਤੇ ਜਾਇਦਾਦਾਂ ਦੀ ਨਵੀਂ ਜਾਣਕਾਰੀ ਦਿੱਤੀ ਹੈ।
ਇਸ ਨਵੀਂ ਜਾਣਕਾਰੀ ਅਨੁਸਾਰ ਪ੍ਰਧਾਨ ਮੰਤਰੀ ਮੋਦੀ ਦੀ ਦੀ ਕੁਲ ਜਾਇਦਾਦ 30 ਜੂਨ 2020 ਤੱਕ ਵਧ ਕੇ 2.85 ਕਰੋੜ ਹੋ ਗਈ ਹੈ। ਪਿਛਲੇ ਸਾਲ 2019 ਦੇ ਮੁਕਾਬਲੇ ਇਸ ਸਾਲ ਮੋਦੀ ਦੀ ਜਾਇਦਾਦ 36 ਲੱਖ ਰੁਪਏ ਵਧੀ ਹੈ। ਇਸ ਦੇ ਉਲਟ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੀ ਸਾਲਾਨਾ ਆਮਦਨ ਘਟੀ ਹੈ। ਪ੍ਰਧਾਨ ਮੰਤਰੀ ਮੋਦੀ ਦੀ ਚੱਲ ਜਾਇਦਾਦ ਵਿੱਚ ਪਿਛਲੇ ਵਿੱਤੀ ਸਾਲ ਦੇ ਮੁਕਾਬਲੇ 26.26 ਫ਼ੀਸਦੀ ਵਾਧਾਂ ਹੋਇਆ ਹੈ। ਇਹ 1,39,10,260 ਰੁਪਏ ਤੋਂ ਵਧ ਕੇ 1,75,63,618 ਰੁਪਏ ਹੋ ਗਈ ਹੈ। ਮੋਦੀ ਨੇ 12 ਅਕਤੂਬਰ ਨੂੰ ਆਪਣੀ ਜਾਇਦਾਦ ਬਾਰੇ ਦੱਸਿਆ ਕਿ ਉਨ੍ਹਾਂ ਦੀ ਕੁਲ ਜਾਇਦਾਦ 2.85 ਕਰੋੜ ਹੈ। ਪਿਛਲੇ ਸਾਲ ਮੋਦੀ ਦੀ ਜਾਇਦਾਦ 2.49 ਕਰੋੜ ਰੁਪਏ ਸੀ। ਕੋਰੋਨਾ ਕਾਲ ਵਿੱਚ ਵੀ ਮੋਦੀ ਦੀ ਜਾਇਦਾਦ ਬੈਂਕਾਂ ਅਤੇ ਕਈ ਹੋਰ ਸੁਰੱਖਿਅਤ ਸਾਧਨਾਂ ਵਿੱਚ ਨਿਵੇਸ਼ ਨਾਲ ਵਧੀ ਹੈ। ਬੈਂਕਾਂ ਤੋਂਉਨ੍ਹਾਂ ਨੂੰ 3.3 ਲੱਖ ਦੀ ਰਿਟਰਨ ਮਿਲੀ ਹੈ। ਉਥੇ ਹੋਰ ਸੁਰੱਖਿਅਤ ਸਾਧਨਾਂ ਤੋਂ 33 ਲੱਖ ਰੁਪਏ ਦੀ ਰਿਟਰਨ ਮਿਲੀ ਹੈ। ਮੋਦੀ ਦੇ ਨਾਂਅ ਉਪਰ ਨਾ ਤਾਂ ਕੋਈ ਕਰਜ਼ਾ ਹੈ ਅਤੇ ਨਾ ਉਨ੍ਹਾਂ ਦੇ ਨਾਂਅ `ਤੇ ਕੋਈ ਵਾਹਨ ਹੈ। ਉਨ੍ਹਾਂ ਕੋਲ ਚਾਰ ਸੋਨੇ ਦੀਆਂ ਅੰਗੂਠੀਆਂ ਹਨ ਜਿਨ੍ਹਾਂ ਦਾ ਵਜ਼ਨ ਲੱਗਭਗ 45 ਗ੍ਰਾਮ ਹੈ ਅਤੇ ਇਨ੍ਹਾਂ ਦੀ ਕੀਮਤ 1.5 ਲੱਖ ਰੁਪਏ ਹੈ।