ਨਵੀਂ ਦਿੱਲੀ, 10 ਅਕਤੂਬਰ (ਪੋਸਟ ਬਿਊਰੋ)- ਆਲ ਇੰਡੀਆ ਮੈਡੀਕਲ ਇੰਸਟੀਚਿਊਟ (ਏਮਸ) ਦੇ ‘ਬਿਹੇਵੀਅਰਲ ਐਡੀਕਸ਼ਨ ਕਲੀਨਿਕ' ਵਿੱਚ ਇੰਟਰਨੈਟ ਦੀ ਆਦਤ ਦੀ ਸ਼ਿਕਾਇਤ ਕਾਰਨ ਪਹੁੰਚ ਰਹੇ ਲੋਕਾਂ ਦੀ ਗਿਣਤੀ ਬੀਤੇ ਦੋ ਸਾਲਾਂ ਵਿੱਚ ਦੋਗੁਣੀ ਹੋ ਗਈ ਹੈ। ਇਹ ਕਲੀਨਿਕ ਦੋ ਸਾਲ ਪਹਿਲਾਂ ਹੀ ਸ਼ੁਰੂ ਕੀਤਾ ਗਿਆ ਸੀ।
ਏਮਸ ਦੇ ਮਾਹਰਾਂ ਨੇ ਕੱਲ੍ਹ ਦੱਸਿਆ ਕਿ ਇੰਟਰਨੈਟ ਦੀ ਆਦਤ ਦੀ ਵਜ੍ਹਾ ਨਾਲ ਨੌਜਵਾਨਾਂ ਵਿੱਚ ਵਿਹਾਰ ਦੀਆਂ ਗੰਭੀਰ ਪਰੇਸ਼ਾਨੀਆਂ ਵਿਕਸਤ ਹੋ ਰਹੀਆਂ ਹਨ। ਇਨ੍ਹਾਂ ਨੌਜਵਾਨਾਂ ਵਿੱਚ ਜ਼ਿਆਦਾਤਰ ਸਕੂਲ ਤੇ ਕਾਲਜ ਦੇ ਵਿਦਿਆਰਥੀ ਹਨ। ਇੰਟਰਨੈਟ ਦੀ ਆਦਤ ਦਾ ਮਤਲਬ ਇਸ ਦਾ ਬਿਨਾਂ ਕੰਟਰੋਲ ਇਸਤੇਮਾਲ ਹੈ। ਲੋਕ ਅਕਸਰ ਇੰਟਰਨੈਟ 'ਤੇ ਗੇਮਸ ਖੇਡਦੇ ਜਾਂ ਅਸ਼ਲੀਲ ਫਿਲਮਾਂ ਦੇਖਦੇ ਹਨ। ਉਹ ਇਸ ਦੇ ਇੰਨੇ ਆਦੀ ਹੋ ਜਾਂਦੇ ਹਨ ਕਿ ਆਪਣੇ ਨਿੱਤ ਦੇ ਕੰਮ ਵੱਲ ਵੀ ਧਿਆਨ ਨਹੀਂ ਕਰ ਸਕਦੇ। ਏਮਸ ਦੀ ਕਲੀਨਿਕਲ ਮਨੋਵਿਗਿਆਨੀ ਰਚਨਾ ਭਾਰਗਵ ਨੇ ਕਿਹਾ ਕਿ ਇੰਟਰਨੈਟ ਦੀ ਵਰਤੋਂ ਨਾਲ ਕਈ ਪਰੇਸ਼ਾਨੀਆਂ ਓਦੋਂ ਹੁੰਦੀਆਂ ਹਨ ਜਦ ਮਾਤਾ ਪਿਤਾ ਆਪਣੇ ਬੱਚਿਆਂ ਦਾ ਧਿਆਨ ਨਹੀਂ ਕਰਦੇ ਤੇ ਅਨੁਸ਼ਾਸਨ ਤੋਂ ਉਲਟ ਬੁਰੀ ਸੰਗਤ ਹੁੰਦੀ ਹੈ। ਮਾਤਾ ਪਿਤਾ ਨੂੰ ਆਪਣੇ ਬੱਚਿਆਂ ਦੀਆਂ ਗਤੀਵਿਧੀਆਂ ਦੀ ਨਿਗਰਾਨੀ ਕਰਨੀ ਚਾਹੀਦੀ ਅਤੇ ਉਨ੍ਹਾਂ ਦੇ ਰੋਜ਼ ਦੇ ਪ੍ਰੋਗਰਾਮ ਵਿੱਚ ਰੁਚੀ ਵਾਲੀਆਂ ਗਤੀਵਿਧੀਆਂ ਨੂੰ ਸ਼ਾਮਲ ਕਰਨਾ ਚਾਹੀਦਾ।