ਵਾਸਿ਼ੰਗਟਨ, 26 ਅਗਸਤ (ਪੋਸਟ ਬਿਊਰੋ): ਅਮਰੀਕਾ ਨੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੁਆਰਾ ਪਹਿਲਾਂ ਐਲਾਨ ਕੀਤੇ ਗਏ ਭਾਰਤੀ ਉਤਪਾਦਾਂ 'ਤੇ 25 ਫੀਸਦੀ ਵਾਧੂ ਡਿਊਟੀ ਲਗਾਉਣ ਦੀਆਂ ਯੋਜਨਾਵਾਂ ਦਾ ਵੇਰਵਾ ਦੇਣ ਵਾਲਾ ਇੱਕ ਡਰਾਫਟ ਨੋਟਿਸ ਜਾਰੀ ਕੀਤਾ ਹੈ। ਇਹ ਡਿਊਟੀਆਂ ਬੁੱਧਵਾਰ, 27 ਅਗਸਤ ਤੋਂ ਲਾਗੂ ਹੋਣਗੀਆਂ। ਗ੍ਰਹਿ ਮੰਤਰਾਲੇ ਨੇ ਸੋਮਵਾਰ ਨੂੰ ਪ੍ਰਕਾਸ਼ਿਤ ਇੱਕ ਡਰਾਫਟ ਆਰਡਰ 'ਚ ਕਿਹਾ ਕਿ ਵਧੀ ਹੋਈ ਡਿਊਟੀ ਉਨ੍ਹਾਂ ਭਾਰਤੀ ਉਤਪਾਦਾਂ 'ਤੇ ਲਾਗੂ ਹੋਵੇਗੀ ਜੋ 27 ਅਗਸਤ, 2025 ਨੂੰ 12.01 ਵਜੇ 'ਪੂਰਬੀ ਡੇਲਾਈਟ ਟਾਈਮ' ਨੂੰ ਜਾਂ ਉਸ ਤੋਂ ਬਾਅਦ ਖਪਤ ਲਈ (ਦੇਸ਼ ਵਿੱਚ) ਲਿਆਂਦੀਆਂ ਜਾਂਦੀਆਂ ਹਨ ਜਾਂ ਗੋਦਾਮ ਤੋਂ ਹਟਾਈਆਂ ਜਾਂਦੀਆਂ ਹਨ।
ਟਰੰਪ ਨੇ 7 ਅਗਸਤ ਨੂੰ ਐਲਾਨ ਕੀਤਾ ਸੀ ਕਿ ਭਾਰਤ ਵੱਲੋਂ ਰੂਸੀ ਕੱਚੇ ਤੇਲ ਦੀ ਖਰੀਦ ਲਈ ਭਾਰਤੀ ਸਾਮਾਨ 'ਤੇ ਡਿਊਟੀ ਦੁੱਗਣੀ ਕਰਕੇ 50 ਪ੍ਰਤੀਸ਼ਤ ਕਰ ਦਿੱਤੀ ਜਾਵੇਗੀ, ਹਾਲਾਂਕਿ ਉਨ੍ਹਾਂ ਨੇ ਸਮਝੌਤੇ 'ਤੇ ਗੱਲਬਾਤ ਕਰਨ ਲਈ 21 ਦਿਨ ਦਿੱਤੇ ਸਨ। ਇਹ ਡਿਊਟੀ ਜੁਲਾਈ ਦੇ ਅਖੀਰ 'ਚ ਐਲਾਨੀ ਗਈ 25 ਫੀਸਦੀ ਡਿਊਟੀ ਤੋਂ ਇਲਾਵਾ ਲਗਾਈ ਜਾਵੇਗੀ। ਜੁਲਾਈ ਵਿੱਚ ਐਲਾਨੀ ਗਈ ਡਿਊਟੀ 7 ਅਗਸਤ ਤੋਂ ਲਾਗੂ ਹੋ ਗਈ। ਅਮਰੀਕੀ ਰਾਸ਼ਟਰਪਤੀ ਦੇ ਸਰਕਾਰੀ ਨਿਵਾਸ ਅਤੇ ਦਫ਼ਤਰ, ਵ੍ਹਾਈਟ ਹਾਊਸ ਦੀ ਪ੍ਰੈਸ ਸਕੱਤਰ ਕੈਰੋਲੀਨ ਲੇਵਿਟ ਨੇ ਇਸ ਮਹੀਨੇ ਦੇ ਸ਼ੁਰੂ ਵਿੱਚ ਕਿਹਾ ਸੀ ਕਿ ਰਾਸ਼ਟਰਪਤੀ ਟਰੰਪ ਨੇ ਰੂਸ ਅਤੇ ਯੂਕਰੇਨ ਵਿਚਕਾਰ ਟਕਰਾਅ ਨੂੰ ਖਤਮ ਕਰਨ ਲਈ ਭਾਰਤ 'ਤੇ ਪਾਬੰਦੀਆਂ ਲਗਾਈਆਂ ਹਨ।
ਅਮਰੀਕੀ ਵਿੱਤ ਮੰਤਰੀ ਸਕਾਟ ਬੇਸੈਂਟ ਨੇ ਭਾਰਤ 'ਤੇ ਰੂਸੀ ਤੇਲ ਖਰੀਦ ਕੇ ਅਤੇ ਫਿਰ ਇਸਨੂੰ ਬਾਜ਼ਾਰ ਵਿੱਚ ਦੁਬਾਰਾ ਵੇਚ ਕੇ "ਮੁਨਾਫ਼ਾ" ਕਮਾਉਣ ਦਾ ਦੋਸ਼ ਲਗਾਇਆ ਹੈ। ਭਾਰਤ ਨੇ ਅਮਰੀਕਾ ਦੁਆਰਾ ਲਗਾਏ ਗਏ ਡਿਊਟੀਆਂ ਨੂੰ "ਅਨਿਆਂਪੂਰਨ ਅਤੇ ਅਸੰਗਤ" ਕਿਹਾ ਹੈ। ਭਾਰਤ ਨੇ ਕਿਹਾ ਹੈ ਕਿ ਹਰ ਵੱਡੀ ਅਰਥਵਿਵਸਥਾ ਵਾਂਗ, ਇਹ ਆਪਣੇ ਰਾਸ਼ਟਰੀ ਹਿੱਤਾਂ ਅਤੇ ਆਰਥਿਕ ਸੁਰੱਖਿਆ ਦੀ ਰੱਖਿਆ ਲਈ ਵੀ ਸਾਰੇ ਜ਼ਰੂਰੀ ਕਦਮ ਚੁੱਕੇਗਾ।